Tơbăt 77 sơnăm Năr Lĭnh jĭ rơka lĭnh lôch tang ăn teh đak (27/7), Kơdră teh đak hlôi asong tơmam ăn kơ vă jê̆ 1,4 triệu ‘nu bơngai đei kŏng hăm kach mang, ŭnh hnam bơngai đei kŏng hăm kơ sô̆ jên vă jê̆ 420 ti hlak jên. Khŭl kơdră teh đak kŭm hlôi tơlĕch ăn Tơdrong tơchơ̆t kơsô̆ 77, ‘năr 01/7/2024 tơchơ̆t hơmet ming jên tơgŭm bơngai đei kŏng hăm kach mang hăm kơsô̆ jên tŏk jô̆ păh lăp 35,7%.

‘Nâu jĭ kơ sô̆ tŏk lơ hloh dôm ‘măng hơmet ming, đei tơpôl păng bơngai đei kŏng, ŭnh hnam bơngai đei kŏng hôn bơnê, tơgŭm. Anih tơm vei lăng găh bơngai jang lĭnh jĭ rơka păng tơpôl hlôi pơgơ̆r hơmet ‘lơ̆ng ƀlep hơnăn chih hơnih pơsat lĭnh lôch tang ăn teh đak. Tơdrong bơngơ̆t truh, vei lăng, bơ̆jang ‘lơ̆ng tơdrong jang ƀlŏk bơnê ưh khan lăp tơƀôh tơdrong ‘mêm, tơdrong ƀlŏk hơdơ̆r gĭt kăl hăm đe lĭnh jĭ rơka, lĭnh jĭ jăn, ŭnh hnam lĭnh lôch tang ăn teh đak păng bơngai đei kŏng hăm kach mang, vă pơm dă ƀiơ̆ tơdrong ơh sơ ‘ngon đơ̆ng bơngai oei hơrih mă oei jing hơnăp jang đơ̆ng jơhnơr năr ‘nâu păng ning nai kơnh hăm dôm bơngai hlôi hŭt hơkâu ăn tơdrong rơngei hiôk hian kơ teh đak.