Sơnăm 1975, đơ̆ng rŏng Tơring pơbăh rơngei, teh đak rơngei keh kong, ŭnh hnam ƀok Đặng Kháng jei nhen kon pơlei bơngai Chăm oei tơ̆ tơring Bắc Bình hơrih sa gơnang jang mir. Kơ yuơ lơ loh ‘long pơtăm, rong kon tơrong jei iŏk đei ưh kơ jăp, găh lơ ŭnh hnam chă jang sa jĭ lăp pơnhŏ ăn sŏng sa kơ ŭnh hnam, tim mă tơchĕng truh tơdrong chă tĕch mơdro.

Jĭ bơngai hlôi jing ƀô̆ đô̆i Ƀok Hô, lăp đơ̆ng rŏng brŏk vih hơrih sa tơ̆ pơlei pơla, mă đơ̆ng tơdrong hơrih sa tơƀơ̆p ưh kơbăt dôm yơ tơdrong mơmat tat, mă lei đe sư jĭ dôm bơngai pơm jŭk yŭk trong hơlou lơ̆m choh jang sa, vă kĕ đei tơdrong hơrih sa sơđơ̆ng.

Đei mơ̆t lơ̆m Khul ƀô̆ đô̆i so, ‘moi kiơ̆ rim ‘măng hop akom khul păng rim hơnih, ƀok Đặng Kháng đei mơ̆ng tơroi tơbăt trong bơ̆ jang đơ̆ng Đảng, Teh đak găh tơdrong jang atŏk tơ iung mŭk drăm-tơpôl, mă kăl đei năm tơmang lăng lơ hơnih jang sa kơ rim bơngai lơ̆m khul atok tơ iung mŭk drăm ŭnh hnam, tơgŭm dih băl xut xa dơnuh hin, hơdrin iung pơm pơdrŏng.

Ƀok Kháng tơchơ̆t jang kiơ̆ rong pơbe, rơmo atŭm hăm pơtăm hloh 1.000 dơnơm plei guga. ‘Măng blŭng kơ yuơ tim mă đei kon jên tơmơ̆t jang kơna ŭnh hnam lăp răt mĭnh ƀar tŏ pơbe yŏng păng pơbe bŏng. Đơ̆ng rŏng minh khei ‘năr gơnơm chă rong pơnam, vei lăng ‘lơ̆ng kơna đơ̆ng mă mĭnh ƀar tŏ pơbe roi đunh pơbe roi lơ, truh dôm jĭt tŏ, lơ̆m mĭnh sơnăm ŭnh hnam ƀok Kháng jang sa iŏk đei truh 100 triu hlak jên đơ̆ng tĕch pơbe, rơmo. Ƀok Đặng Kháng tơroi tơbăt, tơdrong hơrih sa kơ ŭnh hnam ƀok hlôi yak hloh tơdrong pơngot rơvĕt, tơgĕch chă sa kơ ‘năr nhen dôm sơnăm sơ̆ bơih.“Lăp đơ̆ng rŏng teh đak rơngei, ba mơ̆t pơm ƀô̆ đô̆i 2 sơnăm, truh sơnăm 1976 ‘noh brŏk, khul kơdră tơring rơih iŏk ba mơ̆t lơ̆m Khul ƀô̆ đô̆i so đơ̆ng sơnăm 2004, khei năr ou, ŭnh hnam ba hơrih sa tôch mơmat tat, mă lei gơnơm đei mơ̆t lơ̆m khul ƀô̆ đô̆i so, đei khul tơgŭm djru ăn tŏk iŏk jên, đơ̆ng noh ba pơtăm ‘long plei guga, răt mĭnh ƀar tŏ rơmo, bơnê chă rong. Đơ̆ng mă atŏk tơ iung choh jang sa, rong kon tơrong, tơdrong hơrih sa kơ ŭnh hnam roi năr roi sơđơ̆ng.”

Ƀok Đặng Kháng sơkơ̆t hơdăh, kơdih ƀok hăm ŭnh hnam đei đăi nhen dang ei ‘noh gơnơm tơdrong hơdrin đơ̆ng ŭnh hnam, mă lei jei kăl tơroi truh trong bơ̆ jang tơgŭm djru đơ̆ng Đảng păng Teh đak  păng mă kăl ‘noh tơdrong tơgŭm djru, pơtho phăl hơlăng đơ̆ng Khul ƀô̆ đô̆i so.

Ƀok Nguyễn Bảo Quốc, Kơdră chĕp pơgơ̆r Khul ƀô̆ đô̆i so tơring Bắc Bình, dêh char Lâm Đồng tơbăt, đơ̆ng rŏng hơgrop, Khul ƀô̆ đô̆i so tơring Bắc Bình, dêh char Lâm Đồng găh lơ đei kon pơlei rim hơdrung kon kông hơrih sa hrou hrăo dih băl. ‘Ngoăih tơdrong lăng ba đơ̆ng Khul ƀô̆ đô̆i so dêh char, atŭm hăm rim trong bơ̆ jang tơgŭm djru đơ̆ng Đảng, Teh đak, ‘moi kiơ̆ rim tơdrong jang mŭk drăm khul ƀô̆ đô̆i so vang lăng ba, dôm bơngai lơ̆m khul ƀô̆ đô̆i so tơring Bắc Bình hơdrin yak hloh tơnap tap vă atŏk tơ iung mŭk drăm ŭnh hnam đei hơrih sa phĭ tơto dơnŏ ‘lơ̆ng.“Ƀok Đặng Kháng đơ̆ng mĭnh ŭnh hnam tơnap tap, lăp đơ̆ng rŏng mơ̆t lơ̆m khul ƀô̆ đô̆i so, jang kiơ̆ ‘lơ̆ng jơhngơ̆m đon ‘lơ̆ng ƀô̆ đô̆i Ƀok Hô, gơnơm tơdrong lăng ba đơ̆ng Đảng, Teh đak đei gơh chă tŏk iŏk jên đơ̆ng Hơnih mong jên Tơgŭm djru Tơpôl păng Hơnih mong jên choh jang sa păng atŏk tơ iung tơring tơrang, pơ̆n chă tŏk iŏk kon jên ‘noh kơna ƀok Kháng hlôi atŏk tơ iung mŭk drăm ŭnh hnam, pơtăm hloh 1.000 dơnơm ‘long plei guga, rong rơmo, pơbe vă đei jing ŭnh hnam đei ƀôh tơ̆ tơring.”

Ưh khan lăp hơdrin pơm pơdrŏng ăn kơ dih, mă lei ƀô̆ đô̆i so Đặng Kháng oei hơdrin chă pơrô̆ pơrôp, pơtho ăn kon pơlei kơ dih vang hơdrin jang sa, vă kĕ veh ver tơdrong gơnang lơ̆m tơdrong tơgŭm djru đơ̆ng Teh đak. Tơdrong hơdrin yak hloh tơnap tap đơ̆ng Ƀô̆ đô̆i so Đặng Kháng hlôi tơƀôh hơdăh jơhngơ̆m đon hơdrin đĭ ai đơ̆ng bơngai ƀô̆ đô̆i Ƀok Hô.