VOV4.Bahnar - Hơ nơ̆ng tơ drong jang ‘măng hop akŏm mă 14, kơ sơ̆ ‘năr 11/8, Anih chĕp kơ̆l pơ gơ̆r Kuôk hô̆i pơ drơ̆ng kiơ̆ tơ drong tơ chơ̆t găh hơ nơ̆ng tơ lĕch kla jên tơ gŭm hăm bơ ngai jang đei ƀơm ưh kơ ‘lơ̆ng yua đơ̆ng jĭ Covid-19. Kiơ̆ kơ ‘noh, Anih chĕp kơ̆l pơ gơ̆r Kuôk hô̆i drơ̆ng 1 nơ̆r iŏk yua dang 1 rơ bâu 155 ti hlak jên đơ̆ng Anih mong jên ƀao hiêm ưh kơ đei tơ drong jang truh đĭ sơ năm 2021 vă hơ nơ̆ng kla tơ gŭm hăm bơ ngai jang găh bơ ngai sa yua kiơ̆ tơ drong tơ chơ̆t. Khei ‘năr jang kiơ̆ kla jên tơ gŭm bơ ngai jang jang đang hiơ̆ hloh lơ̆m ‘năr 10 khei 9 sơ năm 2022. Tơ drong tơ chơ̆t pơ jao kơ Khŭl kơ dră teh đak tơ lĕch jang kiơ̆ tơ drong kla jên ƀlep khei ‘năr păng roi tơ băt kơ Anih chĕp kơ̆l pơ gơ̆r Kuôk hô̆i pơ tôch jang kiơ̆ tơ drong tơ chơ̆t tơ̆ ‘măng hop akŏm khei 9 truh. Pơ ma pơ tôch ‘măng hop akŏm ‘măng mă 14, Kơ dră Kuôk hô̆i Vương Đình Huệ tơ roi rơ đăh, đơ̆ng rŏng 2 năr 1 puăt bơ̆ jang Anih chĕp kơ̆l pơ gơ̆r Kuôk hô̆i hlôi jang đang 7 tơ drong tih păng 2 grŭp tơ drong. Athei Tổng thư ký, Kơ dră vei lăng Anih jang Kuôk hô̆i, lăng kiơ̆ dôm tơ drong pơ tôch vă tơ lĕch roi tơ băt pơ tôch, jăh jang đang vă pơ truh ăn Kơ dră Kuôk hô̆i kĭ 4 tơ drong Tơ chơ̆t.

Thuem: Tơ blơ̆