Pơgê 27/3, Anih vei lăng kon pơlei apŭng Phú Thiện pơgơ̆r lêh soi kơ yang ‘mi đơ̆ng Yang Pơtao Apui păng tơdrong thi jŏh ayŏ kơ dŏ xoang, tơplŏng kơdâu kơ dôm hơdrĕch kon kông ‘măng mă XVI tơ̆ Anih gru groa kăp gĭt – jŏh ayŏ kơ dŏ xoang kơ teh đak tơ̆ Plei Ơi (xăh Ayun Hạ, apŭng Phú Thiện, dêh char Gia Lai) vă roi tơƀôh tơmam jŏh ayŏ kăp gĭt păng tơdrong ‘lơ̆ng vă jang tŏk mŭk drăm, tơpôl, sơng tơmoi truh tơmang lăng păng tơmât jên jang găh tơmang lăng. Lêh soi kơ yang ‘mi pơgơ̆r tơ̆ kơpal kông Yang Chư Tao Yang, yoa ƀok Siu Phơ, bơngai pơvih ăn Ƀok Pơtao unh chăl mă 14, kŭm hăm đe kră pơlei păng ngê̆ nhơ̆n vang pơgơ̆r.

Nơ̆r soi kơ yang plenh, yang teh tơjur ăn ‘Mi rŏ, tŏ hơlăng, vă ‘long blŭh jing ‘lơ̆ng, kon pơlei mât 1 ƀơ̆r đon, pran jăng grăng akâu, yak hlŏh rim tơdrong ưh ‘lơ̆ng đơ̆ng tŏ ‘mi kial kơnê̆. Kŭm hăm ‘nŏh jĭ tơdrong thi jŏh ayŏ kơ dŏ xoang, tơplŏng kơdâu, hăm lơ tơdrong jang tôch hơiă nhen tôn chĭng, tanh hơkăt, chrăh mul, tanh brai vai khăn, păng lơ tơdrong pơm ngôi nai nhen hao ‘long sơng, prăh hră păng pơplŏng ƀao ƀô̆. Mă loi jĭ tơdrong thi kơdâu đei hơnăn “Yak kiơ̆ jơ̆ng Ƀok pơtao unh” kŭm đei pơgơ̆r tôch hơiă tơ̆ lêh soi âu.