Truh dang ei hlôi đei hloh 500 hơnih tĕch mơdro chehphe lơ̆m dêh char chih hơnăn apĭnh tơgum ăn chehphe huch đĕch tŏ sĕt hloh lơ̆m 1 năr 10/3 hăm dang 200.000 kơchŏk đak chehphe huch đĕch. Atŭm hăm ‘noh, lơ̆m dôm năr pơgơ̆r Pơm lêh (đơ̆ng năr 9 truh năr 13/3), gô đei mơjĭt hơnih lơ̆m pơlei tơm Buôn Ma Thuột tơlĕch jang huch đĕch chehphe nhen tơ̆ Kơchơ Tơmam drăm choh jang sa, tơmam drăm OCOP pơlei tơm Buôn Ma Thuột, trong Tôn Đức Thắng, phường Tân Lợi; Đường sách cà-phê Buôn Ma Thuột kơsô̆ 2, trong Phan Chu Trinh, phường Thành Công; trong Phan Đình Giót păng Cham să 10/3… Tơdrong pơgơ̆r ăn huch đĕch chhephe ưh khan lăp tơgŭm ăn tơmoi đei huch chehphe ‘lơ̆ng mă oei tơgop lơ̆m pơm hơtŏk tơdrong kăp gĭt hơnăn chehphe Buôn Ma Thuột lơ̆m hơnih tĕch mơdro tơ̆ teh đak đe.