Rơneh sơnăm 1972, jĭ bơngai hơdrung Mạ tơ̆ xah Bảo Lâm 1, dêh char Lâm Đồng, đơ̆ng oei 'lơ̆p K’Brèm hlôi lăp kơ dôm tơdra hơri brông mă đe kră hơri ah tơnuh unh, lơ̆m kơmăng et xa kơ pơlei pơla. Tŏk 18 sơnăm, K’Brèm pơtơm kiơ̆ rok jơ̆ng đe kră pơlei, đe ngê̆ nhơ̆n 'lŏ sơnăm vă pơhrăm hơri brông, pơhrăm tôn chĭng chêng.  

Dôm tơdra hơri loong, hơri ting kơ bơngai K’Ho, Mạ hơnơ̆ng noh kơjung, phŏ hơri pơdui đơ̆ng kơmăng ou truh 'ngah hloi. Nơ̆r hơri noh chă pơtih pơtŏng, tơdra hơri tơdui hiơ̆ noh đe sơnăm mơlôh tơnap kơ pơhrăm, tơnap kơ ƀlŏk. Mă lei, pơtăl kơ lê̆ tơdrong kăp gĭt noh jing hiơt hiong, K’Brèm hlôi chă trong pơtruh tơdrong hơri brông tơjê̆ hăm tơdrong hơrih hrei ou hloh: “Dôm tơdra hơri loong, hơri ting sơ̆ ki tơnap kơ hơri, athei pơhrăm đunh khei năr noh mă gơh ƀlŏk. Inh chih nơ̆r 'nao vă đe sơnăm mơlôh ƀônh kơ mơ̆ng, ƀônh kơ rơbot hloh, mă lei adoi oei vei tơdrong 'lơ̆ng kơ tơdrong hơri brông kon kông po”.

Ngê̆ nhơ̆n K’Brèm akŏm lơ jơ năr ăn tơdrong chih akŏm tơdrong hơri so sơ̆ kơ bơngai K’Ho, bơngai Mạ. Đei 'măng năm đunh năr, phŏ tơ-oei ah tơnuh unh vă mơ̆ng đe yă ƀok kră hơri vă chih răk nơ̆r hơri so, phŏ kiơ̆ kon pơlei năm tơ̆ mir đơ̆ng pơgê hrôih truh kơsơ̆ klui. Đơ̆ng dôm 'măng chă nơnăm noh, K’Brèm hlôi akŏm đei 6 ƀai hơri brông so kơ bơngai Mạ, lơ̆m noh đei 4 ƀai đei ƀok hơtŏk păng chih nơ̆r 'nao mă lei adoi oei vei tơdra so kon kông kơdih.

Đơ̆ng rŏng khei năr 'noh, ah mă tơdrong jang tơ̆ Hơnih Joh ayŏ apŭng Bảo Lâm (so), đei pơhrăm gah tơdra păng dôm tơdrong joh ayŏ lơ̆m tơring, ƀok pơtơm chih nơ̆r 'nao ăn dôm ƀai hơri brông juăt jue. Adoi oei vei tơdra juăt jue kon kông po, mă lei nơ̆r hơri đei chih trŏ hăm tơdrong hơrih hrei ou vă đe hơdruh tơdăm ƀônh mơ̆ng, ƀônh băt păng ƀônh hơri lơ̆m tơdrong chă akŏm hŏk hôp lơ̆m tơring:

Ưh hơdrô̆ pơm 'nao tơdrong hơri, ngê̆ nhơ̆n K’Brèm oei 'măn lơ jơ vă pơtho tôn chĭng chêng păng hơri brông ăn đe sơnăm mơlôh. Truh dang ei, ƀok hlôi pơtho ăn kơhrĕng bơngai hŏk tơ̆ dôm hnam trưng hŏk teh đak rong 'me păng lơ pơlei pơla lơ̆m tơring. Rim sơnăm, ƀok adoi vang pơih lăm pơtho chĭng chêng, pơtho hơri brông ăn đe hơ-ioh K’Ho, Mạ, tơgop akŏm đei bơngai pơdjoi vei răk tơdrong joh ayŏ juăt jue. Pơmai Ka Thổi, bơngai Mạ tơ̆ phương 2 Bảo Lộc, jĭ minh lơ̆m dôm bơngai hŏk tơguăt hăm ngê̆ nhơ̆n K’Brèm tơroi: “Mơ̆ng mih Brèm hơring brông hăm nơ̆r kon kông kơdih, inh vơch kơ đon dêh. Đơ̆ng noh inh pơhrăm hơri vă tơgop vei răk tơƀăk mong nơ̆r hơri kon kông po”.

Lơ tơdrong hơri mă ƀok chih nơ̆r nhen Kok Kek (Nơ̆r plenh teh), Đơs N’hồl (Tơtơl)… đei buăl mơlôh lŭ lăp. Mă kăl, ƀai hơri Kok Kek đei chih iŏk đơ̆ng tơdrong hơri juăt jue hlôi tơgŭm ăn kơ ƀok đei iŏk hơpah A lơ̆m 'Măng pơlong Tơdrong hơri brông Việt Nam sơnăm 2007. Kiơ̆ đơ̆ng lơ kră pơlei păng ngê̆ nhơ̆n lơ̆m tơring, tơdrong kăp gĭt tơ̆ K’Brèm ưh hơdrô̆ tơdrong hlôh vao gah joh ayŏ K’Ho, Mạ mă oei ah đon bơnôh hơnơ̆ng hơpơi 'meh pơdjoi dôm kơjă kăp gĭt noh ăn kôn mon kon sou. Yă Ka Nhék tơ̆ xah Bảo Lâm 3, dêh char Lâm Đồng tơroi: “Lơ̆m rim nơ̆r hơri brông adoi đei nơ̆r 'lơ̆ng chơt, pơtho kon bơngai hơrih tơguăt tơguăl, 'mêm kơ-eng dih băl. Mưh đe sơnăm mơlôh oei băt hơri brông noh joh ayŏ kon pơlei po gô ưh đei hiơt hiong”.

Đơ̆ng dôm 'măng năm truh pơlei pơla, đơ̆ng dôm lăm pơhrăm gah tôn chĭng chêng, hơri brông tơ̆ pơlei pơla truh dôm tơdrong hơri đei bơngai mơ̆ng lăng lŭ lăp, ngê̆ nhơ̆n K’Brèm (tơ̆ xah Bảo Lâm 1, dêh char Lâm Đồng) tŏk bŏk oei tơgop “pơdriu” dôm tơdra nhen lĕ jê̆ hiơt hiong. Gơnơm tơdrong dăp đon dăp bơnôh kơ ƀok mă dôm tơdrong hơri kon kông K’Ho, Mạ adoi oei đei re ang lơ̆m pơlei pơla, lơ̆m tơdrong et xa păng lơ̆m tơdrong hơrih hrei ou.