- ‘Mêm pơnach, hmach bơnê kơ ih, ‘nhŏng Xuĭn. Sơnăm âu ki hnam bơ̆n jang xa tôch đei, inh kŭm ƀôh tôch 'nă yoa ‘năi! Lei, apinh ih tơroi găh tơdrong jang xa đơ̆ng unh hnam bơ̆n hăm bôl boăl mơ̆ng radio năng?

-‘Nhŏng Xuĭn: “Bơnê kơ mih ma duch nă, đĭ sơnăm so, sơng sơnăm ‘nao chă pơđou ngôi găh tơdrong jang xa vă arih xa gơ̆h gei lơ̆m rim unh hnam! Kơdih kâu inh oei ‘lơ̆p sơ̆ mơmat tat dêh, pơti pơtĕk dơ̆ng kơna adrin jang xa na sư gơ̆h găi nhen dang ei. Sơ̆ mĕ ƀă song inh 1 ha teh, inh pơtăm cheh phe, rong dơ̆ng rơmo vă iŏk phân tuh ăn cheh phe. Ƀôh ‘long bluh ưh tam mă jing ‘lơ̆ng inh tŏk iŏk thim jên ngân hàng, răt phŏng tă ăn ‘long pơtăm, đơ̆ng noh sư gơ̆h đei plei plei lơ. Đang kơ ‘nŏh đei kon jên, ƀôh đe mih ma tĕch teh inh răt thim dơ̆ng, răt thim 3 ha, đơ̆ng rŏng 'nŏh chă thim dơ̆ng, truh dang ei đei đăi 4,5ha vă jang xa kơna unh hnam kum gơ̆h găi hiôk hian."

- Năng dơ̆ng tơdrong jang tŏk đơ̆ng kơdih kâu, ih ƀôh tơdrong kiơ kăl hlŏh vă gơ̆h jang xa đei nhen hrei ‘nâu?

-‘Nhŏng Xuĭn: “Inh đơ̆ng oei tơdăm sơ̆ adrin hŏk, đơ̆ng hŏk ‘nŏh mă gơ̆h jang xa, ưh kơ đei chă ngôi, chă thông kiơ. Gơnơm đơ̆ng kơpal, đơ̆ng Đảng pơtho, tơ̆p huân ăn kơ bơ̆n trong jang. Trong jang xa đơ̆ng inh, ƀât cheh phe oei thu ƀŏi ‘nŏh inh pơtăm hơlam bơ̆n ƀum nhak, ƀum krĕm, vă iŏk jên đơ̆ng noh răt bơ̆n phân tă thim dơ̆ng ăn cheh phe. Dang ei cheh phe tih, đei plei bơih ‘nŏh inh pơtăm hơlam ‘long sầu riêng. Truh dang ei inh pơtăm hơlam đei hlŏh 100 tơnơm bơih, sơnăm âu ki lơ tơm pơ ‘năh đei plei, pơ ‘năh tam mă, oei vei rong dơ̆ng...”

- Tơpă yơh! Đơ̆ng ih pơđou ngôi, inh băt yoa kiơ mă ih jang xa 1 sơnăm đei iŏk hlŏh 2 ti 1 puăt ‘nŏh. Hăm dôm tơdrong mă ih hlôh vao mưh jang cheh phe, kŭm nhen tơdrong đei ƀôh đơ̆ng kơdih kâu, brei drâu ih hăm đei tơgŭm ăn mih ma duch nă lơ̆m pơlei jang xa kiơ ưh?

-‘Nhŏng Xuĭn:  “Inh lơ lou, mưh băt mih ma kăl jên vă jang xa, chă tŏk iŏk jên ‘nŏh inh xong, mă lei ưh đei iŏk jên kon. Đei bơngai iŏk 50 triu, 20, 30 triu inh ưh đei iŏk jên kon ngăl. Đei mĭnh kơsô̆ bơngai tŏk iŏk jên jang xa ưh đei oei khŏ khăn inh vă thei ăn hloi kŭm ưh mơ̆n. Gô lai yơ đe jang xa đei đăi, đe ƀlŏk kơnh sư năm ăn kơ inh. Inh ưh kơ đei jô̆, iŏk jên kon kiơ ôh.”

