Kơdơ chŭn na Ia Rbol, dêh char Gia Lai să hloh 30hek tar pơyan ‘nâu ƀa jing ‘lơ̆ng mơ liơk tơ̆ hơnăp kial pơyan tŏ Tây Nguyên. Thong đak đơ̆ng dơnâu đak Ayun Hạ ro pơm tơ jur ƀiơ̆ đơ̆ng tŏ hlơ hlĕng. Yă Nay H’Wer (bơngai Jarai, đa krao ‘noh Yă Bíp) oei tơ̆ plei Rưng Ama Nin, xăh Ia Rbol tơgĕch năm tơ̆ chŭn pơro đak ăn chŭn ƀa, hơdrol kơ pơdơh Tết nguyên đán Bính Ngọ 2026. Yă tơbăt, tơ̆ kơdơ chŭn na âu, ŭnh hnam rei pơtăm vă jê̆ 1,5hek tar, pơyan âu ki iŏk đei dang 12 tấn ƀa.

Jĭ kon pơlei jang sa hơgei kơ dêh char Gia Lai, yă Nay H’Wer tơroi tơdrong hlôh vao choh pơtăm ƀa đak nhen 1 ‘nu bơngai joăt jang: Pơyan ‘nâu, sư iŏk yua hơdrĕch ƀa OM468, yua kơ dă ƀiơ̆ kơ hrông, pơrang jĭ, plei lơ mă găr phe rơmuăn dơ̆ng. Trong pơtăm ƀa ‘lơ̆ng hăm cham char, phŏng rơgoh, ưh kơ yua pơgang hơdrông păng phŏng hoă hŏk. Tơplih yua kơ pruih pơgang ‘nhĕt, yă pơnam năm lăng chŭn, ưh kơ lê̆ chŭn hrơ̆ đak, thoi noh ‘nhĕt gô dă ƀiơ̆ kơ chăt. Gơnang đơ̆ng joăt pơtăm ƀa, yă hlôi rong 5 ‘nu kon hŏk đang, đei tơdrong jang sơđơ̆ng ‘noh pơm thây kô pơtho, kŏng an,  điều dưỡng. Yă Nay H’Wer tơroi:

“Klo ĭnh lôch đĭ 26 sơnăm, mĭnh drô̆ ĭnh hơdrin rong kon. Ĭnh pơnam jang mir, jang roh vă bơngơ̆t ăn kơ đe kon đei năm hŏk hnam trưng ‘nâu hnam trưng to. Pŭn ai ‘noh đe kon tă hơlăng, pơnam kơ hŏk ngăl kơna kŭm sơđơ̆ng jơhngơ̆m jang sa. Truh dang ei, đe kon đĭ đei tơdrong jang sơđơ̆ng, iŏk ŭnh om ngăl bơih. Dang ei ĭnh oei hơdai hăm klo kăn kon hơdruch, lăng ƀôh kon hơ ‘lơ̆p sơđơ̆ng tơdrong hơrih sa, ĭnh chhôk păng hơiă dêh”.

Mă đơ̆ng kon hơ ‘lơ̆p đĭ ‘lŏ jang sa đei ngăl bơih ră, yă Nay H’Wer oei bơngơ̆t hơtŏk tơiung mŭk drăm, păng tơgop jơhngơ̆m pơjing pơlei pơla. Yă hlôi plang song dôm jĭt met teh, koh hŭt lơ kơ loăi ‘long sa plei, pơm hơnih hiôk rơhơi jing trong pơkao lơ̆m pơlei.

Lơ sơnăm tơtil, yă Nay H’Wer iŏk đei hơnăn kon pơlei jang sa hơgei kơdêh char. Yă kŭm đei pôk pơm bơngai tang măt Jơnŭm pơgơ̆r kon pơlei xăh, hơdai ‘noh jĭ Bơngai jang lơ̆m Anih Mặt trận Tổ quốc Việt Nam thĭ xăh Ayun Pa (so). Yă Nay H’Wer hlôi jing gơng “tơƀưh” đơ̆ng Đảng hăm Kon pơlei:

 “Kon pơlei tơ̆ âu đei Đảng păng Teh đak tôch kơ bơngơ̆t truh, tơgŭm tôch kơ ‘lơ̆ng; tơgŭm bơ̆n phe ƀa, kon yŏng nhen rơmo, pơbe vă hơtŏk tơiung mŭk drăm, klĕp truh tơdrong tơgŭm pơm dơ̆ng hnam oei ăn dôm ŭnh hnam oei mơmat tat. Teh đak kŭm bơngơ̆t truh tơmơ̆t jên jang ming man anih jang kăl, tơgŭm pơm trong nơnăm, hơbong thong đak pơyua ăn choh jang sa. Hơdrol sơ̆ lơ̆m pơlei tam mă đei trong ƀê tŏng, năm vih vơ̆t tôch kơ gleh hrat, mă lei dang ei trong pơlei, kueng ƀôt, đei hloi trong năm tơ̆ chŭn tă kơ hlôi đei pơm hăm ƀê tŏng ngăl, tơgŭm kon pơlei hiôk hloh lơ̆m jang sa. Ĭnh bơnê kơ Đảng păng Teh đak hlôi ling lang bơngơ̆t truh, vei lăng tơdrong hơrih sa kon pơlei Jarai.”

Ƀok Nay Pol – Phŏ kơdră Hơnih vei lăng Joh ayŏ – tơpôl xăh Ia Rbol, dêh char Gia Lai tơbăt, tơdrong tôch kơ gĭt tơ̆ yă Nay H’Wer ‘noh jĭ jơhngơ̆m đon drin kơdih yak hloh mơmat tat. Ưh răp gô, pơ ‘mơ̆ng, mă tơplơ̆ dơ̆ng, yă oei hơdrin vang jang tơdrong jang tơpôl, tơgop kŭm hăm kơdră đảng, kơdră tơring tơlĕch jang đei yua tơdrong jang tơgŭm đơ̆ng Đảng păng Teh đak vă pơjing pơlei pơla pơdrŏng ‘lơ̆ng.

“Klo lôch hrôih, mĭnh drô̆ rong pơtho kon hơ ‘lơ̆p, mă lei sư ling lang hơdrin yak hloh mơmat tat, pơnam jang sa, hơtŏk tơiung mŭk drăm, hiơ̆k bơngơ̆t kơ kon hơ ‘lơ̆p hŏk pơhrăm jing bơngai. Yă tơpă jing bơngai ‘lơ̆ng vă kon pơlei lơ̆m pơlei pơla hŏk pơhrăm păng lăng kiơ̆, đei rim bơngai kŭp yom yua kơ jơhngơ̆m đon pơnam, ưh kơ ‘nhoen mơmat, ling lang hơdrin yak tŏk”.

Pơyan puih ma tŏk bŏk vih tơ̆ kơdơ chŭn ƀa Ia Rbol, trong đak Ayun Hạ rong ‘me dôm chŭn na phĭ ƀĕnh kơ găr ƀa. Tŏk bŏk um rup ‘noh, bơngai drŏ kăn Jarai pơnam nhen yă Nay H’Wer ưh khan lăp rei pơtăm ƀa đĕch, mă oei rei lơ̆m pơlei pơla đon lui găh trong jang sa kơjăp, hŏk pơhrăm truh tôch păng hơrih băt ‘mêm hăm tơpôl.