Tơ̆ dôm teh groi, pơgar krô̆i pung kơđoh jơk ƀlik ƀlăk, rơ-iŭl rơ-iăl ăn ƀôh pơyan pơm jang sơnăm ou pơtoi đei yua sơđơ̆ng. Hơmŏ tơmoi truh tơmang ah khei tơmang pơhiơ̆ năr 2/9 truh Khánh Hòa tŏk kơtang tŏk bŏk oei pơih trong hiôk vă tĕch tơlĕch ưh hơdrô̆ hăm krô̆i pung kơđoh jơk mă hăm lơ tơmam choh pơtăm nai kơ tơring groi kông tơ̆ tơring, pơm trong vă pơjing ăn tơdrong tơroh pơm jang lơ̆m khei năr truh. Ƀok Đoàn Văn Hưởng, Kơdră Hơp tak xah choh jang xa Khánh Thành (xah Khánh Vĩnh, dêh char Khánh Hòa) tơroi: “Sơnăm ou, đơ̆ng blŭng pơyan jang truh dang ei, lăng atŭm tŏ 'mi kial sơđơ̆ng. Đak 'mi sơđơ̆ng noh tơdrong vei lăng 'long pơtăm ƀônh ƀŏ hloh. Têt sơnăm ou, dang ei tŏk bŏk oei vei lăng, lăng atŭm 'long giơ̆ng 'lơ̆ng. Lêh akŏm tơbang tơmam choh pơtăm đơ̆ng kon pơlei jang mir, mă kăl noh krô̆i pung, adoi trŏ khei năr. Kơchĕng ah năr 2/9, hơp tak xah adoi oei đei mah tơmam vă tĕch tơlĕch lơ̆m tơring”.

Krô̆i pung kơđoh jơk Khánh Vĩnh dang ei ưh hơdrô̆ đei tĕch tơ̆ kơchơ tơm mă hlôi đei dôm anih jang mŭk drăm iŏk pơm tơmam pơm tơlĕch jou krô̆i pung, dŏl krô̆i pung 'măn hơngeo. Rim anih jang mŭk drăm akhan, ou jĭ tơdrong hiôk vă dar deh 'nhăk hơdrĕch 'long xa plei ou jing tơmam drăm OCOP kăp gĭt kơ tơring groi kông. Yă Nguyễn Thị Ngân, Kơdră Anih jang tĕch răt plei 'long xa păng tơmam choh pơtăm Ngân Nguyễn ăn tơbăt: “Ah mă dôm tơmam drăm đei jơnei tơchơ̆t OCOP, dang yak kiơ̆ trong pơm tơlĕch tơmam drăm rơgoh 'lơ̆ng, hưuh kơ, noh dôm anih jang mŭk drăm păng anih tĕch răt pơtơm chơ chă truh dôm anih jang nhen gah nhôn ou. Đe sư chơ chă dôm tơmam drăm đei tơm a la chă hơdah, tơmam drăm rơgoh păng đei kăp gĭt vă jang hơdoi đunh đai. Pơtih nhen dôm tơmam drăm đei pơm đơ̆ng krô̆i pung nhen jou krô̆i pung, dŏl krô̆i pung 'măn hơngeo, dah mă 'măn pai che adoi đei tơrĕk truh”.

Lơ̆m khei năr dêh char Khánh Hòa pơih să tơdrong jang hơtŏk tơ-iung ah mă tơmơ̆t hơdai hăm dêh char Ninh Thuận, dôm tơmam drăm kăp gĭt groi kông đei trong hiôk hloh tĕch tơlĕch lơ̆m tơring, mă hăt noh tơguăt hăm dôm lêh akŏm, tơmang pơhiơ̆ ah khei năr tơm. Lơ tơmoi truh tơmang hăm tơring Pơbah Tŏk bŏk hlôi tơrĕk truh tơmam drăm plei 'long xa kăp gĭt, lăng ou jĭ minh pah lơ̆m tơdrong hơlen băt gah joh ayŏ tơ̆ tơring. Tiến sỹ Đặng Qúy Nhân, jang lơ̆m Anih Asong jang Tơring tơrang 'nao Trung ương, lơ̆m Anih tơm Choh jang xa păng Cham char akhan: “Rim tơring kăl iŏk yua tơdrong pran gah dôm tơmam drăm kăp gĭt kơ po. 'Meh vă hơtŏk sơđơ̆ng noh athei đei trong pơkăp pơjing tơring pơtăm tơmam drăm sơđơ̆ng, đei tơm a la chă hơdah păng đei pơkăp gah tơring teh pơtăm. Ƀơ̆t doh, rim anih jang mŭk drăm păng hơp tak xah gô kơchăng pơm tơlĕch tơmam drăm lơ̆m đunh khei năr, hơtŏk kơjă păng hơtŏk iŏk yua ăn kon pơlei jang mir. Tơdrong tơguăt dôm tơmam drăm OCOP vă asong ăn tơmoi truh tơmang tơ̆ tơring adoi kăl đei tơrĕk truh”.

Khei năr ou ki, gơnơm đei Tơchơ̆t jang kơ teh đak asong jang hơtŏk mŭk drăm – tơpôl tơring kon kông păng groi kông, dêh char Khánh Hòa hlôi tơgŭm minh ƀar hơp tak xah ming man anih pơm tơlĕch tơmam drăm, anih vei lăng, pơtho gah chih măt tơring pơtăm, dar deh keh đang pơkăp pơm jang. Minh ƀar trong jang pơlong 'nhăk tơmoi truh tơmang pơgar chă hơlen păng răt tơmam drăm hlôi pơyua hơdah. Ƀok Nguyễn Ngọc Sơn, Phŏ Kơdră Anih jang Bơngai Kon kông păng Tơdrong khop dêh char Khánh Hòa ăn tơbăt: “Dang ei, tơ̆ tơring groi kông dêh char Khánh Hòa, kon pơlei pơtơm tơplih đơ̆ng trong jang so vă iŏk jang kiơ̆ khua hŏk – trong jang 'nao vă hơtŏk iŏk yua hăm 'long pơtăm, kon tơrong. Mă lei, bơ̆n athei sơ̆n pơih dôm lăm pơhrăm, pơtho vă kon pơlei hlôh vao hơdah, thoi yơ iung pơm jang, pơtơm tĕch pơdro gơh hơgei. Ah băt hơdah dôm tơdrong noh đe sư pơtơm pơjing đei trong jang hơtŏk tơ-iung trong jang ning nai kơnh”.

Thoi noh, mưh tơplih đei đơ̆ng đon tơchĕng đơ̆ng pơm jang rah rai jing đon tơchĕng pơm tơlĕch tơmam drăm tơguăt hăm tơring tĕch răt, tơmam choh pơtăm OCOP groi kông Khánh Hòa gơh jing jơhngơ̆m pran hơtŏk tơ-iung kơjăp lơ̆m jăl jang pơih să cham char hơtŏk tơ-iung păng hơmet jang tơmang pơhiơ̆ dang ei.