Anih tơm jang hanh chinh xah Đăk Pxi, dêh char Quảng Ngãi ƀenh kơ bơngai. Anih jang 'noh să đei 'măn tơ̆  hnam hŏk hôp xah Đăk Long, apŭng Đăk Hà so, mă lei kơsô̆ bơngai kơdrơ̆m noh athei tơ-oei gô ah tang dŏ hang lơng. Pơmai Y Rê, tơ̆ thôn Kon Têu, xah Đăk Pxi ăn tơbăt: ‘’Kon pơlei truh pơm hla bar lang lap, tơ̆ anih sơng iŏk hla bar vă pơm noh rơ-ông rơ-ang, ah trong tang dŏ oei gô hơnơ̆ng kơ ƀenh bơngai. Bu bu adoi 'meh đei pơm mă tơtenh vă tom hăm tơdrong jang kơ unh hnam, noh phơ phŏ pơm ăn kang ƀô̆ hrat hloh. Nhen inh nôp hla bar pơm 'năr ou, truh 'năr dơning 'mơ̆i pơtơm pơm keh đang’’.

Oei pơmai Y Rum, tơ̆ thôn Pâ Cheng, truh pơm hla bar ăn kon năm hŏk tơroi: " 'Năr hơdrol ki noh kang ƀô̆ pơm hla bar tenh, pơgê năm nôp noh ah kơsơ̆ đe pơm đang bơih. 'Năr ou noh ưh kơ băt đe pơm tenh dah mă ưh, kon pơlei truh pơm hla bar kơdrơ̆m kơdreng hloi. Kang ƀô̆ adoi tơrĕk tơgŭm kon pơlei lơ̆m tơdrong chă pơm hla bar ou to". 

Ƀok A Ly – Phŏ ƀĭ thư chi ƀô̆, kơdră thôn Pâ Cheng, xah Đăk Pxi ăn tơbăt, đơ̆ng mă teh đak pơkăp jơnŭm jang hanh chinh, kon pơlei sô̆ hơ-iă ah mă dôm hla bar kăl đei pơm tơtenh tơ̆ xah, ưh đei năm hơtaih dôm jĭt km truh tơ̆ apŭng nhen hơdrol ki: "Dang ei tơdrong pơvih ăn kon pơlei kiơ̆ tơdrong pơjing păng hơtŏk pơ-'lơ̆ng pơm jang đơ̆ng Anih jang Hanh chinh kŏng tơnăp hloh. Tơ̆ ou, dôm hla bar hanh chinh đei pơm ah minh anih đĕch, hơdah 'lơ̆ng, pơm jang tôch tenh, tơgŭm ăn kon pơlei ưh đei huach jơ năr vih vơ̆t, noh kon pơlei sô̆ hơ-iă dêh. Anih jang xah noh jê̆ hnam, kon pơlei vih vơ̆t hiôk hian hloh. Khul kang ƀô̆ rơhau 'lơ̆ng, pơtho tơnăp, pơm ăn bơngai truh pơm hla bar hiôk lơ̆m jơhngơ̆m. Tơdrong hơtŏk kơtang iŏk yua kŏng ngê̆ thŏng tin adoi tơgŭm chă hơlen nôp hô sơ păng pơm hla bar tenh kuăng, ƀônh hiôk hloh’’.

