Đei “Kon pơlei lui, Đảng rơih ăn jang” sơnăm ‘nâu jĭ jăl jang mă 2 ƀok Đỗ Hiền Lương iŏk jang kơchư̆k Bí thư Chi ƀô̆ pơm hloi ƀok pơgơ̆r thôn 2, thĭ trơ̆n Sa Thầy, apŭng Sa Thầy. Vă jang kĕh hơnăp jang pơm Bí thư Chi ƀô̆ hăm 67 ‘nu đảng viên păng ƀok pơgơ̆r pơlei tơ̆ tơring tŏk bŏk apŭng, đei tơdrong ‘mĕh vă jang tŏk ‘lơ̆ng găh choh jang xa păng tĕch mơdro, pơvih pơvăn, kiơ̆ ƀok Lương, athei jing bơngai tơgăl hăm Đảng, đĭ jơhngâm hăm kon pơlei, gơ̆h pơma xa tơguăt đĭ đăng bơngai:

“Tơdrong jang tơ̆ tơring đei lơ tơdrong, ưh gơ̆h jô̆ jơnăr, đei tơdrong ‘nŏh athei bơ̆ jang, sek tơlang hloi. Kon pơlei lui pôk hơtŏk ba ‘nŏh ba athei jang mă lăp hăm đon lui đơ̆ng kon pơlei, sek tơlang rim tơdrong ăn kon pơlei mă tơgăl, ưh gơ̆h lê̆ đei tơdrong hil hơreh teh hơvĕng đơ̆ng kon pơlei lơ̆m pơlei, dăh mă đơ̆ng plei ‘nâu hăm plei to. Đơ̆ng năr inh jang truh dang ei tam mă đei tơdrong kiơ mă anih jang kơpal hil chrih kơ inh ră. Pơma atŭm rim tơdrong đei bơ̆ jang, sek tơlang ‘lơ̆ng ngăl”.

Vă bơ̆ jang kiơ̆ trong tơmât hơdai kơchư̆k Bí thư Chi ƀô̆ pơm hloi Kơdră pơgơ̆r pơlei păng Bí thư Chi ƀô̆ pơm hloi bơngai vei lăng Khul jang Mặt trận pơlei, lơ̆m dôm sơnăm âu ki Anih chĕp kơ̆l đảng apŭng Sa Thầy năng kăl tơdrong chă rơih bơngai, athei rơih bơngai rơgei, đei jơhngâm đon tơpăt ‘lơ̆ng, bơ̆ jang hơbĕch hơbal păng đei grih dơ̆ng. Gơnơm thoi noh khul Bí thư chi ƀô̆ pơm hloi Kơdră pơgơ̆r pơlei hlôi jang ‘lơ̆ng hơnăp jang chĕp kơ̆l pơgơ̆r chinh trĭ, jĭ bơngai đei lui yom tơ̆ rim chi ƀô̆, pơlei pơla.

Yă Y Sâm, Phó Bí thư chĕp kơ̆l đảng, Kơdră Jơnŭm pơgơ̆r kon pơlei apŭng Sa Thầy ăn tơbăt: “Tơdrong mă blŭng athei chih hơdăh ‘nŏh jĭ tơdrong chă rơih bơngai jang. Chă rơih dôm bơngai đei bưng ai, đei grih, dôm bơngai hlôh vao kơjăp trong jang đơ̆ng Đảng, khôi luơ̆t teh đak. Kon pơlei athei lui, Đảng rơih ăn bơ̆ jang. Tơring pơmat tat ‘nŏh athei hơlen năng hăm đe kăn ƀô̆ mơlôh, druh dăm, mă loi jĭ hăm đe kon mon đei hŏk truh um. Mă 2 dơ̆ng hăm đe kon mon ‘nao brŏk đơ̆ng pơm ƀô đô̆i vă iŏk tơmât lơ̆m Đảng, pơtho pơhrăm pơjing khul jang tơ̆ tơring”.  

Hăm đon pơhnŏng jang đang trong jang đơ̆ng Trung ương păng đơ̆ng dêh char, truh khei 8/2023 lơ̆m 64 pơlei găh 11 xăh, thĭ trơ̆n kơ apŭng Sa Thầy đĭ đei 53 ‘nu Bí thư Chi ƀô̆ pơm hloi Kơdră pơgơ̆r pơlei păng 11 ‘nu Bí thư Chi ƀô̆ pơm hloi Bơngai vei lăng Khul jang Mặt trận pơlei. Mă tơpă ăn ƀôh tơdrong tơmât hơdai kơchư̆k Bí thư chi ƀô̆ pơm hloi Kơdră pơgơ̆r pơlei dăh mă Bơngai vei lăng khul jang Mặt trận pơlei hlôi tơgŭm tơjur đei lơ bơngai jang lơ̆m khul kơdră pơgơ̆r, tơjur đei 64 kơchư̆k vei lăng tơ̆ pơlei pơla păng tơdrong jang đei akŏm ăn 1 ‘nu, mưh tơlĕch jang kŭm ƀônh ƀiơ̆.

