Tơ̆ hnam hơkŭm joh ayŏ pơlei Mduk, phương Ea Kao, dêh char Đăk Lăk, lơ kon pơlei tôm hnưr sơnăm hăt hot tơƀang lăng kơmang điên thuăi, đei đe buăl đoan viên – jing khul jang găh kơmăi kơmŏk kơsô̆ lơ̆m pơlei – tŏk bŏk oei pơtho gah trong chih măt tai khuan VNeID. Đơ̆ng rŏng kơ pơm đang, rim bơngai kơdih chă pơm, chih tôm tơdrong kăl kơdih po đơ̆ng hla bar kăl tơmơ̆t lơ̆m ư̆ng yŭng. Yă  H’Mai Mlô, oei tơ̆ pơlei ou tơroi: “Hơdrol ki tam mă đei đe mon chă pơtho noh adoi pơngơ̆t kơ đon, kơlih inh ưh kơ băt kiơ ôh, hơnơ̆ng kơ hiơt dơ̆ng. Dang ei gơh chă chih tơmơ̆t kơdih bơih dôm tơdrong kăl kơ po. Tam mă juaih, mă lei tŏk bŏk oei pơhrăm dar deh”

Dôm năr “hŏk gah kơmăi kơsô̆” thoi ou hlôi jing juăt tơ̆ lơ phương, xah kơ Đăk Lăk, jô̆ đơ̆ng mă dêh char pơtơm 100 năr pơm kiơ̆ tơdrong “Rim răih kon pơlei hŏk pơhrăm kmăi kmŏk kơsô̆” đơ̆ng khei 7. Hloh 2.000 khul jang gah kơmăi kơsô̆ lơ̆m pơlei pơla hlôi đei pơjing, hăm hloh 3.500 kang ƀô̆, đoan viên, bơngai jang mơlôh kơchăng chă “tơteng rim 'măng hnam”, “tơƀôh ăn trong jang”, tơgŭm kon pơlei pơm juăt hăm kơmăi kơmŏk kơsô̆.

Ưh hơdrô̆ pơdơh ah tơdrong “sut ưh kơ băt” gah tơdrong pơm, rim khul jang kơmăi kơsô̆ tơ̆ pơlei pơla oei pơih đei dôm “anih pơhrăm kơmăi kơsô̆” tơ̆ hnam hơkŭm joh ayŏ thôn, pơlei dah mă tơ̆ anih jang hanh chinh kŏng tơ̆ xah. Kon pơlei chĕp ba điên thuăi, đei pơtho ăn trong yua ư̆ng yŭng hanh chinh kŏng, hơlen băt tơdrong kăl gah teh, ăn thuê̆ điên tưh, kla jên ưh kơ kăl jên măt. 'Nhŏng Y Sion Knul, Ƀĭ thư Đoan Hơdruh tơdăm xah Ea Na, dêh char Đăk Lăk ăn tơbăt: “Tơrĕk truh tơdrong tơmơ̆t hơdai, kon pơlei pơngơ̆t kơ đon ah mă pơm dôm hla bar hanh chinh, hô sơ ou to. Nhôn tơgŭm ăn kon pơlei lơ̆m tôm tơdrong mă ou, đơ̆ng nôp hô sơ kiơ̆ pơkăp kŏng truh trong yua VNeID đơ̆ng Anih tơm Kŏng an. Mă kăl hăm kon pơlei kon kông, tơdrong jang ou đei jang hơdoi hơnơ̆ng, vă tơjur ƀiơ̆ jơ năr vih vơ̆t rŏng 'ngir ăn kon pơlei”

Yak hơdoi atŭm hăm khul pơm jang, lơ anih jang mŭk drăm gah viên thŏng adoi tơgop jơhngơ̆m ăn tơdrong jang “Rim răih kon pơlei hŏk pơhrăm kmăi kmŏk kơsô̆”. Dôm anih pơhrăm đei tơgŭm kơmăi kơmŏk, đương truyên, phân mêm AI ƀônh kơ yua, tơgŭm ăn kon pơlei hơlen hơdah păng pơm kiơ̆ tenh hloh. Ƀok Nguyễn Văn Thản, Phŏ Kơdră VNPT Đăk Lăk tơroi: “Nhôn hlôi pơtruh kang ƀô̆ vang jang lơ̆m khul kơmăi kơsô̆ tơ̆ phương, xah, kueng kơphô̆. Atŭm hăm jơnŭm pơgơ̆r tơring, nhôn pơih dôm lăm pơhrăm gah tơdrong gơh yua kơmăi kơsô̆ ăn kang ƀô̆, bơngai jang vă pơtho ăn kon pơlei păng anih jang mŭk drăm. Tơchơ̆t tơlĕch vă rim raih kon pơlei adoi gơh tơrĕk truh, hlôh vao păng gơh yua rim kơmăi kơsô̆ lơ̆m tơdrong hơrih rim năr”

Ƀok Bùi Thanh Toàn, Kơdră Anih jang Khua hŏk păng Kŏng ngê̆ dêh char Đăk Lăk ăn tơbăt: 100 năr pơtơm jang dơnơm gah tơdrong “Rim răih kon pơlei hŏk pơhrăm kmăi kmŏk kơsô̆” jĭ hơyak pơih blŭng vă tơplih kơmăi kơsô̆ jing tơdrong juăt rim năr hăm rim kon pơlei pơla. Ah mă hơlen băt tơdrong kăl, băt yua, băt jang kiơ̆ trư̆k tuyê̆n, rim tơchơ̆t jang 'nao tơpă truh hăm kon pơlei, vă ưh đei prơih lê̆ bơngai ayơ tơ̆ rŏng:  “Nhôn hlôi klah asong dôm khul bơngai păng pơtơm jang lơ̆m 100 năr dơnơm. Tơchơ̆t tơlĕch noh akŏm ăn kon pơlei hlôh vao hơdah gah tơdrong kăp gĭt đơ̆ng tơplih kơmăi kơsô̆, ưh hơdrô̆ tơ̆ tơring tơm mă oei pơlan să truh hăm kon pơlei kon kông tơring hơtaih yaih. Ah juăt bơih, kon pơlei gô băt yua kơmăi kơmŏk kơsô̆ vă pơm jang, tĕch pơdro păng pơm rim hla bar hanh chinh kăp gĭt ƀônh ƀŏ hloh”

Đơ̆ng rim năr “pơtho pơm jang” truh pơkăp đơ̆ng jơnŭm pơgơ̆r tơring păng anih jang mŭk drăm, tơdrong jang “Rim răih kon pơlei hŏk pơhrăm kmăi kmŏk kơsô̆” tŏk bŏk oei hơtŏk ăn kơmăi kơmŏk kơsô̆ pă đei chrih hăm rim kon pơlei pơla. Păng đơ̆ng rŏng kơ minh năr, tơ̆ Đăk Lăk đei lơ bơngai jing kon pơlei kơsô̆, pơjing đei minh tơpôl kơsô̆ tôm tơdrong, đei đon 'lơ̆ng păng tơnăp. 'Nou jĭ tơdrong kăp gĭt vă dêh char pơjing jơnŭm pơgơ̆r kơsô̆, tơpôl kơsô̆, mŭk drăm kơsô̆.