Dôm năr âu, tơ̆ trong sơlam xăh Quảng Trực, dêh char Lâm Đồng, ƀrê ƀra hla kơ tŏk bŏk bri păng mir pơgar cheh phe, măk ka, tiu. Kơmăng truh, ŭnh điên hơdăh ƀrach tơ̆ lơ jăl trong. ‘Noh jĭ tơdrong jang “Tơ̆k hơdăh trong sơlam” yua đơ̆ng Khŭl druh dăm Quảng Trực bơ̆jang. ‘Nhŏng Y Nhật Minh – Phŏ Kơdră Anih MTTQ, Bí thư Đoàn xăh tơbăt, đĭ đăng lơ̆m xăh hlôi chô̆ hloh 5 km ŭnh điên tơ̆k hơdăh, tơgop vei sơđơ̆ng tơpôl, vă pơlei pơla sơđơ̆ng hiôk. Ƀlep ƀơ̆t chơt hơiă pơyan puih mak - chơt hơiă kơ Đảng, sơnăm mơlôh xăh sơlam Quảng Trực vang dăr joang tơring sơlam kŭm hăm ƀô̆ đô̆i tơring sơlam păng pơgơ̆r hơri hơsoang, tôn chĭng, pơm tơdrong chơt hơiă ‘nă hal.

“Hơdai hăm hơnăp jang vei kơjăp tơring sơlam, Đoàn xăh Quảng Trực oei hơnhăk tơdrong joh ayŏ so vih hơlơ̆k dơ̆ng lơ̆m hŏk hôp đoàn. Dôm jơ hŏk hôp tơklep hăm tôn chĭng, hơri brông M’Nông hlôi tơgŭm kơ sô̆ đoàn viên vang hŏk pơhrăm hơnơ̆ng tŏk đơ̆ng dang 60% tŏk hloh 85%. Sơnăm truh, Đoàn xăh gô hơnơ̆ng pơih să tơdrong jang tơ̆k hơdăh trong sơlam, pơgơ̆r lơ khŭl druh dăm năm dăr joang hai, roi tơbăt vă kơ rim đoàn viên adoi đei tơdrong jang hơdăhh, tơklep hloh hăm pơlei pơla kơdih hai”.

Pơyan puih mak tŏk bŏk đei ƀôh tơ̆ Thuận An, dêh char Lâm Đồng, hơnih tơdrong jang joh ayŏ, kơdŏ soang druh dăm đei pơvei hơnơ̆ng. Y A Rôn – Phŏ Bí thư Đoàn xăh tơbăt, đơ̆ng sơnăm 2022 truh dang ei, sư hlôi kơtă pơgơ̆r hloh 20 ‘măng hŏk hôp, pơtho hơri brông M’Nông, sơng đei kơhrĕng ‘nu đoàn viên, druh dăm vang truh pơhrăm. Lơ buăl mơlôh đơ̆ng ưh kơ gơh hơri dang ei đĭ gơh hơri tơtơl, hơri lơ̆m dôm năr lêh kơ pơlei pơla bơih. Sơnăm 2025 âu ki, Y A Rôn chơt hơiă vang jang lơ̆m khŭl tang măt druh dăm Việt Nam hăm “Tơdrong jang ƀrê - tơchĕng hơlen, hŏk pơhrăm đơ̆ng druh dăm” tơ̆ Trung Quốc. Sư tơroi:

“‘Măng năm tơgŭm ĭnh gơh băt đei lơ tơdrong, mă loi ‘noh jĭ ƀôh rơđăh hơnăp jang đơ̆ng druh dăm M’Nông lơ̆m chăl hle. Tơƀơ̆p đei lơ bơngai, đei pơma dơnuh hŏk pơhrăm dôm tơdrong hơiă đơ̆ng đe buăl lơ̆m teh đak păng ‘ngoăih kơ teh đak. Sơnăm truh, ĭnh gô hơnơ̆ng pơjing dôm kâu lak ƀô̆ hơri brông druh dăm, hơdai hăm kuay phim, tăh hơri brông M’Nông lơ̆m mạng tơpôl vă lơ bơngai băt hloh, vă khŭl mơlôh chhôk ‘nă păng ưh kơ hiơt tơm a đơ̆ng kơdih”.

