VOV4.Bahnar - Kơsơ̆ năr 12/8, tơ̆ Hnam Kuô̆k hô̆i pơgơ̆r Pơma đam apĭnh jet khŭl joatw jang găh Trong vă pơjing Khôi luơ̆t khăm, ming hơmet jĭ jăn (hơmet ming) kơ yuơ Dơnŏ anĭh tơm Chă tơchĕng hơlen Khôi luơ̆t păng Dơnŏ anĭh bơ̆ jang Tơpôl kơ Kuô̆k hô̆i pơm tơm. Kơdră chĕp pơgơ̆r Kuô̆k hô̆i Vương Đình Huệ vang năm. Iung pơma tơ̆ pơma đam, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Khôi luơ̆t khăm, ming hơmet jĭ jăn (hơmet ming) ‘nŏh jing tôch gĭt kăl. ‘Nau jei jing minh trong vă pơjing khôi luơ̆t tôch mơmat tat, mă kăl lơ̆m khei ‘năr hrei au, lăp đơ̆ng rŏng đei ƀơm kơnê̆ kơtang kơ yuơ jĭ hơbŭh Covid-19 pơm ăn. Tơ̆ pơma đam, rim bơngai joăt jang, bơngai khoa hŏk hlôi pơma dơnŭh tơgop nơ̆r găh pơm pơkeh rim tơdrong tơchơ̆t găh kơ jă khăm ming hơmet ji jăn; tơpôl vang iung jang pơgang, jang hơdoi tĕh đak hăm kon pơlei tơmơ̆t jên jang pơgang păng mĭnh ƀar tơdrong anai kơ trong vă pơjing Khôi luơ̆t khăm, ming hơmet jĭ jăn (hơmet ming); kon jên tơmơ̆t jang ăn khăm, ming hơmet jĭ jăn păng tơpôl vang jang. Rim kơdră tang măt akhan, trong jang khôi luơ̆t găh jang pơgang kăl pơđĭ trong tơlĕch jang păng yan au, vei lăng trong jang jên hu mă tơpăt hơdăh, sơđơ̆ng lăp đon kon pơlei, ‘nau jing tơdrong kăl hlŏh lơ̆m trong bơ̆ jang vei lăng năng tông erĭh sa tơpôl.

Tơblơ̆ nơ̆r: Amazưt