Gơnơm rơih đei dôm bơngai rơgei chĕp  kơ̆l pơgơ̆r, vei lăng, bơ̆ jang hơbĕch hơbal, pơ̆n tơchĕng, pơ̆n jang păng jang tơnăp, đei bưng ai, đei grih hăm kon pơlei kơna bơ̆ jang tôch đei yoa. Ƀok Phan Chí Thiện, Bí thư Đảng xăh Ya Ly, apŭng Sa Thầy pơma hơdăh: “3 pơlei kon kông ‘nŏh đei Bí thư Chi ƀô̆ pơm hloi Kơdră pơgơ̆r pơlei ‘nŏh jĭ bơngai kơtă lơ̆m pơlei ‘mơ̆i, hlôh vao hơdăh kon pơlei, băt hơdăh rim tơdrong jang mŭk drăm, tơdrong arih xa kơ kon pơlei kơna tôch ƀônh mưh bơ̆ jang pơm Bí thư Chi ƀô̆ kiơ̆ trong jang đei tơlĕch păng pơm hloi Kơdră pơgơ̆r pơlei. Tôch kơ ƀônh hiôk mưh bơ̆ jang kiơ̆ dôm trong jang đơ̆ng Đảng, khôi luơ̆t teh đak”.

Oei ƀok Nguyễn Minh Thuận, Bí thư Đảng thĭ trơ̆n Sa Thầy, apŭng Sa Thầy ‘nŏh pơma: “Anih chĕp kơ̆l Đảng kŭm adrin jang kĕh tơdrong tơmât hơdai kơchư̆k ăn 1 ‘nu bơngai jang âu. Hiôk hian ‘nŏh bơngai âu gơ̆h sơng iŏk, pơgơ̆r jang kiơ̆ trong jang đơ̆ng Đảng tôch tơtom, păng sư jĭ bơngai chih tơlĕch trong pơgơ̆r, bơ̆ jang lơ̆m tơpôl tơ̆ pơlei kơdih hai. Tơdrong hiôk mă 2 ‘nŏh, kiơ̆ đơ̆ng tơdrong tơiung pơjing Đảng sư gơ̆h hơtŏk păng tơplih ‘nao trong bơ̆ jang, hơnăp chĕp kơ̆l đơ̆ng Đảng mă loi jĭ hơnăp jang đơ̆ng Bí thư tơ̆ pơlei pơla”.

Đơ̆ng dôm tơdrong jang đei blŭng a mưh bơ̆ jang kiơ̆ trong tơmât hơdai kơchư̆k Bí thư Chi ƀô̆ pơm hloi Kơdră pơgơ̆r pơlei păng Bí thư Chi ƀô̆ pơm hloi Bơngai vei lăng khul jang Mặt trận pơlei, Anih chĕp kơ̆l Đảng apŭng Sa Thầy oei hơnơ̆ng hơlen năng, tưk tơiung, pơlung jang păng chă hơlen năng, hơdai hăm ‘nŏh đei trong hơmet ming mă tơtom vă dôm bơngai đei “Kon pơlei lui, Đảng rơih ăn jang” bơ̆ jang ‘lơ̆ng hơnăp jang đơ̆ng kơdih. Găh đunh ning mônh kơnh, Anih chĕp kơ̆l Đảng apŭng Sa Thầy vă hơnơ̆ng hơlen năng tơdrong hŏk pơhrăm, đon hlôh vao, bưng ai đơ̆ng đe kăn ƀô̆ tơ̆ pơlei pơla, đảng viên tơ̆ dôm chi ƀô̆ vă chă rơih bơngai jang; năng kăl tơdrong pơtho pơhrăm ming, hơtŏk đon rơgei păng đei trong tơgŭm mă lăp vă khul bơngai âu sơđơ̆ng jơhngâm bơ̆ jang. Jô̆ atŭm lơ̆m dêh char Kon Tum, đĭ đei 360 lơ̆m kơsô̆ 756 pơlei pơla, kueng kơphô̆ đei Bí thư Chi ƀô̆ pơm hloi Kơdră pơgơ̆r pơlei păng Bí thư Chi ƀô̆ pơm hloi Bơngai vei lăng Khul jang Mặt trận tơ̆ pơlei. Tơdrong tơmât hơdai 2 kơchư̆k ăn 1 ‘nu bơngai jang vang tơgop pơm tơjur đei kăn ƀô̆ tơ̆ pơlei pơla.