Lơ̆m hnam kơmăy kơ HTX choh jang păng pơvih pơvăn, pơm sŭp – miê̆n – pho kro Chi Lăng – Khánh Xuân, phường Thành Nhất, dêh char Đắk Lắk  lơ sŭp – miên – phơ đei pơm tơlĕch, sơ̆k kro, tăh lơ̆m tơpu hơnơ̆ng vă tơtom chơt tĕch tơ̆ ‘ngoăih. Ƀok Hà Văn Tuyến, Kơdră chĕp kơ̆l Khul vei lăng HTX tơroi: Rim khei HTX tơlĕch tĕch dang 15-20 tân tơmam lơ kơloăi. Đơ̆ng năr chih tơbăt jĭ tơmam OCOP 3 sơnglŏng, tơmam đơ̆ng HTX roi đunh roi đei lơ bơngai băt truh păng răt yoa.

Ƀok Hà Văn Tuyến ăn tơbăt: “Ƀât blŭng sơnăm tây păng hơtuch sơnăm âm nhôn hơmet dang 40% tơmam tŏk lơ ƀiơ̆ pơting hăm dôm khei adrol ki. Hơdai hăm ‘nŏh nhôn oei đei hloi khul jang hiă vă jang kiơ̆ pơyan năng kiơ̆ tơmam đe vă răt vă gơ̆h đei tôm tơmam, pơtruh măh mai tơ̆ anih tĕch mơdro ƀât Têt”.

Jơhngâm đon bơ̆ jang tôch hưch hanh tơ̆ dôm anih pơm tơmam đơ̆ng choh jang xa tih. Tơ̆ Công ty TNHH Đức Thịnh – mĭnh lơ̆m dôm anih pơm tơlĕch tơmam găr điêu tơ̆ dêh char – dôm hnam kơmăy pơm tơmam, tăh kơƀi oei bơ̆ jang đĭ kơsư̆k.

Yă Nguyễn Ngọc Thùy Sơn, Kơdră pơgơ̆r công ty tơroi, hơdai hăm tĕch tơ̆ teh đak đe, mă loi tơ̆ teh đak Trung Quốc, ƀât hơtuch sơnăm anih tĕch mơdro oei akŏm lơ tơmam tĕch kơtă lơ̆m teh đak, mă loi ‘nŏh vă tĕch ƀât Têt. Anih tĕch mơdro kơchăng pơm tơlĕch lơ tơmam ‘nao, năng kăl truh tơmam ‘lơ̆ng, kơƀi tăh vă pơm hơtŏk tơdrong păr ang ăn hơnăn tơmam: “Anih tĕch mơdro kơchăng pơm tơlĕch lơ tơmam ‘nao, kơƀi tăh ‘lơ̆ng tơƀôh ăn tơdrong ngôi xa hơdai hăm băl. Găh yă tĕch, công ty oei vei kơjăp yă tĕch thoi hnam kơmăy, lăp 1,2 tơmam đĕch đei hơtŏk dang 5% yoa jên răt tơmam pơm tŏk. Ƀât Têt, tơmam tơlĕch tĕch lơ̆m the đak tŏk dang 10%”.

Tơ̆ tơring găh Hơlĕch kơ dêh char Đắk Lắk, lơ anih jang tơmam OCOP kiơ̆ unh hnam kŭm hơmet pơ ‘lơ̆ng pơmat tat đơ̆ng rŏng kơ ‘mi tihh đak lơ̆p, tơtom chơ tĕch tơ̆ ‘ngoăih ƀât Têt. Tơ̆ dôm anih tĕch mơdro tơmam OCOP tơ̆ xăh Sông Hinh, dôm tơmam nhen iĕr ưp hăm ƀoh tiu, ‘nhĕm rơmo sơ̆k kro, rơmo sơ̆k ƀât hơdra, ‘nhĕm nhŭng sơ̆k ƀât hơdra, iĕr kro, ‘nhŭng kro đei pơm hơmet, tăh lơ̆m kơƀi tôch ‘lơ̆ng.

Ƀok Nguyễn Duy Hùng, tơ ‘ngla anih pơm tơmam Hùng Miên tơroi, ƀât ‘mi tih đak lơ̆p âu ki kŭm ƀơm ưh ‘lơ̆ng truh tơ̆ tơring pơtăm tơmam kŭm nhen tơdrong jang xa, mă lei anih jang tơtom hơmet pơ ‘lơ̆ng tơiung dơ̆ng tơdrong jang xa vă pơm lăp hăm tơdrong ‘mĕh vă tơ̆ anih tĕch mơdro: “Nhôn pơgơ̆r jang xa hơnơ̆ng vă tơtom tĕch ƀât Têt. Ƀât têt sơnăm ‘nâu, tơdrong ‘mĕh vă răt tơmam rŏ năng tŏk dang 35% pơting hăm năr hmă, mă lei yă tĕch oei ưh đei tŏk lơ”.

Kŭm hăm tơdrong adrin đơ̆ng dôm anih tĕch mơdro păng unh hnam jang xa, tơdrong vei lăng tĕch mơdro, vei lăng tơmam xa rơgŏh ‘lơ̆ng kŭm đei dôm anih jang kơpal bơ̆ jang roi pơneh. Trung tá Nguyễn Đức Duy, Phŏ Kơdră Anih kanh sat vei lăng mŭk drăm, Công an dêh char Đắk Lắk tơroi, khul jang kơpal vei kơjăp rim tơdrong jang xa ƀât pơyan gĭt kăl âu: “Khul linh công an vă năng kăl truh tơdrong vei lăng tơmam vă pơm, tĕch ăn dôm anih et xa, anih tĕch mơdro, pơm ‘lơ̆ng ưh ăn đei kơchât kâm, tơmam ƀou phu ưh ăn iŏk yoa, kiơ̆ dơ̆ng noh tang găn tơdrong ƀơm pơnhul đơ̆ng tơmam xa, vang tơgop vă kon pơlei gơ̆h sơng xa têt sơđơ̆ng ‘lơ̆ng”.

Yak hlŏh dôm tơdrong pơmat tat yoa đơ̆ng tŏ ‘mi kial kơnê̆, hăm đon kơchăng, adrin đơ̆ng dôm anih pơm tơlĕch tĕch mơdro tơmam kŭm hăm tơdrong vang bơ̆ jang tôch pơneh đơ̆ng dôm anih jang kơpal, anih tĕch mơdro tơmam tơ̆ Đắk Lắk đei măh mai tơmam, pơm lăp hăm tơdrong ‘mĕh vă răt yoa đơ̆ng kon pơlei ƀât Tết Nguyên đán.