VOV4.Bahnar - Dêh char Dak Lak oei tơ lĕch jang lơ tơ drong jang tih, gĭt kăl, kăl đei tĕh vă tuh kơ lơ̆p truh kơ triu m3. Mă lei, đei 1 tơ drong chrih ‘nŏh lơ̆m dêh char tam mă đei 1 anih sir, kôch iŏk tĕh yơ đei asong hla ar jang. Đơ̆ng nŏh jing pơm ăn lơ tơ drong jang kăl tôch krê bơ̆ jang hiơ̆ hyĭn yoa ưh kơ măh tĕh vă tuh, ƀŭ kơ lơ̆p.

Tơ drong jang pơm trong Hồ Chí Minh jăl trong ver găh Hơ lĕch Buôn Ma Thuột kơ jung vă jê̆ 40km, akŏm đĭ đăng jên jang hlŏh 1.500 ti, yoa Anih vei lăng tơ drong tơ mât jên jang pơm trong păng choh jang xa atŏk tơ iung tơ ring tơ rang dêh char Dak Lak pơm tơ ‘ngla tơ mât jên jang. Tơ drong jang đei tơ lĕch đơ̆ng blŭng sơ năm ‘nâu păng kiơ̆ nơ̆r hơ găt gô pơm đang lơ̆m sơ năm 2023. Tơ drong jang ming man oei tơ ƀâp 1,2 tơ drong mơ mat tat, tơ hlăk tăk, mă loi jĭ tĕh vă tuh pơm trong. Ƀok Hoàng Đình Chương, Kơ dră chĕp kơ̆l Công ty An Nguyên, iŏk jang man 1 jăl kơ sô̆ 4 lơ̆m tơ drong jang pơm trong, kơ jung dang 10km ăn tơ băt, dang ei oei ưh kơ măh dang 200.000 m3 tĕh vă tuh, kơ lăp, pơm ưh ‘lơ̆ng truh khei ‘năr hơ găt ming man.

Kiơ̆ ƀok Chương, hơ năp jang găh tơ ‘ngla tơ mât jên jang păng ‘nâu jĭ tơ drong tôch mơ mat tat mưh tam mă chă đei anih kôch iŏk tĕh vă tuh tơ̆ trong: “Lơ̆m tơ drong hơ găt pơm trong ‘nŏh 1 triu m3 tĕh mă lei oei ưh kơ măh 200.000m3 yoa ưh đei anih vă kôch iŏk tĕh. Lơ̆m âu tơ tă đei ƀât jăl trong kơ sô̆ 4 kơ Công ty An Nguyên, dang ei athei chă 200.000m3 tĕh tơ̆ yơ. Tơ ‘ngla tơ mât jên jang tam mă chă đei anih vă sir, kôch iŏk tĕh.”

Tơ drong jang pơm Trong Hồ Chí Minh trong ver găh Hơ lĕch Buôn Ma Thuột oei bơ̆ jang mă lei ưh kơ măh tĕh vă ƀŭ kơ lơ̆p tơ̆ trong

Ưh kơ măh tĕh vă tuh, kơ lơ̆p hơ met ƀât anih tĕh thŭng kŭm ƀôh tơ̆ lơ tơ drong jang gĭt kăl nai tơ̆ dêh char Dak Lak nhen tơ drong jang tơ ter dơ nâu Ea Tam, hăm kơ sô̆ jên tơ mât jang dang 1.500 ti păng tơ drong jang pơm Trong tih Hơ lĕch – Pơ mât hăm jên jang hlŏh 1.200 ti yoa Anih vei lăng tơ drong jang plt Buôn Ma Thuột pơm bơ ngai tang măt tơ mât jên jang. Ƀok Lê Khắc Đô, Kơ dră lăm vei lăng tơ mam bri brăh, Anih vei lăng tơ mam drăm păng cham char Dak Lak ăn tơ băt, jăl jang adrol ki tơ drong kăl đei tĕh vă ƀŭ, kơ lơ̆p tam đei tơ rĕk truh kơ na lơ̆m dôm tơ drong tơ proh trong jang so ki lơ̆m dêh char ưh đei anih vă sir, kôch iŏk tĕh. Tơ drong kôch iŏk tĕh mă lơ ‘nŏh tơ gĕch iŏk đơ̆ng dôm tơ drong jang nai mă ưh ‘nŏh đơ̆ng tĕh kơ pal kơ anih tĕh tơ mo mă lei tĕh ưh kơ măh vă pơ yoa ăn lơ tơ drong jang oei tơ lĕch jang hrei ‘nâu.

Vă hơ met pơ ‘lơ̆ng tơ drong mơ mat tat ưh kơ măh tĕh tŭh ăn tơ drong jang, khei 2 sơ năm 2022 Anih vei lăng Tơ mam drăm păng cham char Dak Lak roi tơ ƀôh ăn Dơ nŏ anih vei lăng kon pơ lei dêh char, kiơ̆ ăn tơ drong chĕng iŏk anih sir, kôch tĕh, hăm 59 anih, hăm kơ sô̆ tĕh vă kôch iŏk dang 20 triu m3, pơm lăp ăn dôm tơ drong jang ming man. Mă lei, khei ‘năr set hơ len, pơm hla ar ăn dôm anih kôch iŏk tĕh âu athei gô truh 7-8 khei dơ̆ng, 1,2 tơ drong jang rŏ năng jing bơ̆ jang hiơ̆ ƀiơ̆ khei ‘năr hơ găt.

