Kră pơlei Y Đheh Ayun, 65 sơnăm, hơdrung Êđê, oei tơ̆ ƀuôn Phơng, tơring Ea Tul, apŭng Cư Mgar, dêh char Dak Lăk mơ̆t jang đảng lơ̆m mă sư 25 sơnăm. Ƀok đei kon pơlei lơ̆m pơlei đĭ jơhngơ̆m đon yom kiơ̆ kơ yuơ ƀok ling lang nơ̆r pơma tơ-‘ngla iung jang hloi. Lơ̆m pơlei, tơdăh ŭnh hnam ayơ tơnap tap găh mŭk drăm ƀok dơ̆ng pang tang măt chă hơvơn, tơgŭm djru găh kon jên jang sa păng pơtho ăn trong jang sa.

Tơ̆ rim ‘măng hop akŏm kon pơlei, ƀok Y Đheh Ayun jei ‘măn lơ jơ ‘năr pơma tơbăt truh dôm trong jang hơ iă, trong jang ‘nao mă kon pơlei lơ̆m pơlei gơ̆h jang kiơ̆ vă atŏk tơ iung mŭk drăm unh hnam. Kơdih ƀok jei hơnơ̆ng iung jang hơdoi hăm kơdră đảng, kơdră chĕp pơgơ̆r tơring pơchoh trong ăn Ƀĭ thư Chi ƀô̆ găh bơ̆ jang băt hơdăh dôm tơdrong au to lơ̆m pơlei. Ƀok Y Đheh Ayun pơma: “Đơ̆ng sơ̆ khơ̆ dang ei kon pơlei lơ̆m pơlei Phơng pơma atŭm ‘noh ưh kơ đei bơngai bu pơm kiơ̆ nơ̆r khul kơnê̆ chă pơhlŭ pơdôr pơm tơdrong kơnê̆ au to ôh. Mă ƀar dơ̆ng ‘nŏh pơrô̆ pơrôp pơtho ăn kon pơlei vei răk tơƀăk mong dôm tơdrong oei sa joăt joe ‘lơ̆ng rŏ sơ̆ ki kơ hơdrĕch hơdrung Êđê bơ̆n tơ̆ au”.

Hăm ƀok Y Ngôn Knul, oei tơ̆ ƀuôn Triă, tơring Ea Tul, apŭng Cư Mgar, dêh char Dak Lăk, 30 sơnăm jang đảng viên Đảng cộng sản Việt Nam ling lang tơƀlŏk ăn kơ ƀok găh hơnăp jang pơm jŭk yŭk trong hơlau lơ̆m jang kiơ̆ kơjăp ‘lơ̆ng trong bơ̆ jang đơ̆ng Đảng, khôi luơ̆t Teh đak. Rim năr, ƀok Y Ngôn Knul oei hơnơ̆ng chă năm ngôi tơ̆ rim ŭnh hnam lơ̆m kơtum kơtŏng ‘nhŏng oh vă băt hơdăh jơhngơ̆m đon hơpơi ‘meh vă, pơtho khan ăn kôn mon kon sau lơ̆m kơtum kơtŏng pơm kiơ̆ ‘lơ̆ng khôi luơ̆t, ưh kơ pơm glăi rim tơdrong tơpôl. Ư̆h khan lăp hơdrô̆ lơ loh, ƀok Y Ngôn Knul oei jing bơngai ‘lơ̆ng hơ iă hloh lơ̆m pơrô̆ pơrôp, pơtho khan ăn kon pơlei tơgoăt tơgoăl pôm nơ̆r ƀơ̆r đon, ‘mêm kơ eng dih băl, tơgŭm djru dih băl. “Khei năr au ki nhôn pơgơ̆r pơtho khan ăn kon pơlei lơ̆m pơlei Triă, mă kăl ‘noh hlôi pơgơ̆r sek tơlang mĭnh ƀar ŭnh hnam chă tơhil dih băl. Hơdrol vă tơlang ăn nhôn jei apĭnh hơlen tôch hơdăh găh tơdrong chă tơhil dih băl kơ yuơ kă kiơ mă đei tơdrong lơ lau. Kiơ̆ đơ̆ng noh mă đei trong tơlang ăn, tơblang hơdăh ăn. Pơma atŭm rim tơdrong nhen chă sek tơlang jei keh đang ‘lơ̆ng hơ iă ngăl”.

