VOV4.Bahnar - Khei ‘năr âu ki, tơ̆ dêh char Tây Ninh đei lơ bơ ngai ‘nŏh jĭ kon pơ lei Việt Nam, kiơ̆ đơ̆ng mang tơ pôl put nơ̆r lu bơ ngai hơ lĕnh pơ dăr pơ hlŭ năm tơ̆ Campuchia glăi luơ̆t vă bơ̆ jang. Mă tơ pă lơ bơ ngai âu mưh năm truh tơ̆ Campuchia đei đe pơ gŏ bơ̆ jang tôch trăp, 1 năr athei jang truh 11 jơ, đei bơ ngai hil, tĕh dong, ƀât lăp đei tơ ‘ngla công ty tĕch ăn công ty nai dơ̆ng,... gô mưh băt kơnh ‘nŏh pôm gơ nơm kơ unh hnam gơih jên vă chuôk iŏk kơ dih kâu vih dơ̆ng tơ̆ Việt Nam. Tơ drong ‘nâu hlôi đei tơ̆ dôm dêh char Tây Nguyên, kơ na kon pơ lei athei kơ chăng mă brĕ.

Anih kanh sat tang găn tơ drong yoch, Công an dêh char Tây Ninh ăn tơ băt, đơ̆ng blŭng sơ năm truh dang ei, iŏk đei 21 hla ar chih apinh dŏng tơ gŭm đơ̆ng dôm unh hnam ‘nŏh jĭ kon pơ lei oei xa lơ̆m dêh char đei bơ ngai kiơ̆ bơ ngai hơ lĕnh năm tơ̆ Campuchia bơ̆ jang, đei đe pơ gŏ, tơ brot. Dôm bơ ngai ‘nâu tơ dăh ‘mĕh brŏk dơ̆ng tơ̆ Việt Nam ‘nŏh athei đei jên chuôk kơ dih kâu ăn kơ đe ‘mơ̆i.

Kiơ̆ 1,2 unh hnam, kon hơ ‘lơ̆p đe sư ôn unh hnam, năm pơm hla ar kơ dih vă năm tơ̆ Campuchia jang ăn Công ty Thiên Đường pơm ngôi. Unh hnam lăp gơ̆h pơ ma nuh hăm điên thoăi păng băt anih kon hơ ‘lơ̆p oei bơ̆ jang đei anih tep pơ dơ̆h tơ pă, mă lei arih xa thoi yơ, bơ̆ jang thoi yơ ‘nŏh ưh kơ băt. Tôch pơ ngơ̆t, ưh hiôk jơ hngâm ‘nŏh jĭ tơ drong đei ƀôh hăm rim mĕ ƀă mưh iŏk đei điên thoăi krao dŏng đơ̆ng kon tơ̆ păih to tĕh đak.

Công an Tây Ninh bơ̆ jang hăm unh hnam dôm bơ ngai răm

Mŏ Hồng, oei tơ̆ apŭng Dương Minh Châu, dêh char Tây Ninh ăn tơ băt, ƀôh mĕ mơmat tat, kon drŏ kăn kơ dră kơ mŏ, sơ năm ‘nâu ‘nao 17 sơ năm, ôn kơ mĕ pơm hla ar năm tơ̆ Campuchia bơ̆ jang, hăm đon hơ mĕng chă đei jên tơ gŭm ăn kơ mĕ. Mă lei, jên khei kon tơ̆ yơ tam mă ƀôh, lăp ƀôh bơ ngai mĕ dang ei kơ dâu jơ̆p jơ̆p chơ chă jên vă chuôk iŏk kon brŏk: ‘Nao âu sư ƀôh boăl sư đei đe tĕh, hyup hăm phao điên, tĕch tơ̆ nai dơ̆ng, kơ na sư tôch hli, krao dŏng hăm điên thoăi, ‘mĕh jăh brŏk dơ̆ng tơ̆ Việt Nam. Inh lăp 1 ‘nu đĕch, ƀă sư lôch hơ chăng bơih, inh ưh kĕ vei sư, yoa hăt năm jang.

