Kon pơlei Ca Dong hơnơ̆ng lăng tơgĭt kơ thong đak. Ah rơih teh pơjing pơlei, kră pơlei layơ adoi rơih thong đak mă hơdrol hloh. Đe sư ming hơdrơ̆m đak kơtă ah kơ̆l pơlei, anih rơgoh 'lơ̆ng hloh. Tơdrong et soi kơ hơdrơ̆m đak đei pơgơ̆r hăm khôi soi tơbeh kăp gĭt hloh.

Đơ̆ng pơgê hrôih, đe hơdruh tơdăm Ca Dong atŭm hăm đe kră pơlei tơring Trà Don, apŭng Nam Trà My, dêh char Quảng Nam, hlôi vih akŏm tơ̆ hnam hơnê̆ pơlei. Tôm cham char ƀenh hăm um rŭp pơrŏ 'lơ̆ng hơmŏ ăn tơdrong et soi. Rim bơngai hrŭk hơbăn ao tanh juăt jue đei lơ pơnĭk đak.

Lơ̆m jơva chĭng chêng păr ang, kră pơlei pơtơm dôm tơdrong soi tơbeh. Hơdrol kơ pơgơ̆r et soi, kră pơlei krao akŏm đe tơdăm lơ̆m pơlei vă pơjao tơdrong jang pơtăm gơ̆ng, choh chong mă rơgoh trong nơnăm truh tơ̆ hơdrơ̆m đak. Đe sư chă hơlen lăng tơnglang đak, mưh ƀôh răm noh ming hơmet hloi, phŏ 'noh tơplih hăm tơnglang 'nao hloi. Kră pơlei Nguyễn Đức Thường, xah Trà Don, apŭng Nam Trà My ăn tơbăt: "Jăl mă mônh noh tơdrong hơmet, hŏk hôp kon pơlei, drơ̆ng lăp lơ̆m pơlei, kră pơlei tơchơ̆t năr pơgơ̆r et soi. Đang kơ 'noh asong bơngai năm koh 'long, mă kăl noh athei rơih koh 'long mă tơpăt, asong rim khul jang, keh đang tơdrong pơtăm gơ̆ng. Gah thong đak, kră pơlei hŏk hôp kon pơlei athei vei rơgoh lơ̆m pơlei pơla, hơdrơ̆m đak. Ah kơ̆l đak ưh đei bu gơh koh 'long, mưh ưh pơm kiơ̆ noh ƀơm phak hrŭ"

Pơtơm jĭ tơdrong jang mă blŭng păng adoi jĭ minh lơ̆m dôm tơdrong kăp gĭt đei tơrĕk lơ hloh lơ̆m tơdrong et soi ou. Vă gơh đei gơ̆ng 'lơ̆ng, đe drŏnglo lơ̆m pơlei athei pơrŏ mă 'lơ̆ng rŏ. Đe sư jang atŭm dih băl tơ̆ rim tơdrong. Đơ̆ng rŏng soi plang kơ yang đang, đe tơdăm lơ̆m pơlei gô ming tơnglang đak ah hơdrơ̆m vă pơchoh đak đơ̆ng tu ro jur tơ̆ hơdrơ̆m păng văk đak 'nhăk brŏk păng chhŭt unh pai por 'nhot.

Lơ̆m kơplah đe drănglo pơrŏ gơ̆ng ga, pơchoh đak ro truh hơdrơ̆m, noh đe drăkăn oei tơ̆ hnam pai por 'nhot. Đe sư pai rim tơmam xa juăt jue nhen: por prung, pơm ƀanh hơke kơpô, dah mă pai tơdrô ge. Pơmai Hồ Thị Hằng, oei tơ̆ xah Trà Don, apŭng Nam Trà My ăn tơbăt:  "Et ming hơdrơ̆m đak ah 'năr brei unh hnam inh hơmet pơm ƀanh, năm koh 'lao vă prung tơyông, kơmăng noh vih ƀuh ƀanh. Đing đei ming ah thong đak ro đơ̆ng kơpal. 'Nou jĭ khôi juăt kơ kon pơlei tơ̆ tơring ou. Iŏk đak đơ̆ng ou vă pai por, pai 'nhĕm nhŭng 'măn soi kơ yang, apinh ăn sơnăm đơ̆ng rŏng kơnh jang xa đei yua, kon hơ-ioh hŏk pơhrăm hơgei tôm tong"

Ƀok Đinh Văn Vượng, Kơdră Anih jang vei lăng kon pơlei xah Trà Don, sơkơ̆t hơdah, et soi ming đak 'noh khôi juăt gah choh jang xa đunh đai tai sơnăm, tơƀôh đon lui đơ̆ng kon pơlei Ca Dong păng kon pơlei khŏm mă vei răk tơƀăk mong: " 'Nou jĭ 'măng vă kon pơlei akŏm, tơroi dih băl gah trong vei lăng bri, vei lăng thong đak, vei lăng pơlei pơla, tơroi ăn dih băl băt gah tơdrong pơm jang, rong kon tơrong... Atŭm hăm noh, jĭ trong hiôk vă kon pơlei hơpeh hơpong, thơ thou dih băl lơ̆m minh sơnăm pơm jang, pơtoi hơlêm dih băl 'lơ̆ng hơ-iă lơ̆m sơnăm 'nao. Khei năr truh, nhôn pơtoi iŏk yua kơjă tơdrong et xa vă vei răk tơƀăk mong joh ayŏ kon pơlei kon kông kơdih"

Lơ̆m tơdrong hơrih chăl 'nao hrei ou, tơdrong lŭk lơ̆k gah joh ayŏ đơ̆ng dôm hơdrung bơngai tơrĕk truh tơdrong hơrih, joh ayŏ kơ kon pơlei đei lơ tơplih, tơdrong vei răk Et soi ming đak 'noh kăp gĭt tơgop lơ̆m tơdrong vei răk tơƀăk mong joh ayŏ kon pơlei kon kông tơ̆ tơring groi kông dêh char Quảng Nam. Atŭm hăm noh jĭ anih tơm vă vei răk tơƀăk mong dôm kơjă joh ayŏ juăt jue, hơyak truh hơtŏk tơdrong jang tơmang pơhiơ̆ pơlei pơla, tơgop lơ̆m tơdrong hơtŏk tơ-iung tơdrong hơrih tơpôl tơ̆ tơring.