          Kiơ̆ đơ̆ng ƀok Lê Quang Bất, Kơdră chĕp pơgơ̆r Hơnih vei lăng kon pơlei tơring Ea Tul, apŭng Cư M’Gar, lơ̆m rim pơlei kơ bơngai Êđê, kră pơlei ‘noh jĭ dôm bơngai đei kon pơlei yom hloh vă vei lăng năng tông tơdrong sơđơ̆ng tơpôl lơ̆m pơlei pơla. Hrei au, atŭm hăm hơnăp jang đảng viên, đe hăp đei lơ tơdrong tơgop gĭt kăl, jĭ dôm bơngai kăl hlŏh atŭm hăm kơdră tơring lơ̆m pơrô̆ pơrôp, pơtho tơbăt trong bơ̆ jang, khôi luơ̆t teh đak, yak hơlau lơ̆m jang kiơ̆ kơjăp rim trong tơlĕch jang, vei kơjăp tơdrong oei sa joăt joe ‘lơ̆ng rŏ sơ̆ ki, tơgop pơm sơđơ̆ng tơdrong hơrih sa păng sơđơ̆ng pơlei pơla.“Kră pơlei păng dôm bơngai kon pơlei yom ‘noh dôm bơngai mă kon pơlei yom kơtang hlŏh lơ̆m pơlei pơla kon kông. Đe sư chă pơma sa, pơtho khan tôch trŏ lăp vă kon pơlei hlôh vao, lui kiơ̆ kơjăp lơ̆m trong chĕp pơgơ̆r đơ̆ng Đảng, Teh đak adoi nhen dôm trong bơ̆ jang khôi luơ̆t. Tơgop pơm sơđơ̆ng tơpôl lơ̆m tơring khei năr au ki”.

          Vă hơnơ̆ng hơtŏk hơnăp jang đe kră pơlei, bơngai đei kon pơlei yom kiơ̆ lơ̆m pơlei pơla tơ̆ tơring, yă Nay H'Nan, Kơ iĕng Ƀĭ thư Đảng apŭng Cư Mgar dêh char Dak Lăk tơbăt:“Bơngai đei kon pơlei yom ‘noh gơng tơroi tơbăt hơdăh kơtơ̆ng ang, trong bơ̆ jang, Tơdrong tơchơ̆t đơ̆ng Đảng, Teh đak hăm kon pơlei pơla. Đe sư ‘noh jĭ dôm bơngai mă kơdră đảng adoi nhen kơdră chĕp pơgơ̆r tơring pơgơ̆r pơtho pơhrăm ming dôm trong bơ̆ jang vă đơ̆ng noh tơgŭm ăn đe sư băt hlôh ƀôh hơdăh hloh dơ̆ng trong bơ̆ jang vă đe sư chă pơtho khan ăn kon pơlei ‘lơ̆ng hơ iă hloh dơ̆ng. Kiơ̆ đơ̆ng noh vă pơrô̆ pơrôp kon pơlei jang kiơ̆ kơjăp rim trong bơ̆ jang lơ̆m atŏk tơ iung mŭk drăm-tơpôl, vei kơjăp sơđơ̆ng; tơ iung pơjing hơrih sa ‘lơ̆ng hơ iă, đơ̆ng noh sơđơ̆ng ăn tơdrong atŏk tơ iung lơ̆m pơlei pơla bơngai kon kông”.

Dak Lăk hrei au đei 942 ‘nu kră pơlei păng dôm bơngai đei kon pơlei yom lơ̆m pơlei pơla kon kông. ‘Nau jĭ khul tơgop gĭt kăl hloh lơ̆m bơ̆ jang tơ iung pơjing Đảng, Kơdră chĕp pơgơ̆r tơring, khul jang chinh trĭ tơring, pơtrŭt kơtang atŏk tơ iung mŭk drăm-tơpôl, vei kơjăp tơdrong oei sa joăt joe ‘lơ̆ng rŏ hơbŏ nhen sơ̆ ki kơ rim hơdrĕch hơdrung lơ̆m tơring.