- Hmach kơ ih ƀok Buk ah năr 30 têt, sơng sơnăm 'nao Ất Tỵ. Đei băt, ih jĭ minh lơ̆m tŏ sĕt bơngai dang ei oei răk vei tơdrong jang juăt jue đơ̆ng yă ƀok pơsư̆ ăn noh jĭ tơdrong tanh brong jak, ih chă tơroi lăng bu hlôi pơtho pơhrăm tơdrong jang âu ăn kơ ih hŏ ƀok?

- Ƀok Buk: "Hơdrol ki, ƀă inh pơtho ăn kơ inh băt gah tanh brong jak. Ƀơ̆t blŭng inh ưh kơ băt chă tanh ôh, nhen tanh hơkă mă blŭng noh athei tanh không hơkâu, đang kơ noh pơtơm tanh pơkeh minh pôm hơkă. Đơ̆ng mă ƀă inh hiong hơchăng noh inh adoi oei ƀlŏk tôm tơdrong mă sư pơtho tanh dôm kơluăi hơkă, đơ̆ng tanh hơkă, jop, reo 'nâu nai 'măn yua lơ̆m unh hnam păng tĕch ăn kơ đe 'măn yua. Truh khei năr âu inh adoi oei vei răk tơdrong jang tanh brong jak mă ƀă inh pơtho pơsư̆ ăn kơ inh"

- Kiơ̆ kơ ih noh tơdrong tanh hơkă, athei tơrĕk truh tơdrong kiơ vă gơh tanh đei minh pôm hơkă 'lơ̆ng?

- Ƀok Buk: "Ah mă tanh hơkă noh athei kơchăng gah không hăp, hơkă iĕ dah mă tih thoi ăi ngăl, mưh gơ̆ păng văr hơtŏ không noh hơkă tanh đei layơ adoi 'lơ̆ng, kơjăp, mă âu jĭ tơdrong tơnap kơ pơm păng hiong jơ năr, mă lei rim bơngai tang brong jak ayơ adoi athei băt hơdah tơdrong mă âu noh hơkă tanh đei gơh 'lơ̆ng rŏ"

- Vă vei răk tơƀăk mong tơdrong jang juăt jue âu noh inh 'meh pơtruh yă kiơ hăm đe mơlôh chă pơdjoi tơdrong juăt jue, vei răk tơƀăk mong kơjă joh ayŏ kăp gĭt kơ hơdrung kon kông po?

- Ƀok Buk: "Tơdrong jang tanh brong jak hrei âu hŭi kơ đei bơngai jang, hăp nhen kơ minh tơdrong pơhlai đĕch, atăm dơ̆ng đe kon sou hrei ou hăt hot chă jang xa, noh đe sư ưh đei tơrĕk truh tơdrong tanh brong jak. Mă lei, mưh kôn mon kon sou 'meh pơhrăm vă vei răk tơdrong jang juăt jue âu, inh adoi kơchăng chă pơtho ăn kơ đe sư thoi nhen ƀă inh sơ̆ mơ̆n"

- Ŏ ah, bơnê kơ ƀok hlôi asong jơ pơma dơnuh ou. Sơnăm 'nao, thơ thâu kơ Ih grăng pran, pơtoi vei răk păng pơdjoi tơdrong jang juăt jue âu ăn đe kon sou mơlôh.