Tơdrong hơiă tơ̆ âu ‘nŏh jĭ tơdrong tơ̆k tơhnit unh "Byoh so Việt Nam – Tơdrong juăt ‘lơ̆ng hơiă", pôk pơ ư dôm kơjă kăp gĭt đơ̆ng tơdrong hŏk byoh kơ hơdrĕch hơdrung bơ̆n păng roi tơƀôh um rup Gia Lai đơ̆ng rŏng kơ tơmât hơdai. Pơma ƀât jơ pơih blŭng, Kơdră vei lăng kon pơlei dêh char Gia Lai Phạm Anh Tuấn akhan, tơdrong pơlong âu jĭ jơnăr vă dôm bơngai byoh, bơngai hŏk byoh lơ̆m păng ‘ngoăih kơ teh đak tơƀâp, ngôi pơchơt, hơtŏk jơhngâm đon hưch hanh kơ tơdrong hŏk byoh so Việt Nam.

Dêh char Gia Lai vă hơnơ̆ng chĕp vei, tưk tơiung tơdrong hŏk byoh hơdai hăm dôm tơdrong juăt, jŏh ayŏ kơ dŏ xoang, hŏk pơhrăm, tơplŏng kơdâu păng chă tơmang lăng, vang tơgop roi tơƀôh um ai tơring teh "bri kông tơƀưh hăm đak dơsĭ" păng pơtruh nơ̆r tơbăt găh 1 teh đak Việt Nam hưch ‘mêm kơ tơdrong rơngei, ‘mêm kơ tơdrong juăt ‘lơ̆ng đơ̆ng sơ̆, pơih xă tơdrong jang hơdoi hăm bôl boăl lơ̆m apŭng plenh teh.