Đơ̆ng pơgê hrôih, hnam hơkŭm joh ayŏ kơ pơlei Khal, xah Cư Pơng, ƀenh ƀang kơ bơngai mơ̆t lĕch hơmet ăn tơdrong et tŏk hnam 'nao. Kră pơlei păng dôm bơngai đei kon pơlei lui yom lơ̆m pơlei atŭm hơmet tơmam soi plang, hơlen lăng chĭng chêng; đe tơdăm noh hơmet tơdrô, 'nhĕm păng pơkăp kơƀang tang dŏ; đe drăkăn ƀrŭng ƀreo hăm hơbăn ao tanh peh ƀa, pĕ 'nhot, chhŭt unh vă pai tơmam xa. Rim bơngai minh tơdrong jang, pơjing hê̆ tơdrong hơ-iă rơ-ông rơ-ang. Pơmai H'Hinh Niê, oei tơ̆ pơlei Khal tơroi:  “Đơ̆ng pơgê hrôih pơmai oh hlôi kơchăng, năm truh tơ̆ ou vă tơgŭm pơvih dôm tơdrong jang nhen pai xa, hơmet hla 'nhot, pơ-'nguaih lơ̆m hnam vă sơng tơmoi gĭt truh. Kơdih inh chơt hơ-iă dêh, sô̆ hơ̆k kơlih đei vei răk tơƀăk mong tơdrong joh ayŏ juăt jue kơ bơngai Êđê đơ̆ng kră sơ̆ truh dang ei”

Et tŏk hnam 'nao đei pơgơ̆r kiơ̆ khôi juăt so kơ bơngai Êđê, vă et tŏk hnam hơkŭm 'nao kơ pơlei Khal - "bơbŭng hnam atŭm" kơ pơlei pơla 'nao đei pơm keh đang. Kơlih hnam atŭm noh pơđĭ pơlei pơla atŭm chă hơmet soi tơbeh. Tơmam soi plang đei: 1 pôm nhŭng, 1 pôm iĕr, 6 ge tơdrô atŭm hăm minh ƀar tơmam xa kơyuơ kon pơlei kơdih chă pơtăm chă rong đei.

Ah mă tôm tơmam soi plang đei hơmet, ƀai chêng sơng tơmoi đei pơre pơtơm ăn tơdrong soi tơbeh. Pơjau khan gia pơtơm dôm khôi soi kiơ̆ yok so sơ̆. Nơ̆r sơkat hrau hăm jơva chĭng chêng tơroh kon pơlei pơla, hơ-'nhăk tơdrong hơpơi 'meh đơ̆ng kon pơlei gah tơdrong vei lăng bơbŭng hnam păng apinh ăn rim kon pơlei gơh sơđơ̆ng, grăng pran, sơnêp sơnua, hơnơ̆ng tơguăt tơguăl, hơrih xa jơnap, pơm jang đei yua lơ.

Kiơ̆ kơ ƀok khan gia Y HLiêm Mlô (aê Phước) – kră pơlei Khal, hơdrol sơ̆, ou jĭ khôi et tŏk hnam 'nao kơ bơngai Êđê kiơ̆ 5 tơdrong: mă blŭng noh soi tơbeh ăn kơ yang hơpang băt gah hnam 'nao, đang kơ 'noh soi ƀlŏk kơ yă ƀok dơnơm, soi ôp hnam, soi jơhngơ̆m jăn păng thơ thou 'lơ̆ng ăn kơ bơngai đei hnam 'nao. Hrei ou, tơdrong et xa pă đei vei nhen thoi so noh bơih, kiơ̆ kơ tơdrong hơrih păng kĕ đei kơ unh hnam đĕch: “Tơdrong kăp gĭt kơ et tŏk hnam 'nao kiơ̆ khôi so đơ̆ng yă ƀok tơ̆ dôm pơlei pơla noh kơlih lơ̆m tơdrong koh 'long pơm hnam hơbŏ đei tơdrong pơm ưh kơ trŏ noh athei soi tơbeh vă tơpuh lê̆ dôm tơdrong ưh kơ 'lơ̆ng, vei răk dôm tơdrong 'lơ̆ng rŏ vă tơm hnam gơh đei pŭn ai, grăng pran”.

Tơdra chĭng chêng rơ-ông rơ-ang hloh ah mă khôi soi tơbeh jê̆ tôch, kơlih noh adoi jing tơdrong et xa pơtơm, hăm tơdrong sŏng xa hơtŭm kơ pơlei pơla păng ge tơdrô đei tơkang ƀenh. Lơ̆m hnam 'nao, rim bơngai hơtŭm dih băl et xa păng hơri hơsuang kiơ̆ tơdra chĭng chêng. Ƀok Y Yuynh Kbuôr, kơdră pơlei Khal ăn tơbăt:  “Et tŏk hnam 'nao adoi jing 'măng vă kon pơlei akŏm, tơroi gah joh ayŏ chĭng chêng, et tơdrô ge păng vei răk tơƀăk mong tơdrong joh ayŏ kon kông kơdih. Nhôn roi sô̆ hơ-iă, tơguăt atŭm dih băl pơm jang, hơtŏk pơlei pơla kơdih po”.

Et tŏk hnam 'nao kơ unh hnam bơngai Êđê hăm tơdrong kăp gĭt gah đon lui, pôk bơnê kơ yang hơpang hlôi tơgŭm pring vei ăn tơ-'ngla hnam jang xa đei yua lơ păng kĕ đei vă pơm hnam 'nao. Hăm bơbŭng hnam atŭm kơ pơlei pơla, tơdrong et xa âu jing kăp gĭt hloh vă tơroh rim bơngai, păng tơƀôh đon lui hăm tơdrong tơgŭm đơ̆ng Đảng, Teh đak lơ̆m tơdrong vei răk tơƀăk mong rim kơjă joh ayŏ 'lơ̆ng rŏ kơ hơdrung hơdrĕch.