Hla tơnŭng 'lơ̆p ƀăl iơ iă, ah xa 'noh hăp krĕnh rơchăm păng plir. Hla tơnŭng đe hơnơ̆ng pĕ xa ah pơyan phang, ah mă tơm chăt lơ tơ-'mơ̆ng 'lơ̆p. Bơngai Êđê hơnơ̆ng pĕ hla tơnŭng 'lơ̆p xa hơdrih, xa hrau hăm hơdrĕch 'nhot bri nai, dah mă chŭ hăm măm nêm, măm ruôk.

Hla tơnŭng 'lơ̆p adoi gơh chă pơm jing 'nhot rơba hăm ka, tŭl hăm ka kro dah mă ka hơ̆p. Pơmai H’Lop Niê oei tơ̆ pơlei Sah B, xah Ea Tul, apŭng Čư̆ Mgar, dêh char Dak Lak ăn tơbăt, hla tơnŭng 'lơ̆p 'noh ƀăl, hơ̆ hơdu vă nhen hơmrĕ, akŏm tơdrong 'lơ̆ng kăp gĭt kơ bri kông Tây Nguyên jĭ tơdrong tơm pơjing đei tơdrong kăp gĭt kơ 'nhot xa hla tơnŭng tŭl hăm ka hơ̆p: “Tơmam xa ou 'lơ̆ng, 'măn sŏng hăm por tŏ. 'Nou jĭ 'nhot ka hơ̆p tŭl hăm hla tơnŭng 'lơ̆p. Ka noh 'leh lê̆ kơting păng kơ̆l, hla tơnŭng noh pĕ ah jih đak, tơ̆ mir, đang kơ noh tŭl hăm hơmrĕ, ƀoh ƀôk ngok păng kơdĭm kông. Tơmam xa ou đei lơ̆m 'măng sŏng xa rim năr kơ bơngai Êđê đơ̆ng sơ̆ ki bơih”.

Ah măt 'năr lĕch ƀrưch, bơngai Êđê hơmet tôm tơmam drăm năm jang tơ̆ mir. Lơ̆m hơkă trăp tơmam drăm noh ưh gơh kơƀah 'nhot xa ƀônh 'lơ̆ng tôm kơchơ̆t bek ăn minh năr jang hrat. Pang hla tơnŭng 'lơ̆p tŭl hăm ka hơ̆p jĭ minh lơ̆m dôm 'nhot xa thoi ăi. Hla tơnŭng 'lơ̆p tŭl hăm ka hơ̆p hơnơ̆ng 'măn sŏng hăm por tŏ păng 'nhot hơdrih, pơm ăn 'măng sŏng xa jing 'lơ̆ng hloh.

Pơmai H’Đô Niê tơ̆ pơlei Sah B, xah Ea Tul, apŭng Čư̆ Mgar, dêh char Dak Lak tơroi, trong pơjing 'nhot xa ou ưh đei tơnap kiơ, mă lei vă 'nhot xa gơh 'lơ̆ng noh bơngai pai pơjing hăp athei mă kơchăng: “Hla tơnŭng 'lơ̆p ah pơyan ou noh 'lơ̆ng hloh, mưh 'mi jur bơih noh ưh kơ 'lơ̆ng ôh, hla tơnŭng kră, pă đei krĕnh rơchăm bơih. 'Nhot xa ou noh đơ̆ng cham char plenh teh ngăl, hla tơnŭng gơh chă pơtăm lơ̆m pơgar hnam dah mă pĕ tơ̆ mir, tơ̆ bri. Oei ka noh chă you tơ̆ đak, đang kơ noh vih pai pơjing kơdih dah mă răt ka hơ̆p đe tĕch lơ̆m kơchơ”

Ka hơ̆p tŭl hăm hla tơnŭng jĭ minh tơmam xa kăp gĭt lơ̆m ‘nhot xa kăp gĭt kơ bơngai Êđê, tơƀôh đei tơdrong gơh hơgei lơ̆m tơdrong pơjing ‘nhot xa. ‘Nhot xa ou hơnơ̆ng đei xa lơ̆m ‘măng sŏng xa kơ unh hnam, dah mă lơ̆m tơdrong et xa kơ pơlei pơla. Mă kăl, ah khei 3, ah mă plenh teh Tây Nguyên tŏk bŏk tŏk ah pơyan puih phang, ‘nhot xa ou ưh hơdrô̆ jĭ ‘nhot xa ƀou phu tru hŭt kơ bri kơdrơ̆ng mă oei jĭ tơdrong tơguăt tơpôl kon pơlei păng pôk bơnê hăm mŭk drăm mă plenh teh asong ăn.