Pơlei tơring tơrang ‘nao Dơ̆k Rơng jĭ mĭnh pơlei ‘lơ̆ng hơiă hlŏh tơƀôh ăn tơdrong tơplih ‘nao tơ̆ tơring kon kông lơ̆m dêh char Gia Lai. Đơ̆ng mĭnh pơlei tơnuh hin hot, pơngot rơvĕt tơ̆ xăh Đak Đoa, truh dang ei, plei Dơ̆k Rơng hlôi đei um ai ‘lơ̆ng rŏ kơ pơlei pơla tơring tơrang ‘nao. Lơ trong bê-tông rơgŏh ‘lơ̆ng hlôi tơplih ăn trong teh ƀrê “tŏ ‘mui ƀruih-‘mi trôk rơbơ̆r”, 2 păh jih trong bê-tông ‘nŏh jĭ hnam man tih ‘lơ̆ng... Tơdrong arih xa găh tơmam drăm păng jơhngâm đon tŏk ‘lơ̆ng.

Ƀok Hmư̆ng, oei tơ̆ plei Dơ̆k Rơng chơt hơiă tơroi: “Dôm sơnăm tơjê̆ âu, kon pơlei băt trong jang xa, tơdrong arih tŏk hrĕnh, tơplih ‘lơ̆ng dêh bơih. Kon pơlei jang ƀa, pơtăm chanh dây, cheh phe...jang xa đei, răt bơ̆n gre, pơm trong rơgŏh ‘lơ̆ng, unh điên kŭm đei đĭ đăng. Dôm unh hnam tơnuh đei teh đak tơgŭm, asong tŏk iŏk jên vă mih ma duch nă jang xa, mât 1 ƀơ̆r đon, pơjing tơdrong arih xa ‘lơ̆ng hơiă...”

Kiơ̆ ƀok pơgơ̆r pơlei, ƀok Amyên, tơdrong arih xa tơ̆ plei Dơ̆k Rơng tơplih ‘lơ̆ng nhen hrei ‘nâu ‘nŏh gơnơm đơ̆ng “kon pơlei băt vei teh, ưh đei tĕch teh, lơ bơngai mong măi kon jên vă răt dơ̆ng teh, pơih xă tơdrong jang xa”. Dang ei lơ̆m pơlei đei 230 unh hnam, ‘nŏh lăp oei đei pă 5 unh hnam tơnuh đĕch. Đĭ đăng rim unh hnam đei pơgar cheh phe, tiu, chanh dây, ƀa đak ngăl... unh hnam tŏ sĕt ‘nŏh 5,6 sao, unh hnam lơ ‘nŏh truh 4 - 5 ha. Dôm sơnăm tơjê̆  âu, mih ma duch nă adrin jang xa, jang kiơ̆ khoa hŏk ki thuơ̆t păng đei teh đak pơjing tơdrong ‘lơ̆ng, asong tŏk iŏk jên hăm jên kon tŏ sĕt vă pơtăm, vei rong cheh phe, kơna lơ unh hnam jang xa đei iŏk yoa truh kơ ti hlak jên, tŏk jing pơdrŏng đei ƀôh.

Ƀok Amyên akhan: Tơdrong arih xa kơ kon pơlei Bahnar jing phĭ tơtŏ dơnŏ ‘lơ̆ng ‘nŏh yoa đơ̆ng lui kiơ̆ Đảng, Teh đak: “Plei Dơ̆k Rơng dang ei tơplih tơpă, lơ bơngai pơtăm cheh phe đơ̆ng 2ha, 3ha truh 5 ha, jang xa đei truh kơ ti hlak jên. Đei hnam đơ̆ng tơnuh, pơmat tat gơnơm đơ̆ng adrin jang mă man đei hnam tih, răt đei teh. Nhen thoi unh hnam ‘nhŏng Yôn răt teh tôch lơ, man hnam tih ‘lơ̆ng păng răt đei gre ô tô hloi. Kon pơlei dôm sơnăm tơjê̆ âu tơplih ‘lơ̆ng dêh, hơiă hlŏh dơ̆ng jĭ đe mât mĭnh ƀơ̆r đon, ưh đei mơ̆ng kiơ̆ nơ̆r bơngai kơnê̆ pơhlŭ, kơdâu tơ̆ teh đak đe...”.