Đei băt, khei ‘năr tơ jê̆ âu tơ drong kon pơ lei năm tơ̆ Campuchia glăi luơ̆t đei ƀôh roi lơ yoa đe chă bơ ngai jang lơ̆m casino tơ̆ Campuchia tŏk. Kiơ̆ đơ̆ng lơ mang tơ pôl nhen Zalo, Facebook, Wechat, Instagram ... dôm bơ ngai tơ̆ Campuchia chih tơ roi oei chă bơ ngai jang, hăm jên khei lơ păng rim kơ sô̆ jên pơm hla ar, yak vih vât đei bơ ngai tơ̆ Campuchia kla jên pơm hơ drol ngăl.

Kơ plăh ‘nŏh, hrei ‘nâu đei tôch lơ druh dăm păh iung tơ̆ Việt Nam oei ‘mĕh chă tơ drong jang, kơ na mưh đŏk đei nơ̆r chih lơ̆m mang ‘nŏh lui hloi. Mưh bơ ngai chă tơ drong jang chu ‘nŏh dôm bơ ngai âu, pơ ma nuh hăm khul đe sư tơ̆ Việt Nam vă pơ gơ̆r chông ba đe năm jang, kiơ̆ trong kơ dâu klĕnh glăi luơ̆t mât tơ̆ Campuchia. ‘Nhŏng Tùng oei tơ̆ apŭng Gò Dầu, đei kon oei năm jang tơ̆ Campuchia tôch pơ ngơ̆t: “Jên khei jang đei ‘nŏh akhan trư lê̆ jên sŏng xa, jên anih tep tôm tĕch hloi, khei blŭng jĭt dôm triu jăh kiơ ‘nŏh, mă lei gơ̆t pơ đĭ ưh ăn iŏk yă 1 hlak. Kon inh khan, sư jang game dăh mă kiơ ‘nŏh, jang đơ̆ng 10h pơ gê truh 10h kơ măng, ƀât lăp đak nhă kŭm kơ đei hloi.”

Nhen thoi nŏh mơ̆n, mŏ Sen oei tơ̆ apŭng Gò Dầu, đei kon oei bơ̆ jang tơ̆ Campuchia ‘năi, tơ roi: “Krao điên thoăi ‘mĕh brŏk, sư athei mĕ chă jên chuôk iŏk kon brŏk, yoa lăp đei bơ ngai nai truh ‘nŏh đe tĕch sư tơ̆ anih nai dơ̆ng, chă jên 31 dăh mă 34 triu lơ̆m dang 2,3 năr ‘nŏh gơ̆h brŏk dơ̆ng. Sư thei chă hiă đơ̆ng 30 - 40 triu, ưh kơ băt hơ dăh dôm yơ.”

Công an Tây Ninh tơ tă ăn kon pơ lei lê̆ mơ̆ng nơ̆r đe chă pơ hlŭ

Kiơ̆ đơ̆ng hơ len năng, mưh năm truh tơ̆ Campuchia, tơ dăh tơ ‘ngla công ty ƀôh bơ ngai jang ưh lăp thoi lu sư ‘mĕh vă ‘nŏh đe tĕch ăn công ty nai hloi, hăm kơ jă lơ hlŏh kơ răt adrol kơ ‘nŏh. Tơ dăh bơ ngai jang ‘mĕh brŏk dơ̆ng tơ̆ Việt Nam ‘nŏh athei krao điên thoăi ăn unh hnam gơih jên chuôk ‘mơ̆i. Dôm bơ ngai âu roi tơ băt kơ sô̆ jên truh 1.800 USD (dang 40 triu hlak jên) vă chuôk iŏk bơ ngai vih dơ̆ng tơ̆ Việt Nam, tơ dăh ưh ‘nŏh vă tĕch dơ̆ng ăn dôm công ty nai, kơ plăh dŏh kơnh jên chuôk roi lơ hlŏh dơ̆ng.

