Sơnăm ‘nâu đei 200 ‘nu thây kô pơtho păng kang ƀô̆ vei lăng pơtho pơhrăm hơgei đei pôk pơ hơnăn. Lêh pôk pơ ư thây kô pơtho, kang ƀô̆ vei lăng hơgei sơnăm 2023 ‘noh jĭ 1 lơ̆m dôm tơdrong jang kăl tơbăt 41 sơnăm năr thây kô pơtho Việt Nam (20/11) yua đơ̆ng Anih tơm vei lăng pơtho pơhrăm jang hơdai hăm dôm anih jang pơgơ̆r. ‘Nâu jĭ dôm thây kô pơtho tơ̆ dôm tơring hơtăih hơtŏ kơ teh đak, hlôi iŏk đei lơ jơnei lơ̆m pơtho pơhrăm, đei trong jang pơcheh hơgei lơ̆m tơlĕch jang trong jang păng dôm tơdrong jang đơ̆ng Anih pơtho pơhrăm lơ̆m prăt khei ‘năr âu ki.

Iung pơma tơ̆ lêh pôk pơ ư, Kơdră Anih tơm vei lăng găh pơtho pơhrăm Nguyễn Kim Sơn hơmĕng, đe thây kô pơtho hơnơ̆ng hơmet pơ ‘lơ̆ng mơmat tat vă jang đang hơnăp jang păng păr ang dôm jơnei hlôi iŏk đei kŭm nhen dôm tơdrong hlôh vao truh lơ lap thây kô pơtho lơ̆m anih jang, vă vang jang đang ‘lơ̆ng hơnăp jang pơtho pơhrăm.