Đei ƀa, đei cheh phe lơ, tĕch đei yă dơ̆ng, Têt ‘nâu kon pơlei tôch čhôk ‘nă. Ƀok Amyơm, 1 ‘nu bơngai jang xa rơgei tơ̆ plei Dơ̆k Rơng, čhôk ‘nă tơroi: plei nhôn đei loi 20 unh hnam pơdrŏng đei ƀôh, jang xa 1 sơnăm đei hlŏh kơ ti hlak jên, nhen unh hnam ‘nhŏng Suưih, ƀok Pun, ƀok Ayim, ƀok Lưih...

Ƀok Amyơm, pơma: “Unh hnam nhôn sơnăm sơ̆ jang cheh phe kŭm đei păi mơ̆n, yă tĕch kŭm tŏk. Sơnăm ‘nâu jang đei kŭm vă dang ăi hăm sơnăm sơ̆ ‘năi, yă tĕch oei hơđơ̆ng mơ̆n kơna unh hnam tôch hơiă. Hơmĕng truh âu kơnh đei yă hơnơ̆ng thoi âu dơ̆ng, vă tơdrong arih xa kơ unh hnam păng kon pơlei roi tŏk ‘lơ̆ng hlŏh dơ̆ng.”.

Kŭm hăm tơdrong jang tŏk mŭk drăm ăn unh hnam, kon pơlei tơ̆ plei Dơ̆k Rơng oei mât 1 ƀơ̆r đon, vang pơjing pơlei pơdrŏng ‘lơ̆ng rŏ. Lơ̆m pơlei oei đei 1 ƀôt teh vă pơm pơsat, tam mă yoa truh. Mih ma duch nă drơ̆ng nơ̆r var hơmet, pơgơ̆r pơtăm 2.000 tơm cheh phe (dang 2ha), klăih song ăn 10 Grŭp vei rong. Truh dang ei 2 ha cheh phe âu đĭ đei plei sơđơ̆ng bơih, 1 sơnăm jô̆ păh lăp phĕ tĕch đei hlŏh 700 triu hlak jên. Đơ̆ng kơsô̆ jên âu mih ma duch nă iŏk pơm jên mong hơdai kơ pơlei, vă man trong bê tông lơ̆m pơlei, man trong năm tơ̆ mir pơgar cheh phe, man hnam hŏk hôp tơpôl lơ̆m pơlei... hơdai hăm ‘nŏh chă tơgŭm ăn dôm unh hnam tơnuh tŏk iŏk ưh đei jô̆ jên kon vă jang xa hai.

Pơyan Puih mak Bính Ngọ chơt hơiă hlôi vih hăm plei Dơ̆k Rơng. Hăm trong jang tŏk pran ‘lơ̆ng găh mŭk drăm păng mât 1 ƀơ̆r đon, vang adrin jang tŏk pơdrŏng, plei Dơ̆k Rơng gô đei yak tŏk pran hlŏh dơ̆ng lơ̆m sơnăm ‘nao ‘nâu. Ƀok Vut, kră pơlei plei Dơ̆k Rơng, xăh Đak Đoa, pơma hơdăh: “Sơnăm ‘nao, kon pơlei vă adrin tơplih ming trong jang xa, vei rong ‘long pơtăm, athei săy phŏng, tuh mơ̆r mă ‘lơ̆ng vă cheh phe roi đei plei. Kon pơlei tôch čhôk ‘nă, mưh băt, dang ei đei yŏng cheh phe ‘nao plei lơ ƀiơ̆. Adrol ki ‘nŏh cheh phe TR4 kon pơlei ‘nă bơih, dang ei đei dơ̆ng yŏng ‘nao ‘nŏh jĭ cheh phe Lá-xoài, cheh phe Xanh-lùn plei lơ hlŏh dơ̆ng, kĕ chĭu sơdrông ‘lơ̆ng ƀiơ̆ kơna kon pơlei vă adrin pơtăm hăm yŏng ‘nao âu. Kon pơlei lui gô đei xa lơ hlŏh dơ̆ng, tơdrong arih xa roi hiôk jơnap, rơnŭk rơnoa hlŏh dơ̆ng.”