Lui ngeh pơdah tôn dôm ƀai chêng ăn tơmoi, đang kơ 'noh kuay phim, chŭp um dôm tơdrong akŏm joh ayŏ păng tơroi tơbang lơ̆m mạng tơpôl, Y Justin Adrơng, tơ̆ pơlei Kmrơng Prong A, xah Ea Tu, pơlei tơm Buôn Ma Thuột, chơt hơ-iă. Y Justin ăn tơbăt: “Inh đei pơhrăm gah tôn chĭng chêng, păng chă pơhrăm chŭp phĭn rup, kuay phim vă tơbang gah chĭng chêng, pơyua ăn kơdih inh păng ăn kon pơlei kon kông tơ̆ Tây Nguyên đei oei lơ̆m cham char joh ayŏ chĭng chêng âu. Đei um rŭp dah mă tơdrong hlôh vao vă kuay phim, chŭp um, păng iŏk um noh, video noh vă bơ̆n răk 'măn păng asong truh hăm rim bơngai”.

Iŏk yua um rŭp vă tơroi gah joh ayŏ kon pơlei, đe oei krao noh Photo Voice, jĭ minh lơ̆m dôm tơdrong đei Anih tơm Mŭk drăm Joh ayŏ, lơ̆m Anih tơm Joh ayŏ, Tơplŏng kơdâu păng Tơmang pơhiơ̆ tơlĕch jang tơ̆ Đăk Lăk đơ̆ng hơtuch sơnăm 2024 kiơ̆ tơdrong jang tơroh mŭk drăm “Cham char joh ayŏ chĭng chêng Tây Nguyên lơ̆m tơdrong jang tơmang pơhiơ̆ Buôn Ma Thuột – Đăk Lăk”. Atŭm hăm noh, bơngai hŏk đei tơrĕk hăm dôm tơdrong kăp gĭt gah tôn chĭng chêng, đơ̆ng pơtơm truh hơtŏk, hơmet dôm tơdrong tam mă trŏ lơ̆m tôn chĭng chêng, hơlen băt gah minh ƀar ƀai chêng kră sơ̆ kơ bơngai Êđê,… Ƀok Y Bây Kbuôr, oei tơ̆ pơlei Kmrơng Prong A, xah Ea Tu, pơlei tơm Buôn Ma Thuột ăn tơbăt: “Hơdrol ki 'noh dôm ƀai chêng kơ bơngai ÊĐê ưh đei pơhăm tơnăp nhen 'măng mă âu. Kiơ̆ đơ̆ng dôm lăm pơhrăm noh kơdih inh tơpă ƀôh đe mơlôh tơnăp hloh gah tơdrong kăp gĭt gah chĭng chêng kơ bơngai Tây Nguyên, adoi băt păng pơhrăm dôm ƀai chêng mă mih ma yă ƀok pơsư̆ ăn”.

Tơdrong tơroh mŭk drăm joh ayŏ chĭng chêng lơ̆m tơdrong jang tơmang pơhiơ̆ jĭ tơdrong jang pơkăp lơ̆m Tơchơ̆t jang 6, lơ̆m tơchơ̆t jang kơ teh đak gah hơtŏk mŭk drăm, tơpôl tơring kon kông păng groi kông, jăl sơnăm 2021-2030. Tơ̆ Đăk Lăk, tơdrong âu đei pơm jang tơ̆ dôm pơlei lơ̆m xah Ea Tu, pơlei tơm Buôn Ma Thuột.

