VOV4.Bahnar - Lăp đơ̆ng rŏng kơ Hop akŏm mă 3, Kuô̆k hô̆i jăl 15 tôch, khul tang măt Kuô̆k hô̆i dôm dêh char lơ̆m tơ ring Tây Nguyên pơ gơ̆r tơ ƀâp bơ ngai tăh hla hloi. Tơ ƀôh đon hơ iă tơ̆ hơ năp dôm tơ drong jơ nei đơ̆ng hop akŏm, bơ ngai tăh hla 2 dêh char Lâm Đồng păng Gia Lai oei pơ ma tơ lĕch lơ tơ drong gĭt kăl tơ̆ tơ ring hai.

Tơ̆ Lâm Đồng, ƀok Phan Đình Trạc – Kơ dră jang lơ̆m Anih tơm Chinh trĭ, Bí thư Trung ương Đảng, Kơ dră chĕp kơ̆l Ban Nội chính Trung ương kŭm hăm khul tang măt Kuô̆k hô̆i dêh char Lâm Đồng tơ ƀâp bơ ngai tăh hla tơ̆ xăh Đại Lào, plt Bảo Lộc păng xăh Liên Đầm, apŭng Di Linh. 

Kơ dră chĕp kơ̆l Ban Nội chính Trung ương Phan Đình Trạc tơ ƀâp bơ ngai tăh hla Lâm Đồng

Tơ̆ dôm anih tơ ƀâp, bơ ngai tăh hla tơ ƀôh đon hơ iă hăm dôm tơ drong iŏk đei lơ̆m hop akŏm mă 3, mă loi jĭ Kuô̆k hô̆i ‘măn lơ jơ pơ ma nuh, drơ̆ng nơ̆r ăn lơ tơ drong kăl. Atŭm hăm ‘nŏh bơ ngai tang măt oei pơ ma tơ lĕch nơ̆r hăm Khul tang măt Kuô̆k hô̆i dêh char Lâm Đồng dôm tơ drong ‘nao đei kăl đei tơ rĕk truh, sek tơ lang mă ‘lơ̆ng. Lơ̆m nŏh, lơ nơ̆r pơ ma truh tơ drong tơ gŭm ăn anih tĕch mơ dro păng kon pơ lei đơ̆ng rŏng kơ jĭ Covid-19; trong vei sơ đơ̆ng rim kơ jă tơ mam kăl nhen đak xăng, đak dâu, tơ mam vă choh jang xa; vei lăng kơ jă khăm hơ met jĭ, tơ drong tơ gŭm khăm hơ met jĭ kiơ̆ ƀao hiêm; tơ drong vei lăng tĕh, vei lăng tơ drong ming man hnam, vei lăng bri, tơ mam bri brăh; trong pơm hla ar oei lơ, mơ mat tat, trong nơ năm tơ̆ tơ ring tơ rang ưh tam ‘lơ̆ng, krê gre tâm prĕh băl...

Bơ ngai tăh hla Nguyễn Thị Phương, tơ̆ thôn 3, xăh Đại Lào, plt Bảo Lộc, pơ ma: “Đon hơ pơi ‘mĕh đơ̆ng kon pơ lei nhôn, tơ ring yơ kăl chĕng hơ met ‘nŏh chĕng hơ met, tơ ring yơ ưh đei chĕng hơ met ‘nŏh athei pơm hla ar tĕh ăn kon pơ lei vă kon pơ lei sơ đơ̆ng jơ hngâm jang xa. Mưh kăl ‘nŏh chă tŏk iŏk jên đơ̆ng anih mong jên, dăh mă chă chĕng song ăn kon hơ ‘lơ̆p. Kon pơ lei nhôn đei nơ̆r pơ ma apinh hăm anih jang kơ pal thoi nŏh”.

Bơ ngai tăh hla Lâm Đồng pơ ma tơ lĕch lơ tơ drong kăl đei tơ rĕk tơ̆ tơ ring

Kŭm hăm ‘nŏh, bơ ngai tăh hla oei athei hơ tŏk hlŏh dơ̆ng tơ drong jang tang găn xa pơ jĭp, sek tơ lang tơ păt dôm bơ ngai pơm glăi; jăh tơ lĕch jang pơm trong gre kơ dâu hrĕnh Dầu Giây - Tân Phú - Liên Khương.