Xah Đăk Pxi, dêh char Quảng Ngãi, đei pơjing kiơ̆ pơkăp tơmơ̆t hơdai dôm xah Đăk Pxi păng xah Đăk Long (apŭng Đăk Hà, dêh char Kon Tum so). Atŭm hăm tơmơ̆t hơdai anih jang hanh chinh, xah pơm jang minh ƀar tơdrong jang đei asong đơ̆ng jăl apŭng so, noh tơdrong jang lơ hloh. 'Nhŏng A Sanh, kang ƀô̆ Anih jang hanh chinh kŏng xah Đăk Pxi chơt hơ-iă ăn tơbăt: tơdrong jang noh lơ, hrat mơ̆n, mă lei đe 'nhŏng athei hơdrin jang tơnăp: ‘’Lơ̆m khei năr blŭng tơlĕch pơm jang, tơnap tap tih hloh noh tơdrong tam mă juăt jang đơ̆ng kang ƀô̆ păng kon pơlei. Kiơ̆ tơdrong pơm jang nhôn adoi juăt bơih hăm pơkăp jang 'nao, iŏk yua kŏng ngê̆ thŏng tin. Lơ̆m tơdrong pơm hla bar kăl ăn kon pơlei, nhôn hơnơ̆ng vei sơđơ̆ng đon bơnôh rơhau rơhal, pơtho tơƀôh rim trong pơm jang. Đon oei xa 'lơ̆ng, sơ̆n jơhngơ̆m tơblang ăn kon pơlei, noh kon pơlei sơđơ̆ng jơhngơ̆m lui ngeh hloh’’.

Tơplih đơ̆ng jang hanh chinh jing đon tơchĕng pơm jang pơvih noh ƀôh hơdah hloh ah mă pơm kiơ̆ pơkăp jơnŭm pơgơ̆r 2 tăl tơ̆ Đăk Pxi, tơring đei truh 87,5% kơsô̆ măt kon pơlei kon kông. Yă Phạm Thị Thương, Ƀĭ thư Đảng uy xah Đăk Pxi ăn tơbăt, pơm kiơ̆ tơnăp dôm tơchơ̆t jang kơ teh đak gah asong jang ăn tơring kon pơlei kon kông păng groi kông, tơdrong hơrih kon pơlei kon kông tơ̆ tơring hơtaih yaih tŏk bŏk oei tơplih hơdah. Rim bơngai jang đei yua jê̆ 50 triu hlj minh sơnăm; dang ei kơsô̆ unh hnam hin dơnuh kơ xah oei lơ̆m 6% đĕch.

Hơdrol kơ tơmơ̆t hơdai, 2 xah Đăk Pxi păng Đăk Long (so) hlôi jang đei jơnei dôm tơchơ̆t pơjing tơring tơrang 'nao. Dang ei tŏk bŏk pơtoi pơm jang tơnăp tơdrong hơvơn “pơm tơplih đon tơchĕng trong pơm jang lơ̆m tơring kon kông”, atŭm hăm noh tơlĕch jang đei jơnei dôm tơchơ̆t jang đơ̆ng Teh đak; pơtho kon pơlei tơrĕk hăm khua hŏk kih thuơ̆t, tơplih trong jang vei lăng 'long pơtăm kon tơrong vă hơtŏk mŭk drăm tơpôl.

Hăm tơdrong tơchơ̆t jang roi năr roi kơjung, Đăk Pxi adoi pơtoi tơrĕk truh tơdrong pơjing khul kang ƀô̆ jang, mă kăl noh kang ƀô̆ bơngai kon kông. Yă Phạm Thị Thương ăn tơbăt: "Hăm kang ƀô̆ bơngai kon kông tơ̆ ou noh pơtơm tơdrong jang kiơ̆ sơnong hlôi asong noh adoi jang tơnăp. Mă lei adoi oei đei minh ƀar kang ƀô̆ tam mă juaih gah kŏng ngê̆ thŏng tin vă pơtrŏ hăm tơdrong tơlĕch jang lơ̆m phân mêm noh jang hơdar hloh. 'Noh xah pơtoi pơkăp hơdah vă kang ƀô̆ bơngai jang hơtŏk tơdrong juăt jang, iŏk yua kơmăi kơsô̆ vă pơm hla bar kăl kiơ̆ pơkăp kơmăi kơsô̆ lơ̆m khei năr truh".

Hăm tơdrong asong jang tôm tong đơ̆ng Teh đak, tơdrong tơplih gah đon tơchĕng jang hanh chinh đơ̆ng khul kang ƀô̆ tơ̆ tơring, atŭm hăm tơdrong tơguăt đơ̆ng kon pơlei, lui ngeh xah hơtaih yaih Đăk Pxi roi năr gô roi hơtŏk tơ-iung phĭ tơtŏ dơnŏ 'lơ̆ng.