‘Nou jĭ mĭnh lơ̆m dôm trong jang tơm ăn kơkuh chơt hơ iă Tơbăt 50 sơnăm Jơnei Buôn Ma Thuột, pơm rơngei dêh char Dak Lăk păng Pơm lêh chehphe Buôn Ma Thuột ‘măng mă 9 sơnăm 2025. Đei pơgơ̆r đơ̆ng dang ei truh năr 15/4 kơnh, Pơdă “Dak Lăk-50 sơnăm tơ iung pơjing păng Atŏk tơ iung” tơƀôh tơbăt hloh 150 nrup hla bơar, tơmam drăm sơ̆ ki hăm 3 tơdrong tơm ‘noh Jơnei Buôn Ma Thuột - Tơdrong hơri nuih mơng Tây Nguyên, Dak Lăk-50 sơnăm tơ iung pơjing păng atŏk tơ iung păng rup hle-rup pơrŏ. Dôm um rup ou tơbăt hơdăh găh chăl sơnăm gĭt kăl, găh tơdrong joh ayŏ kơdŏ soang, tơdrong hơrih sa kơ kon pơlei rim hơdrĕch hơdrung hơrih sa lơ̆m Dak Lăk, dôm tơdrong iŏk đei lơ̆m tơ iung pơjing păng atok tơ iung dêh char đơ̆ng rŏng teh đak rơngei keh kong adoi nhen um rup groi teh, kon bơngai Dak Lăk lơ̆m chăl jang kmăi kmŏk, gơ̆h hơgei.