Ƀok Lê Khắc Đô tơ blang dơ̆ng, hăm dôm tơ drong jang ưh kơ măh tĕh vă tuh kơ lơ̆p pơ ma adrô̆, ưh kơ măh tơ mam ming man pơ ma tŭm, ‘nŏh ƀơm truh hơ năp jang đơ̆ng tơ ‘ngla tơ mât jên jang păng anih roi tơ ƀôh, tơ lĕch tơ drong jang: “Hơ năp jang đơ̆ng đe sư ‘nŏh athei hơ len năng tơ mam vă ming man. Mưh chih pơ jing tơ drong jang ‘nŏh athei hơ met tôm tơ mam, kôch, ƀŭ, kơ lơ̆p mă lăp, athei chih hơ dăh anih kôch, tuh tĕh, kŭm nhen dôm tơ mam rơ kăh đơ̆ng ming man, oei tơ dăh ưh kơ măh ‘nŏh ih athei chih hơ dăh anih gơ̆h sir iŏk tơ mam vă pơ yoa ăn tơ drong jang. Anih jang dăr hơ len athei chă rơih dôm anih sir iŏk tĕh mă lăp ăn tơ drong jang, đơ̆ng rŏng kơ ‘nŏh pơm hla ar tơ lĕch trong jang. Vă akhan mưh chih pơ jing tơ drong jang vă tơ mât jên đe sư athei jang kĕh rim tơ drong ‘nŏh bơih, đơ̆ng hơ drol kơ vă jang truh tơ drong gơ̆h jang, rim tơ drong jang athei đei 3 hơ yak.”

Găh tơ drong nai dơ̆ng, ƀok Trần Đình Nhuận, Kơ dră Anih vei lăng tơ mam drăm păng cham char Dak Lak ăn tơ băt, tơ hlăk lơ̆m tơ drong sir, kôch iŏk tĕh vă pơ yoa ăn dôm tơ drong jang ‘nŏh yoa ưh kơ lăp đơ̆ng trong tơ lĕch jang blŭng a hai. Kiơ̆ luơ̆t tĕh, hăm tơ mam bri brăh nhen tĕh ‘nŏh athei jang kiơ̆ tơ drong pơ drơ̆ng nơ̆r. Mă lei tơ drong anih jang năm pơ ma nuh hăm kon pơ lei đa ưh kơ jing yoa đe krao kơ jă tôch măk, đei anih đe krao truh kơ ti hlak jên 1 ha, ưh đei jên vă pơm kiơ̆.

Hăm tơ drong jang gĭt kăl kơ tĕh đak, Kuô̆k hô̆i, Khul kơ dră tĕh đak đei tơ drong tơ chơ̆t hơ drô̆ vă hơ met pơ ‘lơ̆ng tơ drong tơ hlăk tăk mă lei hăm dôm tơ drong jang tơ̆ tơ ring ‘nŏh tôch mơ mat: “Kiơ̆ trong 3, Apăng 62 Luơ̆ tĕh ‘nŏh Tĕh đak iŏk pơ dreu tĕh pơm tơ mam mă lei ưh kơ jô̆ hăm dôm tơ mam hmă, vă akhan tĕh vă ƀŭ kơ lơ̆p, chuơh, tơ mo hơ ga athei pơ drơ̆ng hăm băl. Lơ̆m tơ drong ‘nâu, tơ dăh tĕh đak iŏk pơ dreu vă pơm hla ar hơ len năng, kôch iŏk tĕh ăn dôm tơ drong jang kơ tĕh đak ‘nŏh, đơ̆ng blŭng vă tơ mât jên jang athei chih hơ dăh tơ drong jang đơ̆ng tĕh đak vă gơ̆h pơm hla ar iŏk pơ dreu. Tơ̆ dôm tơ drong jang tih pơ tih gia nhen trong gre kơ dâu hrĕnh Bắc- Nam ‘nŏh Kuô̆k hô̆i, Khul kơ dră tĕh đak đei tơ drong tơ chơ̆t hơ drô̆. Mă lei dôm tơ drong jang găh dêh char, apŭng ‘nŏh tôch mơ mat.”

Tơ drong ưh kơ măh tĕh vă ƀŭ, kơ lơ̆p oei pơm ăn lơ tơ dỏng jang tih, gĭt kăl tơ̆ Dak Lak rŏ năng gô jang kĕh hiơ̆ ƀiơ̆ năr hơ găt. Kŭm hăm dôm tơ drong ưh kơ lăp lơ̆m tơ drong tơ proh trong jang, dăr hơ len, chih pơ jing tơ drong jang, hơ năp jang đơ̆ng dôm tơ ‘ngla tơ mât jên jang păng dôm anih jang đei ƀơm truh ‘nŏh tơ drong kôch iŏk tĕh vă pơ yoa ăn dôm tơ drong jang kŭm oei đei tơ drong tơ hlăk găn trong kăl đei hơ met pơ ‘lơ̆ng đơ̆ng blŭng hloi, ƀơm truh tơ̆ tĕh păng tơ mam vă pơ yoa ăn ming man.

Công Bắc: Chih

Dơ̆ng: Tơ blơ̆