Tơ̆ tơpăh dơnâu đak Mỹ Lâm, xăh Hòa Thịnh, mưh tơ̆ drơ̆m kơsơ̆ năr drou rim giĕng, đe reh kơtar hơdai hăm dôm ƀơ̆r hơri hiôk đei re jơva... hơdai hăm sem asi, kial tơhlu... Tơ̆ âu ưh đei cham joh ayŏ hăm unh kơ đeng hơdăh 'lơ̆ng. Tơ̆ âu đei mĭnh kơmâu jơk tôch kơ ‘lơ̆ng đơ̆ng ‘nhĕt ‘long kŭm hăm dôm bơngai rơhâu hơlăng nhen kơdih pơlei pơla Hoà Thịnh. Tơ̆ âu, hơri hơsoang đei pơm đei kơdih dôm kon pơlei hưch hanh hơ tôn reh, joh hơri, păng ‘măn kơ dih jơ năr, tơdrong gơh đơ̆ng kơdih pơvih pơvăn ăn tơpôl. Păng iŏk đơ̆ng noh, hơnih âu hloii jing hơnih pơkă đơ̆ng lơ bơngai. Bơ̆n vang mơ̆ng băt đơ̆ng kon pơlei kơtă tơ̆ tơring păng tơmoi truh tơ̆ âu chă lăng:

"Ưh kơ ê, hơtŏk tơiung dêh! Hơnih tơ̆ âu ‘lơ̆ng, ‘lơ̆ng dêh! Ƀôh thoi âu chơt hai trŏ lăp hai”.

"Kon pơlei chhôk ‘nă dêh. Sư pơm đei 1 hơnih ngôi pơchơt vă kơ kon pơlei gơh truh lăng mưh tơ̆ kơsơ̆ năr drou, tôch kơ hơiă. ‘Noh jĭ 1 tơdrong hơiă.

Trong jang hmă mă lei tŏk bŏk pơjing đei minh trong jang 'nao ăn tơdrong hơrih joh ayŏ tơ̆ tơring Hoà Thịnh – anih hlôi hơtŏk pran kơtang đơ̆ng rŏng kơ 'mi kial đak lơ̆p pơrăm khei 11 sơnăm sơ̆. 'Nhŏng Nguyễn Hữu Đồng, minh 'nu bơngai kon kơ pơlei pơla Hoà Thịnh, minh 'nu bơngai jang tơgŭm pơtho dôm khul jang 'mêm mơnat tơgŭm kon pơlei hơmet pơ 'lơ̆ng đơ̆ng rŏng kơ 'mi kial đak lơ̆p pơrăm. Păng dôm năr âu, 'nhŏng hơnơ̆ng đei măt tơ̆ dôm 'măng tơƀơ̆p Mỹ Lâm vă hơri dôm ƀai hơri 'meh vă ăn kon pơlei, bôl boăl sư mơ̆ng. Hăm 'nhŏng đei vang jang 'noh jĭ tơdrong chơt hơ iă, hiôk chơt.

"Inh kŭm nhen dôm 'nhŏng oh juăt tă kơ tơgŭm tơdrong jang âu ngăl. Đơ̆ng rŏng kơ kơdră chĕp kơ̆l bơ̆jang kiơ̆ dôm tơdrong ‘nâu, inh ƀôh pơlei pơla nhôn jing ‘lơ̆ng hloh; kon pơlei đei tơdrong jang xa, tơdrong arih xa jơhngơ̆m đon kŭm 'lơ̆ng hloh."

Hloh 4 giĕng pơgơ̆r, tơdrong jŏh hơri hơsoang lơ̆m tơpôl tơƀơ̆p Mỹ Lâm ling lang đei măt mĭnh 'nu bơ ngai reh 70 sơnăm mă hơnglâu reh tôch hơƀĕch- ƀok Phạm Duy Binh tơ̆ phường Tuy Hòa. Năr drou rim giĕng ƀok đơ̆ng Tuy Hòa yak dôm jĭt km vă truh tơ̆ Hòa Thịnh vang pơvih ăn bơngai 'mĕh mơ̆ng hơri hơsoang hăm đĭ jơ hngơ̆m đon. Ƀok Binh tơroi:

"Ƀơ̆t iŏk đei nơ̆r tơroi Hòa Thịnh pơgơ̆r akŏm joh ayŏ kơdŏ soang dơnâu Mỹ Lâm, inh – mĭnh 'nu bơngai gơh reh kơtar păng gơh hơri - ƀôh tơdrong jang ‘nâu tôch kơ hlĭch. Nhôn khŏm jang đĭ jơhngơ̆m đơ̆ng kơdih. Inh ƀôh tơdrong ‘noh tôch kơ gĭt”.

Hơdai hăm tơƀơ̆p Mỹ Lâm, dôm măng joh hơri oei đei pơgơ̆r tơ̆ minh ƀar hơnih lơ̆m jăl trong năm klĕch lơ chŭn na ƀa đak. Tơdrong ‘nâu đei măt đơ̆ng dôm bơngai jang tơgŭm oei mơlôh hơpơi meh pơih să tơdrong joh ayŏ kơ dŏ soang ăn kon pơlei tơ̆ tơring Hoà Thịnh. Tơdrong pơgơ̆r joh hơri tơpôl âu yoa ƀok Phương Văn Lành, Ƀĭ thư Đảng xăh Hoà Thịnh tơlĕch păng đei pơgơ̆r kiơ̆ lơ̆m jơhngơ̆m đon ‘mĕh vă đơ̆ng kơ dih. Ưh đei tĕch vĕ păng đei pơgơ̆r ƀât kơsơ̆ năr 6 rim giĕng. Bơngai gơ̆h reh đơn truh reh đơn. Bơngai gơ̆h hơri truh hơri pơchơt. Păng bu 'meh tơroi găh tơdrong đak lip kŭm gơ̆h truh tơroi ‘năi. Ƀok Phương Văn Lành, ăn tơbăt, đơ̆ng rŏng mĭnh khei 'năr pơgơ̆r, tơdrong hơri hơxoang "Tơƀơ̆p Mỹ Lâm", pơjing đei tơdrong hơiă tôch pha:

"Tơdrong iŏk đei blŭng a đơ̆ng nhôn pơgơ̆r âu ki ‘nŏh sơng đei lơ tơmoi chă tơmang lăng lơ̆m păng 'nguaih kơ tơring truh, ƀơ̆t lăp bơngai đơ̆ng dêh char vang truh tơ̆ âu, ngôi pơchơt hăm kon pơlei tơ̆ tơring. 'Nâu jĭ mĭnh trong jang tôch kơ 'lơ̆ng vă nhôn roi tơƀôh um rup pơlei pơla truh hăm bôl boăl păng tơmoi lơ̆m, 'nguaih kơ xăh kŭm nhen lơ̆m păng 'nguaih kơ dêh char."

Đơ̆ng dơnâu Mỹ Lâm, truh tơ̆ bri ‘long trơ̆p Bầu Đá, đơ̆ng Plei Sen truh tơ̆ Suối Lạnh păng jô̆ hloi dôm chŭn na ƀa đak năm truh tơ̆ dôm pơlei pơla hiôk sơđơ̆ng, ‘lơ̆ng hơiă… pơjing đei um rup pơlei pơla Hòa Thịnh rơgoh 'lơ̆ng, roi đunh roi sơng đei lơ bơngai chă tơmang lăng truh hơlen năng.