 - Lei ah! ‘Ngoăih kơ tơgŭm ăn kơ mih ma duch nă jang xa, ih hăm chă pơtho tơƀôh ăn mih ma duch nă bơ̆n ki thuơ̆t jang, vei rong ‘long pơtăm ưh?

-‘Nhŏng Xuĭn:  “Inh ƀôh mih duch nă, đei bơngai ‘mĕh hŏk kiơ̆ inh ‘nŏh inh ‘mĕh dêh, inh chă roi tơƀôh ăn hloi. Inh kŭm ưh tam pơ̆n pơtho tơƀôh lơ, lăp chă tơroi ăn loh đĕch. Lơ̆m tơdrong hŏk hôp kiơ̆ đơ̆ng teh đak pơgơ̆r lei inh truh tơroi ăn kon pơlei, oei kơdih kâu ưh kơ pơ̆n roi tơƀôh hơdrô̆, kơnh đe jô̆ ba pơ ang, plêl. Oei mưh teh đak pơih tơjur lăm chăm sŏk cheh phe âu to ‘nŏh inh roi tơƀôh ăn kon pơlei.”

- Hnam bơ̆n jang xa đei iŏk yoa kơjăp thoi âu, bĭ sơnăm ‘nâu hnam bơ̆n hơmet tơmam vă pơgơ̆r xa têt thoi yơ hă ‘nhŏng Xuĭn?

-‘Nhŏng Xuĭn: “Têt bơih đei 1 pôm bơbe, krao ‘nhŏng oh dơdơ̆k ngôi hơdai tơ̆ hnam ba tơ̆ âu, pơđou ngôi tơdrong jang xa. Têt bơih athei ngôi ƀiơ̆ tơ̆ hnam, pơgơ̆r thoi bôl boăl, sơng ‘nhŏng oh truh ngôi. Têt jĭ năr chơt dêh bơih, sơnăm hle mă chă lĕch tơ̆ bri ‘nŏh ưh bơih. Lei na têt bơ̆n ngôi tơ̆ hnam chă pơđou bơ̆n tơdrong jang xa păng ‘nhŏng oh, mih ma vă hơnô̆ hơnăp kơnh roi gơ̆h, roi đei ƀôh.”

- Mât lơ̆m sơnăm ‘nao Bính Ngọ âu, ih đei đon tơchĕng vă jang xa thoi yơ dơ̆ng, vă hơnơ̆ng gơ̆h đei xa lơ nhen thoi sơnăm so ki?

-‘Nhŏng Xuĭn: “Đang kơ têt bơih, unh hnam nhôn pơdôr băl adrin pruih đak, tă bơ̆n phân ăn cheh phe, adrin kăt kanh vă năm năp gơ̆h plei, mưh ưh vei lei ưh đei plei… Đơ̆ng rŏng têt bơ̆n ưh đei tuh đak lei cheh phe hăp lôch, kro, mưh kro bơih ‘nŏh năm năp ba ưh đei xa bơih. Kăl hlŏh ‘nŏh bơ̆n athei vei rong cheh phe vă đei tương lai ăn kơ bơ̆n. Bơ̆n ưh adrin jang lei bĭ bu văn văi song bơ̆n plei, song bơ̆n kon jên. Na bơ̆n athei adrin jang tă phân, tă mơ̆r, tuh đak yoa pơyan jang ‘nâu tôch gĭt kăl.

- Lei ah, bơnê kơ ih ‘nhŏng Xuĭn roi tơbăt ăn bôl boăl mơ̆ng Radio găh trong jang xa đei iŏk yoa kơjăp đơ̆ng hnam tơnŏ. Thơ thou ăn kơ ih kŭm hnam tơnŏ sơnăm ‘nao liĕm kâu, hiôk chơt, jang xa đei iŏk yoa lơ hlŏh dơ̆ng!