VOV4.Bahnar - ‘Năr 19/8, Jơ nŭm pơ gơ̆r kon pơ lei dêh char Dak Lak jăl X, đơ̆ng 2021-2026 pơ gơ̆r hop akŏm kiơ̆ tơ drong jang ‘măng mă 5 vă hơ len năng, tơ chơ̆t lơ trong jang tih. Tơ̆ hop akŏm dôm bơ ngai tang măt set hơ len, drơ̆ng nơ̆r ăn 12 tơ drong tơ chơ̆t gĭt kăl, lơ̆m nŏh đei 7 tơ drong tơ chơ̆t ƀơm truh 3 tơ drong jang tơm kơ tĕh đak găh atŏk tơ iung mŭk drăm, tơ pôl tơ̆ tơ ring kon kông păng groi kông, tơ drong jang sut pơ đĭ pơ ngot rơ vĕt, tơ jur tơ nuh hin kơ jăp ‘lơ̆ng, pơ jing tơ ring tơ rang ‘nao đơ̆ng 2021-2025.  

Jơ bơ̆ jang lơ̆m hop akŏm

Mă hơ dăh, tơ drong tơ chơ̆t găh atŏk tơ iung mŭk drăm tơ pôl tơ̆ tơ ring kon kông păng groi kông sơ năm 2022, dêh char vă tơ jur 3,5% kơ sô̆ unh hnam tơ nuh. Akŏm đĭ đăng kơ sô̆ jên bơ̆ jang tơ drong ‘nâu hlŏh 443 ti. Tơ drong tơ chơ̆t bơ̆ jang tơ drong jang tơm kơ tĕh đak pơ jing tơ ring tơ rang ‘nao truh sơ năm 2025, Dak Lak adrin đei 4 apŭng, 100 xăh jang kĕh tơ drong pơ jing tơ ring tơ rang ‘nao. Vă jang đei tơ drong ‘nâu, Jơ nŭm pơ gơ̆r kon pơ lei dêh char Dak Lak drơ̆ng nơ̆r trong tơ lĕch jên jang atŏk tơ iung hăm kơ sô̆ jên tĕh đak lơ̆m 5 sơ năm 2021-2025 ‘nŏh 1.557 ti, lơ̆m nŏh jên Trung ương đei 657 ti, jên dêh char đei 900 ti.

Dơ̆ng: Tơ blơ̆