Jang tơbôl păng mât hơdai hăm apŭng plenh tĕh ăn khul drŏ kăn chĕp kơ̆l ưh lăp pơtruh ăn đe mŏ oh lơ tơdrong tơroi trŏ ƀlep găh tơdrong jang tơbôl đơ̆ng Việt Nam lơ̆m chăl ‘nao; Tơdrong pơvei đơ̆ng dôm teh đak tih lơ̆m apŭng plenh tĕh păng tơdrong đei ƀơm truh tơ̆ Việt Nam; Trong jang roi tơbăt chăl ‘nao păng tơmât yoa kơmăy sô̆; Dôm tơdrong hơgăt găh lêh sơng tơmoi, pơgơ̆r hop akŏm apŭng plenh tĕh… đơ̆ng dôm tơdrong jang tôch rơđăh ‘nŏh sư roi pơm hơtŏk hlŏh dơ̆ng đon hlôh vao ăn kăn ƀô̆ drŏ kăn.

Tơ̆ dêh char Sóc Trăng, tơdrong hơlen năng vă hơtŏk tơdrong ‘lơ̆ng ăn khul kăn ƀô̆, bơngai jang kơ teh đak tơ̆ xăh, lơ̆m noh đei kăn ƀô̆ drŏ kăn bơngai kon kông, pơm lăp đon rim bơngai păng khul grŭp hăm tơdrong pơvih pơvăn đơ̆ng dôm anih jang kơ teh đak mưh chă pơm bơ̆n hla ar, vang tơgop pơm hơtŏk tơdrong ‘lơ̆ng mưh hơmet ming trong pơm hla ar ‘nŏh jĭ tơdrong jang đei bơ̆ jang hơnơ̆ng. Kiơ̆ đơ̆ng dôm ‘măng hơlen năng tơgŭm ăn đe kăn ƀô̆, bơngai jang kơ teh đak tơ̆ xăh, đe mŏ oh drŏ kăn pơm kăn ƀô̆ băt hơdăh hơnăp jang, đơ̆ng noh jang đang ‘lơ̆ng tơdrong jang đei pơjao.

Mŏ Phan Thị Lầu, bơngai jang tơ̆ Anih pơvih – chih jô̆, Anih vei lăng kon pơlei phường 2, Thĭ xăh Ngã Năm, dêh char Sóc Trăng ăn tơbăt: “Inh ƀôh đĭ đăng kăn ƀô̆, bơngai jang kơ teh đak hrei ‘nâu hơnơ̆ng bơ̆ jang hăm kơmăy phầm mềm tơ̆ 1 anih jang kiơ̆ kơmăy jang trư̆k tuyê̆n. Kơna athei kăn ƀô̆, bơngai jang kơ teh đak băt hơdăh găh tin hŏk, gơ̆h yoa kơmăy tĭnh lơ̆m tơdrong jang vă bơ̆ jang ‘lơ̆ng tơdrong jang.”

Hơtŏk đon rơgei ăn kăn ƀô̆ drŏ kăn sư tơgŭm ăn drŏ kăn sơđơ̆ng jơhngâm tơƀôh kơdih kâu, sơđơ̆ng jơhngâm mât hơdai hăm apŭng plenh tĕh. Tơ̆ dêh char Phú Yên, lơ tơring hlôi păng oei hơtŏk hơnăp jang chĕp kơ̆l đơ̆ng đe drŏ kăn tơ̆ anih jang đảng, vang tơgop pơjing anih jang chinh trĭ pran kơjăp rim tơdrong.

Jĭ bơngai jang lơ̆m khul chĕp kơ̆l Đảng, lơ sơnăm pơm Kơdră vei lăng Khul drŏ kăn xăh Sông Hinh, apŭng Sông Hinh, tơring đei hlŏh 90% kon pơlei bơngai kon kông, mŏ K’So H’Vỹ hơnơ̆ng jang ‘lơ̆ng hơnăp jang chĕp kơ̆l, roi tơbăt, krao hơvơn kon pơlei pơm kiơ̆ trong jang đơ̆ng Đảng, khôi luơ̆t teh đak păng atŏk tơiung mŭk drăm lơ̆m hnam, hơmet pơ ‘lơ̆ng tơdrong arih xa, jang tŏk klăih đơ̆ng tơnuh hin: “Khul hơnơ̆ng pơgơ̆r lơ ‘măng hŏk hôp tơ̆ dôm grŭp, kiơ̆ đơ̆ng noh vă đe mŏ oh drŏ kăn băt hơdăh tơdrong ‘mĕh vă jang tŏk mŭk drăm đơ̆ng rim mŏ oh.”

Hăm trong jang tơmât hơdai tơdrong chă rơih, pôk hơtŏk kăn ƀô̆ drŏ kăn, mă loi jĭ đe kăn ƀô̆ gơ̆h hơgei, gơ̆h tŏk jang tih dơ̆ng, apŭng Sông Hinh hlôi bơ̆ jang hơdoi 2 tơdrong tơplih kăn ƀô̆ pơlơh băl năm jang kiơ̆ đơ̆ng tơmât lơ̆m hơnăp jang đơ̆ng Bí thư Đảng xăh hăm bơ̆ jang kiơ̆ tơdrong tơchơ̆t đei tơlĕch.

Yă Trương Thị Thu Hà, Bí Thư Đảng xăh Ealy, apŭng Sông Hinh ăn tơbăt: “Nhôn oei hơnơ̆ng tơrek truh tơdrong pơtho pơhrăm ming dơ̆ng. Mă loi jĭ pơlơ̆h kăn ƀô̆ năm jang, ‘nâu jĭ 1 tơdrong ‘lơ̆ng vă nhôn pơhrăm băl jang tơ̆ tơring, băt hơdăh tơring, hŏk iŏk đơ̆ng tơring vă gơ̆h hơmet pơ ‘lơ̆ng kơdih kâu”.

Ƀok Nguyễn Bá Kim, Phŏ Kơdră Anih pơgơ̆r đảng dêh char Phú Yên ăn tơbăt: “Khul kơdră chĕp kơ̆l đảng, Khul kơdră pơgơ̆r tơring păng dôm anih jang kơpal hơnơ̆ng tơrek truh tơdrong chă rơih hơmet bơngai jang. Kiơ̆ đơ̆ng noh chă rơih đei khul kăn ƀô̆ drŏ kăn, mă loi jĭ kăn ƀô̆ drŏ kăn bơngai kon kông vang truh hăm dôm lăm pơtho pơhrăm ming. Hơtŏk đon hlôh vao, bơ̆ jang gơ̆h ăn kơdră vei lăng”.

Rơih hơmet bơngai đơ̆ng hrôih, pơtho pơhrăm trŏ trong, pơjao tơdrong jang kiơ̆ đon rơgei hơdai hăm đon tơnăp, adrin jang tŏk đơ̆ng đe mŏ oh, đon hlôh vao, gơ̆h hơgei đơ̆ng đe kăn ƀô̆ drŏ kăn tơ̆ tơring groi kông, tơring kon kông oei xa kơ dêh char Phú Yên đei tŏk ‘lơ̆ng păng hơnhăk tơdrong đei yoa ‘lơ̆ng mưh bơ̆ jang atŏk tơiung mŭk drăm, tơpôl tơ̆ tơring. ‘Nâu kŭm jing tơdrong ‘lơ̆ng vă kăn ƀô̆ drŏ kăn bơngai kon kông hơtŏk đon hlôh vao, gơ̆h hơgei găh tơdrong jang tơbôl, mât jang hơdai hăm apŭng plenh teh.