Tơ̆ Anih chă tơmang lăng tơpôl plei Ako Dhông, phường Buôn Ma Thuột, tơdrong tôn chĭng chêng kŭm hăm dôm ƀai hơri hơxoang sơng đei lơ tơmoi truh lăng lơ̆m dôm năr blŭng sơnăm ‘nao. Mŏ Freya, truh đơ̆ng teh đak Mi, ăn tơbăt, cham char rơgŏh ‘lơ̆ng, ‘năr rŏ tŏ hơlăng kŭm hăm ƀĕnh jơhngâm đon băt ‘mêm tơmoi đơ̆ng kon pơlei păng tơdrong juăt, jŏh ayŏ kơ dŏ xoang tơ̆ tơring jĭ dôm tơdrong tôch hơiă hăm rim tơmoi chă tơmang lăng:

“Nhôn đei đe sơng tôch hơiă, chơt dêh mưh truh tơ̆ âu păng năng ƀôh nhen thoi năr et xa ngôi pơchơt hloi, tơdrong ‘nâu nhôn ưh kơ juăt yoa unh hnam nhôn tơ̆ Mi, ‘năr tôch tơngiĕt ƀât blŭng sơnăm ‘nao. Yoa thoi noh, nhôn tôch hơiă mưh đei truh ngôi pơchơt lơ̆m pơyan âu. Tơ̆ Mi, rim bơngai et xa lơ ƀiơ̆, oei tơ̆ âu nhen thoi ngôi hơdai hăm băl păng ngôi pơchơt, et xa hăm hnam tơnŏ lơ ƀiơ̆ kơ bôl boăl, bơngai đơ̆ng nai truh”.

Hăm tơmoi chă tơmang lăng lơ̆m teh đak, Đắk Lắk kŭm jing anih truh ngôi ƀât blŭng sơ tôch hơiă hơdai hăm pơngơ̆h ngôi, tơmang lăng bri ‘long păng chă hơlen năng dôm tơdrong juăt jŏh ayŏ kơ dŏ xoang tơ̆ rim tơring. ‘Nhŏng Nguyễn Ngọc Chân, tơ̆ plt Hồ Chí Minh tơroi, dôm ‘măng chă ngôi thoi âu tơgŭm ăn đe kon ‘nhŏng roi hlôh vao ƀiơ̆ păng đei ƀôh lơ tơdrong ‘lơ̆ng hơiă tơ̆ yăn âu: “Ƀât blŭng sơnăm ‘nao, 2 ‘nu mon đei pơdơ̆h hŏk, kơna unh hnam nhôn truh tơ Buôn Ma Thuột tơring pơtăm cheh phe tơm kơ Việt Nam, ‘mĕh bre mon chă hơlen năng tơdrong juăt, băt truh dôm tơdrong joh ayŏ kơ dŏ xoang tơ̆ tơring kŭm nhen tơring teh tơ̆ âu, bre mon băt tơring Tây Nguyên jĭ tơring thoi yơ”.

Lơ̆m anih anâm kơ bơngai Rađe, tơdrong xa ngôi tơmam, năng đe tôn chĭng, hơri hơxoang păng pơma nuh hăm đe ngê̆ nhơ̆n pơm ăn tơmoi chă tơmang lăng čhôk ‘nă, ƀlŏk hơnơ̆ng. Đơ̆ng dôm kơjă kăp gĭt ‘nŏh, kon pơlei tơ̆ rim pơlei pơla dar dĕh tưk tơiung tơdrong chă tơmang lăng lơ̆m tơpôl ‘moi kiơ̆ dôm tơdrong joh ayŏ kơ dŏ xoang lơ̆m tơpôl.

Kiơ̆ ƀok Y Nuel Niê, kră pơlei plei Ako Dhông, dôm sơnăm tơjê̆ âu, chă tơmang lăng lơ̆m tơpôl đei kon pơlei tôch tơrek tơlĕch jên bơ̆ jang, pơjing đei lơ anih ‘lơ̆ng rŏ hơdai hăm dôm tơdrong juăt, jŏh ayŏ kơ dŏ xoang đơ̆ng sơ̆. Lơ̆m sơnăm ‘nao, Khul vei lăng tơdrong chă tơmang lăng tơpôl tơ̆ pơlei tơlĕch dơ̆ng lơ tơmam păng tơdrong ngôi pơchơt vă hơtŏk tơdrong pơvih ăn tơmoi: “Dôm tơmam, mă loi jĭ tơmam xa roi lơ ƀiơ̆ pơting hăm sơnăm 2025, dôm trong jang nai găh tôn chĭng chêng, hơri hơxoang kŭm đei tơplih ming roi ‘lơ̆ng ƀiơ̆. Lơ̆m pơlei rim khei đei pơgơ̆r tôn chĭng ăn tơmoi chă tơmang lăng truh mơ̆ng, hơlen năng”.

Hăm dôm anih jang chă tơmang lăng tơ̆ Đắk Lắk, atŏk tơiung chă tơmang lăng tơklep hăm bri kông păng tơdrong joh ayŏ kơ dŏ xoang tơpôl jĭ trong jang tôch sơđơ̆ng. Yă Nguyễn Thị Ngọc Anh, Công ty jang hơdoi chă tơmang lăng tơpôl Ko Tam, phường Tân Lập, ăn tơbăt, chă tơmang lăng tơ̆ bri brăh - tơpôl ưh lăp hơnhăk ba iŏk yoa đĕch, mă oei năm truh tơdrong vei lăng cham char, tưk tơiung đei tơdrong juăt choh jang xa, rong kon tơrong tơ̆ dêh char: “Yoa jĭ anih đei bri brăh, đei jŏh ayŏ kơ dŏ xoang tơpôl kơna nhôn akŏm jơhngâm pơm hơmet ming cham char, hơmet tôm tơmam ‘nhot, ƀum, plei ‘long đơ̆ng rong kon tơrong, rei pơtăm vă pai tơmam xa pơvih ăn kơ đe. Yoa nhôn hơmet ‘lơ̆ng hơdrol păng rong, rei pơtăm kơtă hloi kơna lơ̆m dôm năr lêh têt, yă tĕch nhôn oei vei kơjăp ưh đei tơplih, kŭm ưh đei thu thim jên yă kiơ pơting hăm năr hmă”.

Iŏk yoa ‘lơ̆ng tơdỏng juăt tôn chĭng chêng, joh ayŏ kơ dŏ xoang tơpôl kŭm hăm jơhngâm đon tơpăt ‘lơ̆ng lơ̆m rim tơdrong jang, chă tơmang lăng Đắk Lắk dar deh pơlung đei jơhngâm đon tơmoi chă tơmang lăng. Lơ̆m dôm năr blŭng sơnăm ‘nao, jơva chĭng chêng, tơdrong hơyŭn xoang păng jơhngâm đon tơpăt ‘lơ̆ng, băt ‘mêm tơmoi đơ̆ng mih ma duch nă tơ̆ rim pơlei hlôi jing tơdrong tôch ‘lơ̆ng vă sơng tơmoi truh tơmang lăng tơ̆ tơring.