Dôm năr blŭng sơnăm 2026, tơ̆ anih man Hnam trưng teh đak rong Buôn Đôn (plei Thống Nhất, xăh Buôn Đôn, dêh char Đắk Lắk), dôm jĭt ‘nu công nhân, kỹ sư kŭm hăm kơmăy kơmŏk đơ̆ng anih iŏk jang, klăih song pơm lơ grŭp, kăt bơ̆n pơsei, lŭk bê tông tuh jrăng, tơnăr; kơsô̆ nai ‘nŏh tăh cốt pha, vă tuh bê tông hơnă tơ̆ng 1 ăn hnam hŏk 3 tơ̆ng.

Ƀok Trần Văn Long, Bơngai pơgơ̆r vei lăng ming man ăn tơbăt, dôm anih iok jang oei hơmet tôm bơngai jang, kơmăy kơmŏk vă hơtŏk hrĕnh tơdrong ming man. Dang ei tơdrong jang man hnam trưng đei jang hrĕnh ƀiơ̆ năr hơgăt bơih: “Dang ei, tơ̆ anih man đei 5 anih jang hơdoi oei ăn bơngai jang, 1 anih đei 1 ‘nu bơngai vei lăng, 5 kỹ sư kŭm hăm 40–50 ‘nu công nhân man 5 anih kiơ̆ tơdrong jang đei pơjao. Dôm tơdrong jang đei pơjao oei ming man trŏ hăm năr hơgăt ngăl. Nhôn adrin hơmet pơ ‘lơ̆ng tơdrong pơmat tat đơ̆ng ‘năr tŏ kơnê̆ tơ̆ âu, pơgơ̆r man lơ ka vă gơ̆h man đang hrôih ƀiơ̆, pơjao ăn tơring iŏk yoa.”

Kiơ̆ bơngai tang măt ăn tơ ‘ngla tơmât jên jang, ƀok Võ Văn Lợi, Phŏ Kơdră Anih vei lăng tơdrong jang ming man anih pơyoa ăn kon pơlei păng jang kơmăy kơmŏk dêh char Đắk Lắk (Anih jang B), truh dang ei đĭ đăng dôm hnam trưng teh đak rong tơ̆ tơring sơlam lơ̆m dêh char đei man đang kơmŏng bơih, oei hơmet vă tuh hơnă tơ̆ng 1. Kơsô̆ jên đei tơlĕch hlŏh 32%, hơtŏ hăm dang 120 ti hlak jên, pơm ‘lơ̆ng trŏ khei ‘năr hơgăt. Mât lơ̆m pơyan phang, Anih vei lăng hlôi tơlĕch trong tơgŭm ăn dôm anih jang vă gơ̆h man đang lơ̆m khei 8, jô̆ hloi mă đei tŏ ‘mi kial kơnê̆.

Ƀok Võ Văn Lợi tơroi: “Truh dang ei, anih jang hlôi đei ming man trŏ năr hơgăt. Mă lei yoa pơyan ‘mi kial tơ̆ tơring sơlam Đắk Lắk lơ̆m sơnăm 2026 tơplih ưh ê, nhôn hlôi pơjing kơ trong tơgŭm găh kơmăy kơmŏk, tơmam drăm, khul bơngai jang păng pơgơ̆r jang 3 ka vă jăh jang hrĕnh ƀiơ̆. Kiơ̆ đơ̆ng noh, tơgĕch iŏk yoa dôm năr đei ‘năr rŏ tŏ hơlăng vă ming man.”

Kiơ̆ ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk, đơ̆ng rŏng đei nơ̆r pơtho đơ̆ng anih tơmât jên jang, dôm tơring păng anih iŏk man adrin hơtŏk hrĕnh tơdrong jang, khŏm man đang hrôih ƀiơ̆ vă pơyoa ăn hŏk tro tơ̆ tơring sơlam, atŭm hăm ‘nŏh vă hơiă kŭm nhen hơnhăk tơmât Tơdrong tơchơ̆t đơ̆ng Hop akŏm XIV kơ Đảng lơ̆m tơdrong arih xa.

Ƀok Nguyễn Thiên Văn pơma: “Tơlĕch jang kiơ̆ Tơdrong tơchơ̆t đơ̆ng Hop akŏm mă XIV kơ Đảng ‘nao đei drơ̆ng nơ̆r, tơring vă chih hơdăh trong jang mă lăp hăm rim tơdrong đei tơ̆ yăn âu lơ̆m dêh char, vă pơjing dôm tơdrong tơgŭm mă lăp hăm khul thây kô păng hŏk tro tơ̆ hnam trưng teh đak rong, pơjing tơdrong ‘lơ̆ng hlŏh vă đe thây kô păng hŏk tro hơđơ̆ng jơhngâm pơtho păng hŏk. Kiơ̆ đơ̆ng noh, bơ̆ jang đei đon pơhnŏng pơtho pơhrăm mă ‘lơ̆ng tơ̆ dôm xăh sơlam pơma hơdrô̆ păng lơ̆m dêh char Đắk Lắk pơma atŭm.”

Dôm kơmŏng hnam đei man kơjăp ‘lơ̆ng, lơ jrăng man đei tơiung, vă tơjră pơm hơnă ăn dôm hnam tơ̆ng kơjăp ‘lơ̆ng tơ̆ dôm Hnam trưng teh đak rong tơ̆ tơring sơlam Đắk Lắk. Đơ̆ng sơnăm hŏk 2026 – 2027, tơring âu gô jing anih gơnang kơjăp vă pơtho chư ăn hlŏh 3.000 ‘nu hŏk tro tơ̆ tơring sơlam. Đe hơiŏh tơ̆ tơring sơlam vă adrin hŏk pơhrăm, vă ning mônh kơnh, hăm jơhngâm pran đơ̆ng sơlam mơlôh păng đon rơgei đơ̆ng kơdih, vang tơgop pơjing tơring sơlam Đắk Lắk roi đunh roi sơđơ̆ng ‘lơ̆ng rŏ, jang tŏk pran, pơdrŏng hiôk chơt./.