Kŭm hăm dôm tơdrong jang joh ayŏ, lơ druh dăm M’Nông tơ̆ Lâm Đồng hlôi pơ̆n pơjing tơdrong jang sa đơ̆ng kơdih tơdrong ‘lơ̆ng hơiă kon kông. Tơ̆ plei Bu Dak, xăh Thuận An, H’Her, hơdruh M’Nông, hlôi hơtŏk tơiung tơdrong jang tanh brai vai khăn, pơm tơdrong jang hơnơ̆ng ăn kơ hloh 10 ‘nu mŏ oh, hăm iŏk yua dang 5 triệu hlak jên 1 ‘nu 1 khei. Lăng băt trong răt yua ‘nao, sư tăh tơmam tơ̆ lơ̆m Facebook, Zalo, TikTok, hơnơ̆ng livestream roi tơƀôh tơmam. H’Her tơbăt: Tơdrong jang âu hlôi iŏk đei tơmam hơpăh mă Pêng tơ̆ ‘măng pơlong Drŏ kăn tơiung pơjing tơdrong jang sa dêh char Đắk Nông (so).

“Ĭnh ‘meh mŏ oh gơh tanh brai đei iŏk yua sơđơ̆ng, kon pơlei gô chă vei kơdih tơdrong jang. Ĭnh ‘meh tơmam tanh M’Nông ưh khan lăp tĕch lơ̆m teh đak mă oei đei ƀôh tơ̆ dôm hơnih tĕch mơdro điên tư apŭng plĕnh teh hloi, vă lơ bơngai hlôh păng ‘mêm hloh dơ̆ng găh joh ayŏ kon kông bơ̆n”.

Lơ̆m tơdrong jang joh ayŏ kơdŏ soang, Bơngai joăt joh hơri Điểu Náp Bunong - dang ei bơ̆jang tơ̆ anih jang joh ayŏ dêh char Đắk Lắk, hlôi rơih pơcheh joh ayŏ kơdŏ soang pơm gơng tơƀưh hơnhăk joh ayŏ M’Nông truh jê̆ hloh hăm tơpôl. Lơ̆m dôm ƀai hơri, sư iŏk boa hơri kră sơ̆ M’Nông, hơdai hăm boa hơri chăl hle păng tơmam tôn reh Tây Nguyên, pơm tơdrong hmă mă lei păr ang tơdrong ‘lơ̆ng hơiă. Bơngai joăt joh hơri Điểu Náp Bunong tơroi tơdrong chhôk hơiă: âu ki khŭl joh hơri hơsoang Nap Bunong Band  kơ sư iŏk đei jơnei A trong hơri kră sơ̆ hơdai hăm trong hơri hle tơ̆ ‘măng pơlong dôm khŭl joh hơri hơsoang dêh char Đắk Lắk pơih să 2025. Kênh YouTube “Điểu Náp Bunong Official” hăm dôm tơdrong jang hơri hơsoang hơiă lơ, lơ̆m noh tơƀôh tơdrong ‘lơ̆ng hơdrô̆ đơ̆ng joh ayŏ M’nông hlôi sơng đei tơdrong lăng truh đơ̆ng lơ lap buăl mơlôh.

“Dôm ƀai hơri, tôn reh ĭnh vang akŏm adoi ‘meh tơgŭm đe buăl mơlôh hlôh akhan joh ayŏ M’Nông ưh kơ sĭ jing tơdrong tơroi đơ̆ng sơ̆, mă tŏk bŏk hơrih lơ̆m tơdrong hơrih năr ‘nâu. Sơnăm truh kơnh, ĭnh ‘meh đei dơ̆ng lơ ƀai tơroi tơdrong hơrih ‘nao đơ̆ng kon pơlei, vă joh ayŏ đei pơtrơp dơ̆ng mĭnh trong hiôk ‘lơ̆ng”.

Đơ̆ng dôm tơdrong jang “Tơ̆k hơdăh trong sơlam”, truh tơdrong jang tơiung pơjing tơdrong jang sa đơ̆ng tanh brai, pơcheh joh ayŏ kơdŏ soang chĕp đei tơdrong ‘lơ̆ng bri kông, dôm tơdrong jang kơjăp đơ̆ng đe buăl mơlôh Mnông tŏk bŏk tơgop pơm tơplih um ai pơlei pơla, vă tơdrong joăt joe yak hơdai hăm tơplih ‘nao. Yak mơ̆t lơ̆m pơyan puih mak Bính Ngọ 2026, sơnăm mơlôh bơngai M’Nông hơnơ̆ng păr ang tơdrong hơpơi ‘meh plang pơyơ̆r, vang tơgŭm pơjing pơlei pơla sơđơ̆ng, ƀĕnh tơdrong ‘lơ̆ng hơiă, vei rong đon lui tơ̆ hơnăp kơnh ‘lơ̆ng hơiă kơ Tây Nguyên.