Pơgê hrôih, jơhngâm đon hưch hanh mưh năm jang hlôi ƀôh tơ̆ dôm pơgar pơtăm ‘nhot lơ̆m hnam kơmĭl, hnam kơlư̆i tơ̆ tơring pơtăm ‘nhot Đơn Dương, dêh char Lâm Đồng. ‘Nhot đei kăt tĕch, pơm hơmet, tăh lơ̆m tơpu tĕch kiơ̆ hla ar răt tơmam; pơkao đei chuĕn truh tơ̆ dôm anih hơmet pơ ‘lơ̆ng.

Ƀok Khắc Bình, kon pơlei tơ̆ xăh D’ran, chơt hơiă tơroi, tơplih ‘nao tơ̆ tơring pơtăm ‘nhot âu truh kŭm hăm tơdrong jang pơjing tơring tơrang ‘nao: “Kon pơlei jang tŏk mŭk drăm kŭm pôm păi mơ̆n. Gơnơm đei tơdrong tơgŭm đơ̆ng teh đak kơna mŭk drăm đei tŏk pran ‘lơ̆ng ƀiơ̆. Tơdrong pơtăm pro kreng, dôm kơloăi ‘nhot, hơmrĕ… dôm kơloăi âu đei pơtăm kiơ̆ tơdrong choh jang xa hăm kơmăy kơmŏk ‘nao. Dang ei pơtơm jang dơ̆ng pơkao. Tơdrong arih xa dang ei tŏk ‘lơ̆ng ƀiơ̆ kơ tơpă bơih, tơdrong arih xa kơ kon pơlei đĭ tơplih ‘nao ‘lơ̆ng bơih”.

Pơjing tơring tơrang ‘nao tơ̆ tơring pơtăm ‘nhot Đơn Dương đei 4 xăh Đơn Dương, Ka Đô, Quảng Lập păng D’ran kơ dêh char Lâm Đồng, tơklep kơjăp hăm tơdrong choh jang xa rơgei. Truh hơtuch sơnăm 2025, ‘nhot păng pơkao pơtăm hăm kơmăy kơmŏk ‘nao iŏk đei dang 95% tĕh choh jang xa; kơjă tơmam đơ̆ng choh jang xa jô̆ păh lăp đei hlŏh 220 triu hlak jên 1ha 1 sơnăm. Dôm xăh âu đĭ tŏk jing tơring tơrang 'nao đei ƀôh, 'lơ̆ng rŏ ngăl bơih.

Kiơ̆ trong jang tŏk atŭm, dôm pơlei pơla kon kông kơtă tơ̆ tơring kŭm tơplih ‘nao hrĕnh ‘lơ̆ng. Ƀok K’Bril, ƀok pơgơ̆r plei Kambute, xăh Đơn Dương ăn tơbăt, tơdrong tơplih ‘nao ưh lăp đei ƀôh lơ̆m tơdỏng choh jang đĕch mă đei hloi lơ̆m đon hlôh vao mưh jang xa păng arih xa kơ kon pơlei: “Dang ei kon pơlei hlôi jang hăm gre choh tih vă jang xa, tơlĕch jên răt hơmet kơmăy, đing pruih đak rơgei, jang kiơ̆ ki thuơ̆t ‘nao roi đunh roi ‘lơ̆ng. Đơ̆ng noh pơm hơtŏk đei tơdrong arih xa kŭm nhen iŏk yoa đơ̆ng jang xa, tơdrong arih roi đunh roi sơđơ̆ng, roi đei ƀôh. Plei Kambute hrei ‘nâu đei lơ hnam 2,3 tơ̆ng, lơ unh hnam răt đei gre ôtô. Đơ̆ng noh, um ai pơlei pơma hơdrô̆, tơring tơrang tơ̆ xăh  pơma atŭm đei tơplih ‘lơ̆ng, tơplih hơnơ̆ng rim năr”.

Lơ̆m khei ‘năr oei hơmet ming anih bơ̆jang vei lăng păng jang kiơ̆ trong jang Khŭl kơdră pơgơ̆r tơring 2 tăl, tơdrong dăr hơlen, chih tơlĕch dơ̆ng tơdrong hơgăt pơjing tơring tơrang ‘nao, đei dôm xăh tơ̆ tơring Đơn Dương năng jĭ hơnăp jang tơm. Kiơ̆ ƀok Trương Quang Kiên, Phŏ Kơdră vei lăng kon pơlei xăh D’ran, tơring tơrang ‘nao tơklep hăm tơlĕch jang kiơ̆ tơdrong Tơchơ̆t 57 găh hơtŏk iŏk yua khoa hŏk kơmăy kơmŏk, tơplih ‘nao - pơcheh rơgei păng tơplih kơmăy sô̆:

“Tơdrong Tơchơ̆t đơ̆ng Hop akŏm Đảng ƀô̆ xăh D’ran jăl jang 2025 – 2030 hlôi tơƀôh trong jang tôch kơ rơđăh. Lơ̆m noh kăl loi jĭ pơjing dôm tơdrong jang vă atŏk tơiung, iŏk yua kơmăy kơmŏk lơ̆m choh jang xa, pơjing dôm hơp tak xăh, grŭp jang hơdoi, pơm tơlĕch dôm tơmam OCOP, đơ̆ng ‘noh hơvơn dôm anih mơdro xa tơmơ̆t jên jang, pơm hnam kơmăy pơm tơmam đơ̆ng choh jang xa đei, hơtŏk iŏk yua ăn kon pơlei”.

Oei hăm xăh Đơn Dương ‘nao – đei pơjing đơ̆ng thĭ trâ̆n Thạch Mỹ, xăh Đạ Ròn păng xăh Tu Tra so - khŭl kơdră pơgơ̆r tơring chih hơdăh trong jang ăn jăl jang đơ̆ng rŏng dơ̆ng. Ƀok Trần Hùng Dũng, Kơdră vei lăng kon pơlei xăh Đơn Dương, ăn tơbăt: “Đơ̆ng rŏng đei dôm tơdrong hơgăt pơjing tơring tơrang ‘nao jăl jang 2026 – 2030 ‘noh xă đei trong jang tôch hơdăh vă hơnơ̆ng pơm hơtŏk iŏk yua, tơdrong arih xa, cham char, pơvei păng atŏk tơiung anih jang kăl, jang xa, tơdrong arih xa... Pơm liơ vă jang đei tơdrong hơgăt ‘noh jĭ pơjing xăh tơring tơrang ‘nao gơ̆h rơgei”.

Đơ̆ng tơring choh jang xa Đơn Dương, dêh char Lâm Đồng ăn ƀôh, tơdrong jang pơjing tơring tơrang ‘nao tŏk bŏk yak truh jăl jang “pơm pơ ‘lơ̆ng”, năm truh tơring tơrang ‘nao rơgei, jang xa tơklep hăm tĕch mơdro păng pơm hơtŏk kơjă tơmam. Dôm tơdrong tơplih ‘lơ̆ng ‘noh ưh lăp pơm tơplih hloi um ai tơring tơrang, pơm hơtŏk tơdrong arih xa kon pơlei đĕch, mă oei vang tơgop jang đei dôm tơdrong hơgăt jang tŏk pran kơjăp mă Đảng hlôi chih tơlĕch.