Ƀok Aê Sa (bơngai ÊĐê, 73 sơnăm) atŭm hăm khul ngê̆ nhơ̆n tơ̆ pơlei Driah, xah Cư Né, apŭng Krông Búk, dêh char Đăk Lăk truh hăm lêh akŏm hăm khul pơdreh chêng knah, hlôm Đing năm păng hơri Ei Rei. Ƀok Aê Sa chơt hơ-iă kơlih đei tơƀôh tơdrong 'lơ̆ng tơbăt 50 sơnăm Đei Jơnei Buôn Ma Thuột păng Lêh akŏm kaphê Buôn Ma Thuột 'măng mă 9: “Truh hăm lêh akŏm kaphê Buôn Ma Thuột sô̆ hơ-iă păng rim 'măng đei lêh akŏm thoi ou Khul nhôn hơnơ̆ng vang akŏm. Adoi nhen đe boăl mơlôh hăt hot atŭm vang akŏm lơ̆m Khul pơdreh chêng kram, chêng kong tôn pơjing tơdra hrơ hrou hadoi lơ̆m Lêh akŏm. Nhôn 'noh 'lŏ sơnăm bơih păng pơdjoi ăn kon sou vei răk tơƀăk mong joh ayŏ juăt jue. Truh tơ̆ ou noh sô̆ hơ-iă, đei lơ tơplih pơtêng hăm hơdrol ki, kơtă lơ̆m pơlei pơla adoi thoi ăi mơ̆n. Tơdrong hơrih hơtŏk tơ-iung hloh, tơmam choh pơtăm nhen kaphê, tiu, kơsu adoi đei kơjă, kon pơlei chă răt bơ̆n gre 'lơ̆ng, răt tơmam yua 'nao lơ̆m hnam, rim bơngai adoi chơt hơ-iă tơnŏ”.

Lêh akŏm kaphê Buôn Ma Thuột 'măng mă 9, pơgơ̆r đơ̆ng năr 9 truh năr 13/3, hăm 17 tơdrong jang tơm. Lêh akŏm jĭ 'măng vă pôk pơ-ư gah tơdrong jang kaphê, atŭm hăm noh pơih trong hiôk vă tơroh hơtŏk jang, sơkơ̆t  “Buôn Ma Thuột jĭ anih truh akŏm kơ kaphê apŭng plenh teh”.