Tơdrong pơdah hơnăn “Khei năr tam hơtaih - Gia Lai - Kon Tum đơ̆ng rŏng 1975” pơgơ̆r tơ̆ Cham pơhiơ̆ Đại Đoàn Kết, pơlei tơm Pleiku, pơdah 150 tŏ um rŭp gĭt gah tơdrong hơrih kon pơlei Gia Lai - Kon Tum lơ̆m dôm sơnăm blŭng kơ đei iŏk jơnei. Rim um rŭp tơbang hơdah gah tơdrong hơrih, hŏk pơhrăm, pơm jang... tơƀôh hơdah tơdrong hơdrin găn hloh tơnap tap đơ̆ng kon pơlei đơ̆ng rŏng kơ đei jơnei. Tơ̆ Anih Pơdah tơmam drăm so dêh char Gia Lai, Tơdrong pơdah hơnăn “Gia Lai 50 sơnăm tơ-iung pơjing păng hơtŏk” tơbang 3 tơdrong tơm đei: Um ai joh ayŏ Gia Lai; Gia Lai lơ̆m tơdrong tơblah pơrơngei kon pơlei; 50 sơnăm tơ-iung pơjing păng hơtŏk.

Tơdrong pơdah tơbang gah jơhngơ̆m đon juăt jue nuih mơng păng dôm tơdrong jang đei jơnei gah mŭk drăm, joh ayŏ, tơdrong hơrih păng vei sơđơ̆ng tơpôl lơ̆m dêh char, atŭm hăm noh sơkơ̆t hơdah đon lui hăm tơdrong pơgơ̆r đơ̆ng Đảng. Pơtoi kơ noh Tơdrong pơdah “50 sơnăm văn hŏk ngê̆ thuơ̆t dêh char Gia Lai” pơdah đei 80 tak phâm mi thuơ̆t, um rŭp kăp gĭt atŭm hăm 120 tơdrong hơlen chih akŏm gah văn hŏk, ngê̆ thuơ̆t kră sơ̆. Tơdrong akŏm pơdah pơih 'măng đơ̆ng dang ei truh năr 4/5.