VOV4. Bahnar - Ƀlep lơ̆m năr tơbăt 75 sơnăm Năr Bơngai rơka, Lôch dŏng tĕh đak, năr 10/7, Dơnŏ anĭh Đảng, Jơnŭm vei lăng kon pơlei, Dơnŏ anĭh vei lăng kon pơlei, Dơnŏ anĭh Măt trân Tổ Quốc Việt Nam dêh char Hà Giang pơgơ̆r groong ƀŭ 10 kơl ƀô̆ đô̆i lôch dŏng tĕh đak hlôi lôch răm lơ̆m ‘măng tơblăh vei lăng Tĕh đak tơ̆ Pơsat tĕh đak Vị Xuyên. Vang năm đei Kơdră chĕp pơgơ̆r Tĕh đak Trương Tấn Sang, Kơ iĕng Thủ tướng Tĕh đak Vũ Đức Đam. Lơ̆m jơ pơgơ̆r, rim kơdră hlôi sŏh hlôt nhang, tơbăt jơhngơ̆m đon hôn bơnê tơdrong tơgop tĭh tên đơ̆ng rim ƀô̆ đô̆i nuih mơng lơ̆m ‘măng tơblăh păng vei lăng Tĕh đak. ‘Nau jing dôm ƀô̆ đô̆i hlôi tơ klep kơ jăp atŭm hăm khŭl ƀô̆ đô̆i păng kon pơlei rim hơdrung dêh char Hà Giang vang iung tơblăh nuih mơng păng lôch răm, hơdrin vei lăng năng tông kĕ gei groi tĕh păh Tu tĕh đak. Tơ̆ jơ pơm lêh, kơdrơ̆m kon pơlei păng rim ƀô̆ đô̆i so hlôi vang năm tơblăh tơ̆ kơdrăn tơblăh Vị Xuyên sơ̆ tơbăt jơhngơ̆m đon ƀrơ̆k mơmat mư̆h ƀô̆h kơ măt rim bôl boăl ƀô̆ đô̆i lôch dŏng tĕh đak đei groong ƀŭ tơ̆ Pơsat tĕh đak Vị Xuyên.

Tơblơ̆ nơ̆r: Amazưt