VOV4.Bahnar - Giĕng âu ki, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ tơ ƀâp dôm bơ ngai jang lơ̆m Câu lạc bộ mŭk drăm, Jŏh ayŏ kơ dŏ xoang păng chă tơ mang lăng; kơ dră tang măt ăn dôm dêh char lơ̆m tơ ring Iung tơ blăh Việt Bắc. Pơ ma lơ̆m jơ tơ ƀâp, Kơ dră Kuô̆k hôi pơ ma hơ dăh, kơ jă kăp gĭt đơ̆ng chăl kăch mang Việt Nam ‘nŏh jĭ tơ mam chă tơ mang lăng tôch kăp gĭt, ‘lơ̆ng hơ iă păng hui đei. Yoa thoi nŏh, lơ̆m tơ drong hơ met ming anih chă tơ mang lăng athei tơ mât hơ dai hăm tơ drong vei lăng, tưk tơ iung kơ jă kăp gĭt đơ̆ng jŏh ayŏ kơ dŏ xoang, jơ hnơr arih kăch mang.

Kơ dră Kuô̆k hô̆i Vương Đình Huệ pơ ma hơ dăh, jĭ Covid-19 pơm pơ răm tôch dêh, mă lei kŭm jing tơ drong ‘lơ̆ng tih vă Việt Nam hơ met ming tôm tơ drong tơ̆ anih chă tơ mang lăng Việt Nam kiơ̆ tơ drong tơ chơ̆t kơ sô̆ 08 đơ̆ng Anih tơm Chinh trĭ găh atŏk tơ iung chă tơ mang lăng jing anih jang mŭk drăm tơm păng kiơ̆ Luơ̆t chă tơ mang lăng hlôi đei Kuô̆k hô̆i drơ̆ng nơ̆r; hơ tŏk tơ drong hơ met ming jô̆ hloi găh cham char, anih jang, trong nơ năm, anih tĕch mơ dro păng dôm tơ mam pơ yoa ăn chă tơ mang lăng; tơ plih ming đon tơ chĕng vă hơ nhăk chă tơ mang lăng jing anih jang mŭk drăm atŭm, kiơ̆ trong tơ guăt anih jang păng tơ ring.

Iŏk pơ tih dôm tơ drong jang atŏk tơ iung chă tơ mang lăng đơ̆ng dôm tĕh đak lơ̆m apŭng plenh tĕh găh sơng tơ moi chă tơ mang lăng, tưk tơ iung tơ drong tĕch mơ dro tơ mam tơ̆ rim tơ ring, rim tĕh đak, Kơ dră Kuô̆k hô̆i pơ ma hơ dăh, atŏk tơ iung anih chă tơ mang lăng, kăl hlŏh ‘nŏh jĭ đon tơ chĕng, băt lăng hơ tăih păng pơ jing đei tơ mam ‘lơ̆ng hơ iă hơ drô̆. Yoa thoi nŏh, dôm bơ ngai jang lơ̆m Câu lạc bộ Mŭk drăm, Jŏh ayŏ kơ dŏ xoang păng chă tơ mang lăng athei tơ gop nơ̆r pơ ma vă vang jang hăm Trung ương, tơ ring păng dôm bơ ngai vei lăng hơ tŏk hlŏh dơ̆ng tơ drong chă tơ mang lăng tơ̆ hơ năp kơnh.

Kơ dră Kuô̆k hô̆i tơ chĕng ‘lơ̆ng tơ drong, Anih vei lăng hơ drĕch kon kông kơ Kuô̆k hô̆i, Anih hơ len năng mŭk drăm, jŏh ayŏ kơ dŏ xoang găh Grŭp dôm Khul jang Khoa hŏk, ki thuơ̆t Việt Nam vang pơ gơ̆r hop akŏm păng rơih hơ năn: “Jang hơ doi atŏk tơ iung chă tơ mang lăng hơ dai hăm vei lăng, tưk tơ iung kơ jă kăp gĭt đơ̆ng jơ hnơr arih kăch mang Tơ ring Iung tơ blăh Việt Bắc” hăm 6 dêh char đei: Cao Bằng, Bắc Kạn, Lạng Sơn, Thái Nguyên, Hà Giang, Tuyên Quang:

“Inh lăp đon hăm hơ năn đei rơih năr ‘nâu đơ̆ng Hop akŏm. Chă tơ mang lăng, mă loi ‘nŏh jĭ atŏk tơ iung chă tơ mang lăng tơ klep hăm vei lăng, tưk tơ iung kơ jă kăp gĭt lơ̆m jơ hnơr arih păng kăch mang. Kơ jă kăp gĭt đơ̆ng jơ hnơr arih kăch mang Việt Nam jĭ 1 tơ mam chă tơ mang lăng tôch kăp gĭt, đei tôch lơ păng gơ̆h pơ ma hui kơ đei đơ̆ng Việt Nam pơ têng hăm apŭng plenh tĕh. Yoa thoi nŏh, lơ̆m tơ drong hơ met ming anih chă tơ mang lăng athei tơ mât tơ drong vei lăng, tưk tơ iung kơ jă kăp gĭt đơ̆ng jŏh ayŏ, jơ hnơr arih kơ kăch mang. ‘Nâu jĭ tơ mam jŏh ayŏ tôch lơ, ưh kĕ tôch đơ̆ng bơ̆n”.

Kơ dră Kuô̆k hô̆i tơ roi, đơ̆ng rŏng kơ Hop akŏm jŏh ayŏ kơ dŏ xoang lơ̆m tĕh đak, kiơ̆ nơ̆r pơ ma đơ̆ng Tổng Bí thư Nguyễn Phú Trọng, Đảng păng tĕh đak hlôi pơ jao ăn Anih tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng pơ jing 1 tơ drong jang tih găh atŏk tơ iung joh ayŏ kơ dŏ xoang, lơ̆m nŏh đei tơ drong vei lăng, tưk tơ iung kơ jă kăp gĭt đơ̆ng dôm anih gru groa so lơ̆m jơ hnơr arih.

Kơ dră Kuô̆k hô̆i Vương Đình Huệ athei, tơ drong atŏk tơ iung chă tơ mang lăng đơ̆ng 6 dêh char athei tơ klep kơ jăp hăm tơ drong bơ̆ jang 3 tơ drong jang tơm kơ tĕh đak pơ jing tơ ring tơ rang ‘nao; atŏk tơ iung mŭk drăm, tơ pôl tơ̆ tơ ring kon kông păng groi kông; sut pơ ngot, tơ jur tơ nuh hin kơ jăp ‘lơ̆ng.

Tơ̆ hơ năp kơnh, anih chă tơ mang lăng athei tơ gop tưk hrĕnh tơ drong jang tơ iung ming păng atŏk tơ iung mŭk drăm – tơ pôl, bơ̆ jang kiơ̆ dôm tơ drong tơ chơ̆t, tơ drong tơ gŭm đơ̆ng Kuô̆k hô̆i, Khul kơ dră tĕh đak, lơ̆m nŏh đei tơ drong tơ gŭm ăn bơ ngai jang vă gơ̆h jâng, pơ jing tơ drong ‘lơ̆ng ăn bơ ngai jang sơ đơ̆ng jơ hngâm bơ̆ jang hai.

Kơ dră Kuô̆k hô̆i Vương Đình Huệ pơ ma hơ dăh, Kuô̆k hô̆i, dôm anih jang kơ Kuô̆k hô̆i tôch hơ pơi ‘mĕh Grŭp dôm khul jang Khoa hŏk ki thuơ̆t Việt Nam păng Anih hơ len năng mŭk drăm jŏh ayŏ kơ dŏ xoang, dôm bơ ngai jang lơ̆m Câu lạc bộ hơ nơ̆ng tơ gop nơ̆r, vă hơ met pơ ‘lơ̆ng trong tơ gŭm, dôm tơ drong tơ chơ̆t đơ̆ng Kuô̆k hô̆i; kŭm nhen tơ drong jang dăr lăng ƀơm truh tơ drong ‘nâu. Kuô̆k hô̆i hôn bơ nê păng răp mơ̆ng rim nơ̆r tơ gop mă kiơ̆ khul tơ pôl dăh mă hơ drô̆, dăh mă chih hăm hla ar, vă pơm thoi yơ, Kuô̆k hô̆i roi đunh roi bơ̆ jang roi lăp hăm yăn âu ƀiơ̆.

Dơ̆ng: Tơ blơ̆