Hrei ‘nâu, Anih kanh sat tang găn tơ drong yoch, Công an Tây Ninh đei lơ trong jang roi tơ băt ăn kon pơ lei, athei kơ chăng hăm dôm nơ̆r chih tơ roi lơ̆m mang tơ pôl đơ̆ng dôm bơ ngai pơ lung pơ hlŭ đe jang hơ iơch, jên khei lơ mưh năm jang tơ̆ Campuchia, đei jên khei sơ đơ̆ng, hlŏh 20 triu 1 khei; ưh đei nôp jên kiơ, ưh kăl jang rơ gei, lăp kăl băt tĕh chư đĕch... ‘Nâu tơ pă jĭ dôm tơ drong kăl pơm ăn bơ ngai oei chă tơ drong jang hơ mĕng “tơ plih đei tơ drong arih xa hiôk jơ nap” đang kơ ‘nŏh jing huŏng lơ̆m tơ drong hơ lĕnh pơ dăr đơ̆ng đe. Oei kiơ̆ Anih vei sơ đơ̆ng tơ drong jang tơ bôl, Công an Tây Ninh, đơ̆ng khei 9/2021 truh dang ei, khul jang kơ pal kơ Campuchia roi tơ băt đĭ đei 9 ‘nu bơ ngai lôch, yoa kơ tăh đơ̆ng hnam tơ̆ng, hrĕt hơ lŏng, 1,2 ‘nu bơ ngai hiong hơ kâu ưh băt yoa kiơ...

Ƀơm truh tơ drong glăi năm tơ̆ tĕh đak đe glăi luơ̆t, đơ̆ng ‘năr 1/1 truh ‘năr 1/4/2022, Công an dêh char Tây Ninh iŏk sek 17 tơ drong, hăm 38 ‘nu bơ ngai pơm glăi (đei 1,2 tơ drong glăi đơ̆ng sơ năm 2021 hai), tơ kêng 9 tơ drong, 16 ‘nu bơ ngai, oei hơ len năng 7 tơ drong, 22 ‘nu bơ ngai. Đơ̆ng blŭng sơ năm truh dang ei, đei 59 ‘nu kon pơ lei Việt Nam đei Anih tang măt ăn Việt Nam tơ̆ Campuchia ba brŏk dơ̆ng tơ̆ tĕh đak păng truh âu kơnh vă ăn dơ̆ng 14 ‘nu bơ ngai brŏk. Công an dêh char Tây Ninh tơ tă, kon pơ lei lê̆ mơ̆ng nơ̆r đe pơ hlŭ năm tơ̆ Campuchia glăi luơ̆t vă chă tơ drong jang. Hơ dai hăm ‘nŏh lê̆ tơ gŭm ăn dôm bơ ngai hơ lĕnh pơ dăr chông trong ăn đe năm tơ̆ tĕh đak nai glăi luơ̆t. Mưh ƀôh bơ ngai chông đe năm jang tơ̆ tĕh đak đe glăi luơ̆t ‘nŏh athei tơ roi hloi ăn công an jê̆ hlŏh.

Thượng tá Trần Minh Kiệt, Phŏ Kơ dră Anih vei sơ đơ̆ng jang tơ bôl, Công an Tây Ninh ăn tơ băt: “Công an Tây Ninh tơ tă ăn kon pơ lei lê̆ mơ̆ng nơ̆r pơ hlŭ, jang hơ iơch, jên khei lơ tơ̆ tĕh đak đe. Hơ pơi ‘mĕh kon pơ lei năm truh tơ̆ dôm anih đei anih jang kơ pal kơ tĕh đak ƀơk ăn hla ar jang vă chă tơ drong jang păng đei tơ gŭm, vei lăng ‘lơ̆ng tơ drong đei yoa kơ kon pơ lei”.

 Mă tơ pă, tơ drong ‘mĕh chă tơ drong jang ‘nŏh tôch tơ găl. Mă lei, kon pơ lei athei kơ chăng hai, vă huei huŏng lơ̆m tơ drong hơ lĕnh pơ dăr, jing bơ ngai pŭ răm đơ̆ng khul tĕch mơ dro bơ ngai. Tơ drong ‘nâu tơ dăh bơ̆n răng ‘nŏh gô tơ gop ‘lơ̆ng ăn tơ drong vei sơ đơ̆ng tơ̆ tơ ring.

Dơ̆ng: Tơ blơ̆