Dơ̆ng tang ăn Khul tang măt Kuô̆k hô̆i dêh char Lâm Đồng, ƀok Phan Đình Trạc – Kơ dră jang lơ̆m Anih tơm Chinh trĭ, Bí thư Trung ương Đảng, Kơ dră chĕp kơ̆l Ban Nội chính Trung ương chih răk nơ̆r pơ ma apinh đơ̆ng bơ ngai tăh hla păng tơl tơ blang kơ tă 1,2 tơ drong ƀơm truh hơ năp jang kơ dih. Găh tơ drong jang tang găn xa pơ jĭp, ƀok Phan Đình Trạc pơ ma hơ dăh "ưh đei tơ ring kâm, ưh đei lon bu" păng vă hơ nơ̆ng bơ̆ jang pran hlŏh dơ̆ng tơ̆ hơ năp kơnh: 

“Đơ̆ng blŭng jăl mă 13 truh dang ei, 'nao hlŏh 1 sơ năm 1 puăt đĕch mă lei bơ̆n đĭ ki luơ̆t 45 'nu kăn ƀô̆ găh Trung ương vei lăng, păng tơ kêng 21 'nu kăn ƀô̆ găh Trung ương vei lăng. Tam mă lai yơ bơ̆n biơh 1 'măng tơ lĕch hŭt 2 'nu Kơ dră jang lơ̆m Trung ương, đang kơ 'nŏh tơ kêng, rôp kron hloi. Lơ loh nơh, tơ drong jang tang găn xa pơ jĭp tôch pran. Athei đei đon nuih, chu hŭt jơ hngâm đơ̆ng dôm bơ ngai bơ̆ jang 'mơ̆i mă bơ̆n gơ̆h jang đei thoi nŏh. Tơ drong 'nâu ưh jor gô đei bơ̆ jang pran hlŏh dơ̆ng”.

Ƀlep ƀât ‘măng mă âu, Khul tang măt Kuô̆k hô̆i dêh char Lâm Đồng hơ păh 40 tơ pu tơ mam ăn dôm unh hnam tơ nuh, pơ jao 1.000 kơ thŭng đak tŏh đơ̆ng Grŭp jang TH True tơ gŭm ăn hŏk tro tơ nuh tơ̆ 2 xăh Đại Lào păng Liên Đầm.

Lơ̆m giĕng âu ki mơ̆n, Khul tang măt Kuô̆k hô̆i dêh char Gia Lai tơ ƀâp bơ ngai tăh hla tơ̆ 1,2 tơ ring găh dôm apŭng Kông Chro, Ia Pa, Mang Yang păng thĭ xăh Ayun Pa. Dôm tơ drong tơ tŏ nhen kơ jă đak xăng, đak dâu, kơ jă tơ mam vă choh jang xa tŏk; tơ drong tĕch tơ mam đơ̆ng choh jang đei mơ mat tat; pơm hla ar tĕh hiơ̆; tơ drong chă tơ drong jang ăn bơ ngai oei tơ̆ tơ ring tơ rang; tơ mât jên man dơ nâu đak vă pơ yoa ăn choh jang xa... đei bơ ngai tăh hla pơ ma hăm Khul tang măt Kuô̆k hô̆i.

Mă hơ dăh, ƀok Nguyễn Đức Hướng-Phŏ Kơ dră vei lăng kon pơ lei apŭng Kông Chro-đei nơ̆r pơ ma: “Yoa ƀơm lơ tơ drong kơ na kơ jă đak xăng, đak dâu, tơ mam vă choh jang oei tôch măk, ƀơm kơ nê̆ truh tơ drong arih xa, jang xa kơ kon pơ lei. Apinh Kuô̆k hô̆i, Khul kơ dră tĕh đak set hơ len, đei trong tơ gŭm vei sơ đơ̆ng kơ jă đak xăng, đak dâu, tơ mam vă pơ yoa ăn choh jang xa tơ̆ hơ năp kơnh vă pơ jing tơ drong ‘lơ̆ng ăn kon pơ lei tưk tơ iung choh jang xa, mă loi jĭ tơ̆ dôm tơ ring atăih yăih kơ apŭng”.

Tơ̆ apŭng Mang Yang, bơ ngai tăh hla apinh Kuô̆k hô̆i đei trong tưk tơ iung tơ drong tĕch mơ dro tơ mnam đơ̆ng choh jang xa đei ăn kon pơ lei, mă loi jĭ dôm tơ mam tơm tơ̆ tơ ring, vĕh ver tơ drong jang đei lơ, hiong kơ jă, đei kơ jă ‘nŏh jang ưh đei” nhen dôm sơ năm âu ki. Hơ dai hăm ‘nŏh, bơ ngai tăh hla akhan, dôm tơ drong ƀơm truh tơ̆ tĕh, pơm trong gre, tơ drong vei lăng ming man oei đei lơ tơ drong ưh kơ lăp; kơ jă phŏng tŏk kơ plăh ‘nŏh phŏng ya oei tam mă găn đĭ, jing ƀơm kơ nê̆ tôch dêh truh tơ drong choh jang xa kơ kon pơ lei.

Dơ̆ng: Tơ blơ̆