Đơ̆ng rŏng 1 khei tơlĕch jang, hlôi đei 60 video, hloh 100 um rŭp kơyuơ kon pơlei kơdih pơm jang, jĭ dôm tơdrong đei tơroi hăm um rŭp tơguăt tơjê̆. Ƀok Lại Đức Đại, Phŏ Kơdră Anih Joh ayŏ, Tơplŏng kơdâu păng Tơmang pơhiơ̆ dêh char Đăk Lăk akhan, trong jang 'nao hlôi đei jơnei kăp gĭt hăm tơdrong vei răk tơƀăk mong kơjă mŭk drăm joh ayŏ chĭng chêng Tây Nguyên, hơyak jing jơhngơ̆m pran ăn tơdrong jang tơmang pơhiơ̆ pơlei pơla:  “Pơtoi jang đei jơnei trong pơm jang 'măng mă âu, atŭm hăm tơdrong tơgŭm đơ̆ng Anih tơm Mŭk drăm joh ayŏ, lơ̆m Anih tơm Joh ayŏ, Tơplŏng kơdâu păng Tơmang pơhiơ̆, lơ̆m sơnăm 2025, Anih jang gô pơgơ̆r dôm anih juăt jang, rim tơring chih măt pơtoi pơm kiơ̆ dôm trong tơlĕch jang tơ̆ tơring nai lơ̆m dêh char Đăk Lăk. Gô đei tơdrong vang jang kơjăp hloh, tơlĕch lơ trong jang atŭm minh 'măng, dôm lăm pơhrăm gơh chă pơtoi atŭm băl hăm tơdrong vang jang đơ̆ng rim bơngai juăt jang, đe ngê̆ nhơ̆n”.

Atŭm hăm Đăk Lăk, dôm lăm pơhrăm adoi đei pơgơ̆r tơ̆ dôm dêh char Gia Lai, Kon Tum păng Tây Ninh, 'măn ăn kon pơlei kon kông. Tơdrong pơtho kơyuơ đe ngê̆ nhơ̆n hlôh vao kloh klĕch păng đei kon pơlei lui yom lơ̆m pơlei akŏm pơtho pơhrăm rim kih thuơ̆t pơdreh tơdra. Kiơ̆ Tiến sĩ Nguyễn Thị Thu Trang, Kơdră Anih vei lăng mŭk drăm joh ayŏ lơ̆m Anih tơm Mŭk drăm Joh ayŏ, ah đei pơhrăm dơ̆ng noh kon pơlei gô akŏm đei lơ tơdrong băt vao lơ̆m iŏk yua mŭk drăm joh ayŏ vă pơm trong jang, hơtŏk pơlei pơla, vei răk tơƀăk mong mŭk drăm joh ayŏ so:  “Tơdrong tơguăt đơ̆ng dôm pơlei pơla đei atŭm mŭk drăm joh ayŏ vă lơ lăi băl, tơdrong tơroh đơ̆ng dôm jơhnơr bơngai lơ̆m atŭm minh pơlei păng nhôn pơtho ăn kon pơlei băt trong yua Photo Voice noh kon pơlei kơdih pơre nơ̆r pơma po kơdih, tơroi dôm tơdrong joh ayŏ kơdih po. Hloh kơ đe nai, kơdih po kon pơlei  ÊĐê gô tơroi dôm tơdrong tơroi 'lơ̆ng tơpă, ƀlep nhen um ai joh ayŏ kơ kon pơlei po, kơdih pơtoi vei răk păng iŏk yua um ai joh ayŏ kon kông po kơdih”.

Ưh hơdrô̆ kơchăng tơdrong vei răk tơƀăk mong kơjă mŭk drăm joh ayŏ chĭng chêng Tây Nguyên – mŭk drăm kăp gĭt kơ kon bơngai, tơdrong tơroh mŭk drăm joh ayŏ lơ̆m tơdrong jang tơmang pơhiơ̆ oei tơgop pơjing đei tơdrong hơrih joh ayŏ chĭng chêng lơ̆m tơdrong hơrih 'nao hrei ou. Iŏk yua dôm tơdrong hiôk gah kơmăi kơmŏk păng mạng tơpôl, rim bơngai gơh chă akŏm, tơroh păng pơjing đei dôm um rŭp tơpă gah tơdrong hơrih kơ pơlei pơla po, đơ̆ng noh tơgop pơm jang tơnăp hloh tơdrong vei răk dôm khôi juăt 'lơ̆ng kơ rim hơdrung bơngai kon kông.