VOV4.Bahnar - Kơsơ̆ năr 8/8, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ pơm tơm jơ bơ̆ jang đơ̆ng Khŭl Kơdră chĕp pơgơ̆r Kuô̆k hô̆i hăm Dơnŏ anĭh tơm vei lăng Mŭk drăm bri brăh păng Cham char găh tơdrong hơmet ming, tơmơ̆t dơ̆ng Khôi luơ̆t Groi tĕh. Tơbăt tơ̆ jơ bơ̆ jang, Kơdră chĕp pơgơ̆r Dơnŏ anih tơm vei lăng Mŭk drăm Bri brăh păng Cham char Trần Hồng Hà tơbăt, trong pơjing hơmet ming Khôi luơ̆t groi tĕh tŏk bŏk iŏk nơ̆r tơgop đơ̆ng rim bơngai ƀơm trŭh đei pơjing kiơ̆ trong lăng kơ jăp Tơdrong tơchơ̆t 18, rim Tơdrong tơchơ̆t, nơ̆r pơma pơtôch anai vă hơmet pơ ‘lơ̆ng tôm tong, tơtom rim trong jang, trong tơlĕch jang đơ̆ng Đảng găh vei lăng păng iŏk yua tĕh; sơđơ̆ng kiơ̆ yok so, tơdrong sơđơ̆ng kơ tơdrong jang Khôi luơ̆t ... Lơ̆m khei ‘năr tơ iung pơjing Khôi luơ̆t, Dơnŏ anĭh tơm jei hlôi lăng hơlen hlŏh 100 Khôi luơ̆t, khôi luơ̆t tơm đei ƀơm trŭh groi tĕh vă tơlĕch ăn ming hơmet hloi lơ̆m Khôi luơ̆t au dăh mă tơlĕch hơmet ming rim khôi luơ̆t đei ƀơm trŭh vă sơđơ̆ng trŏ lăp dĭh băl kơ Khôi luơ̆t Groi tĕh (hơmet ming) gô đei Kuô̆k hô̆i ăn tơgop nơ̆r ‘măng mă blŭng tơ̆ ‘Măng hop akŏm mă 4, Kuô̆k hô̆i jăl XV păng tơchĕng hơlau gô pơdrơ̆ng kiơ̆ lơ̆m 3 ‘măng hop akŏm, hơdrin trŭh sơnăm 2023 pơm keh đang hơmet ming Khôi luơ̆t Groi tĕh.

Kơdră chĕp pơgơ̆r Kuô̆k hô̆i Vương Đình Huệ athei, Khŭl kơdră chĕp pơgơ̆r tĕh đak pơtrŭh ăn hla bơar hô sơ Khôi luơ̆t ăn rim hơnih bơ̆ jang kơ Kuô̆k hô̆i hơdrol năr 1/9 vă lăng hơlen, ăn tơgop nơ̆r tơ̆ ‘măng hop akŏm Dơnŏ anĭh chĕp pơgơ̆r Kuô̆k hô̆i.

Tơblơ̆ nơ̆r: Amazưt