Khei năr ou ki, tơdrong jang tơbôl chĭn trĭ, jang tơbôl lơ tơdrong pơtoi hơtŏk 'lơ̆ng, roi năr roi tơguăt păng lui ngeh. Ƀar pah tơnăp asong khul kơpal chă hơpeh hơpong dih băl, tơgop sơkơ̆t trong jang tơbôl kơ 2 teh đak. Jang hadoi vei sơđơ̆ng tơpôl kơ 2 teh đak pơtoi đei hơtŏk gah kơsô̆ păng tơdrong 'lơ̆ng. Ƀar pah tơlĕch lơ tơchơ̆t jang hadoi nhen vei lăng tơdrong mơ̆t lĕch găn sơlam teh; chă ƀa trui rôp tơdrong pơm glăi găn sơlam teh.

Jang hadoi mŭk drăm, tĕch pơdro păng asong jang kơ 2 teh đak pơtoi đei tơplih kăp gĭt. Vă pơm trong hiôk ăn anih jang mŭk drăm păng kon pơlei 2 teh đak, 2 pah kĭ pơkăp Hla bar tơbăt gah hơtŏk tơ-iung păng tơroh anih jang tĕch răt tơmam drăm găn sơlam teh Việt Nam-Lào, Tơchơ̆t jang Tĕch răt tơmam drăm Việt Nam-Lào; iŏk jang tơnăp Tơchơ̆t Tĕch răt tơmam drăm găn sơlam teh Việt Nam-Lào. Gơnơm dôm tơdrong hơdrin đơ̆ng 2 pah, tơmam tĕch răt kơ 2 teh đak lơ̆m sơnăm 2024 đei yua truh kơ 2,2 tih đôlar, tŏk 34% pơtêng hăm khei năr ou sơnăm 2023.

Pơtho pơhrăm păng joh ayŏ adoi oei jing dôm tơdrong jang hadoi đei 2 teh đak tơrĕk hloh. Dang ei, đei hloh 14 rơbou hŏk tro Lào hŏk pơhrăm tơ̆ Việt Nam. Ƀar pah tŏk bŏk hăt hot pơm kiơ̆ Tơdrong jang hadoi pơtho pơhrăm Việt Nam-Lào jăl sơnăm 2021-2030 păng Tơchơ̆t gah jang hadoi pơtho pơhrăm Việt Nam-Lào. Atŭm hăm noh, 2 pah hơdrin pơm kiơ̆ Pơkăp jang hadoi joh ayŏ kơdŏ suang păng tơmang pơhiơ̆. Việt Nam tơgŭm Lào pơjing Trong pơm jang hơtŏk tơplong kơdou Lào jăl sơnăm 2023-2030.

Jang hadoi đơ̆ng dôm tơring, mă kăl noh dôm tơring đei atŭm trong sơlam teh, pơtoi đei hơtŏk, roi năr roi kơhret kơjăp, tôm tơdrong, tơgop vei sơđơ̆ng tơpôl tơ̆ dôm tơring sơlam kơ 2 teh đak. Dôm tơdrong đei jơnei kơ Sơnăm Tơguăt tơguăl Tơbôl Việt Nam-Lào 2022 adoi nhen lơ tơdrong akŏm tơbôl dôm sơnăm kơ ou tơgop hơtŏk tơdrong hlôh vao dih băl păng hơtŏk tơdrong tơguăt tơguăl kon pơlei 2 teh đak.

Lơ̆m pơm jang hăm lơ pah, 2 teh đak jang hadoi kơjăp, tơgŭm dih băl lơ̆m dôm tơdrong hop akŏm lơ̆m tơring păng apŭng plenh teh, mă hăt noh lơ̆m Tơchơ̆t jang kơ dôm teh đak Đông Nam Á (ASEAN), Liên hơp kuôk păng dôm teh đak iơ iĕ lơ̆m tơring.

Ƀar pah pơgơ̆r đei jơnei 'Măng hop akŏm mă 46 kơ Anih jang hadoi jơnŭm pơgơ̆r teh đak gah jang hadoi 2 pah Việt Nam-Lào păng Tơdrong akŏm kơpal kơ Đảng Cộng sản Việt Nam păng Đảng Kon pơlei Kăch mang Lào. Kiơ̆ pơkăp sơkơ̆t hơdah tơdrong jang đei jơnei, 2 pah drơ̆ng nơ̆r dôm tơchơ̆t jang hadoi lơ̆m khei năr truh.  

Tơdrong jang tơbôl kăp gĭt hŭi kơ đei Việt Nam-Lào tŏk bŏk đei pơtoi hơtŏk kiơ̆ tơchơ̆t hơtŭm kơ 2 tehd dak, hăm pơkăp apŭng plenh teh hlăng 'lơ̆ng, 'nhăk kăch mang 2 teh đak găn hloh dôm tơdrong tơnap tap hrat hrĭn.  

Việt Nam păng Lào gô pơtoi hơtŏk păng kơhret hloh dơ̆ng tơdrong jang tơbôl, tơguăt tơguăl, jang hadoi tôm tơdrong, kơyuơ tơdrong pơyua kăp gĭt kơ kon pơlei 2 teh đak, kơyuơ tơdrong rơngei, jang hadoi păng hơtŏk tơ-iung tơ̆ tơring păng lơ̆m apŭng plenh teh.