Sơnăm 2007 ‘nhŏng Lê Văn Thuận, tơ̆ thôn 7, xăh Hàm Thuận, dêh char Lâm Đồng, pơtăm 100 tơnơm ‘long gao. Ƀôh ‘long gao blŭh jing ‘lơ̆ng tơ̆ tơring teh chuơh, truh sơnăm 2010 ‘nhŏng pơtăm dơ̆ng truh 400 tơnơm, lơ̆m teh xă hlŏh 1,7ha. Đơ̆ng rŏng 2 sơnăm pơtăm ‘nŏh gao lĕch pơkao, đei plei păng truh sơnăm mă 3 gao đei plei sơđơ̆ng bơih. Sơnăm 2015, ƀôh pơgar ‘long rơhơi ‘lơ̆ng, ưh gan đei ‘ngiĕt chăt, tôch lăp hăm tơdrong rong dơ̆ng iĕr bip, ‘nhŏng Thuận răt lư̆i B40 var jŭm dăr, pơm hơdrong, atŭm hăm ‘nŏh răt iĕ hmă tăh rong hơla ‘long gao.

Khei ‘năr blŭng a ‘nhŏng lăp rong 1 ‘măng 2,3 hrĕng tŏ đĕch. Kiơ̆ đơ̆ng dôm ‘măng rong ƀôh đei yoa, 'nhŏng răt kơmăy pơ 'nâm kơtăp iĕr vă rong yŏng kơdih. Kiơ̆ kơ 'nŏh, kơsô̆ iĕr roi đunh roi lơ tŏk kiơ̆ sơnăm, truh sơnăm 2018 'nŏh 'nhŏng rong sơđơ̆ng dang 3.700 tŏ, hơnơ̆ng truh dang ei hloi.  'Nhŏng Lê Văn Thuận ăn tơbăt, gơnơm rong 'lơ̆ng, trong pơtăm gao hơdai hăm rong iĕr đơ̆ng 'nhŏng hlôi hơnhăk ba iŏk yoa kơjăp: “Blŭng a unh hnam năng pơtăm gao hơdai hăm rong iĕr ‘nŏh vă hơtŏk thim tơdrong đei yoa ăn unh hnam. Kơlih thoi noh unh hnam adrin rong iĕr mă lơ ƀiơ̆ vă tĕch mơdro sơđơ̆ng ‘lơ̆ng, ‘ngoăih kơ rong iĕr tĕch pơm ‘nhĕm, unh hnam oei pơ ‘nâm kơtăp vă rong yŏng ăn kơdih păng tĕch yŏng ăn mih ma duch nă ‘mĕh răt rong hai.

‘Nhŏng Thuận tơroi vă tang găn jĭ ăn iĕr, bơngai rong athei rong mă trŏ trong, vei lăng iĕr mă ‘lơ̆ng. Tơdrong ƀet pơgang tang găn jĭ ăn iĕr athei jang mă ‘lơ̆ng, mưh ƀôh iĕr nhen đei jĭ ‘nŏh jăh năm răt pơgang hơmet hloi. ‘Ngoăih kơ tĕch iĕr pơm ‘nhĕm, ‘nhŏng Thuận oei rong yŏng tĕch tơ̆ ‘ngoăih hăm yă 17.000 hlak 1 pôm iĕr kon, 1 khei ‘nhŏng tĕch đei đơ̆ng 2.700 - 3.000 tŏ. Akŏm đĭ đăng iŏk yoa đơ̆ng rong iĕr kơ unh hnam ‘nhŏng 1 sơnăm hlŏh 1,5 ti, trư tôm jên jang oei rơkăh hlŏh 450 triu hlak jên.

Ƀok Nguyễn Quốc Tuấn, bơngai tang măt ăn Khul kon pơlei jang chŭn mir xăh Hàm Thuận, dêh char Lâm Đồng ăn tơbăt, ‘nhŏng Lê Văn Thuận pơ̆n tơchĕng, pơ̆n jang, băt trong jang xa, iŏk yoa tơring teh đei lơ tơdrong ‘lơ̆ng đơ̆ng teh chuơh tơ̆ plei kơdih: "Đơ̆ng tơring teh phang pơđang, klo kăn ‘nhŏng Thuận adrin jang xa, pơjing iŏk yoa ăn unh hnam. Lơ̆m dôm sơnăm âu ki, trong jang pơtăm gao hơdai hăm rong iĕr đơ̆ng unh hnam ‘nhŏng Thuận hơnhăk ăn đei yoa tôch lơ. ‘Nâu jĭ 1 lơ̆m dôm trong jang xa rơgei tơ̆ tơring păng gô đei pơih xă tơ̆ hơnăp kơnh, vang tơgop pơm hơtŏk iŏk yoa ăn kon pơlei jang chŭn mir tơ̆ tơring."

Hăm tơdrong đei yoa lơ găh mŭk drăm, dang ei trong jang pơtăm gao hơdai hăm rong iĕr đơ̆ng ‘nhŏng Thuận tŏk bŏk đei lơ bơngai hŏk rok, jang kiơ̆. ‘Nhŏng Lê Văn Thuận kŭm jing 1 lơ̆m dôm unh hnam năm hơdrol lơ̆m tơdrong pơtăm ‘long gao kơpal teh hrâu hăm chuơh tơ̆ thôn 7, xăh Hàm Thuận, dêh char Lâm Đồng, pơih đei trong jang tŏk mŭk drăm kơjăp ‘lơ̆ng, vang tơgop pơm pơdrŏng ăn unh hnam păng tơpôl.