Plei Kli A, phường Đạt Hiếu, thị xã Buôn Hồ, hơtăih kơ pơlei tơm Buôn Ma Thuột hloh 40km. Pơlei dang ei đei 276 ŭnh hnam kon pơlei hơrih sa, vă đĭ đăng ‘noh bơngai Ê Đê, oei chĕp vei đei lơ tơdrong joăt so ‘lơ̆ng hơiă nhen chĭng chêng, tơmam tôn reh kon kông, dôm tơdrong et soi păng 1,2 tơdrong jang joăt joe. Đơ̆ng sơnăm 2023, plei Kli A hlôi đei thị xã Buôn Hồ tơmơ̆t jên jang hơnih bơ̆jang hăm hơnih pơdă tơƀôh tơmam joh ayŏ, hnam kơjung, pơm hơmet ming dơ̆ng đak tơ nglang.

Sơnăm 2024, Anih vei lăng kon pơlei dêh char Đắk Lắk hlôi rơih plei Kli A păng 4 ŭnh hnam lơ̆m pơlei vă tơgŭm păng jang pơkeh tơdrong tơmơ̆t jên jang hơtŏk tơiung tơmang lăng tơpôl. Kiơ̆ trong vă jang, plei Kli A gô hơtŏk tơiung dôm tơmam tơmang lăng tơpôl nhen chă lăng vă kơbăt, chă hơlen lăng tơdrong hơrih sa, oei sa, jang sa đơ̆ng kon pơlei Ê Đê; chă lăng tơdrong joăt đơ̆ng sơ̆ nhen tôn chĭng chêng, hơri hơsoang kră sơ̆, tơmam sa păng tơƀơ̆p, pơma dơnuh rim kon pơlei; năm lăng cham char bri brăh păng tơgoăt hơdai dôm hơnih truh lơ̆m tơdrong jang tơmang lăng.