Tơring Trà Mai, apŭng Nam Trà My, dêh char Quảng Nam đei 4 pơlei hăm 15 koeng kon pơlei oei. Lơ̆m tơring hlôi đei hloh 1.200 ŭnh hnam, hăm 5.000 ‘nu kon pơlei, lơ̆m au vă jê̆ 80% ‘noh kon pơlei kon kông.

Hloh 2 sơnăm au ki, kon jên jang đơ̆ng rim tơdrong vă jang găh Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông hlôi tơgŭm ăn tơring groi kông au tơplih hơdăh. 100% ŭnh hnam lơ̆m tơring đei iŏk yua unh hơyuh; rim hnam trương lơ̆m tơring iŏk đei jing Hnam trương hŏk iŏk đei jơnei pơkăp ‘lơ̆ng teh đak mă I. Tơdrong hơrih sa kơ kon pơlei tơring groi kông hlôi tơplih hơdăh, jang sa iŏk đei jô̆ hơtŏ vă jê̆ 38 triu hlak jên lơ̆m 1 ‘nu 1 sơnăm. Ƀok Nguyễn Thanh Út, bơngai Ka Dŏng, Kơ iĕng Kơdră chĕp pơgơ̆r Đảng tơring Trà Mai, apŭng Nam Trà My tơbăt, tơring hơnơ̆ng pơjao kang ƀô̆ jur năm rim pơlei, ŭnh hnam, tơgŭm kon pơlei tơlĕch jang kiơ̆ rim tơdrong vă jang kơ Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông.“Nhôn pơjao tơdrong jang ăn rim kang ƀô̆ ‘noh bơngai jang dăr lăng kơtă tơ̆ noh hloi. Tơdăh đei tơdrong tơhlăk tơhlĭn ayơ lei tơroi tơbăt ăn Khul kơdră chĕp pơgơ̆r Đảng tơring hloi. Lơ̆m Khul kơdră chep pơgơ̆r Đảng tơring gô pơma dơnuh dih băl hơmet pơ ‘lơ̆ng dôm tơdrong tơhlăk tơhlĭn vă tơlĕch jang kiơ̆. Hăm chi ƀô̆ thôn pơlei ‘nŏh lơ̆m rim sơnăm jei vang iung jang hloi.”

Hloh 2 sơnăm au ki, Khul kơdră Teh đak hlôi pơjing lơ trong jang, trong tơgŭm djru ‘nao vă hơmet pơ ‘lơ̆ng tơhlăk tơhlĭn găh pơm hla bơar, găh trong vei lăng, pơgơ̆r jang kiơ̆ Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông. Mă lei, hrei au oei đei mĭnh ƀar tơdrong kăl hơnơ̆ng hơmet ming. Mă hơdăh, 10 tơdrong vă jang kơ Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông đei lơ tơdrong vă jang vă lei lăi dih băl, hơgrop dih băl, tơnap mă tơlĕch jang kiơ̆. Nhen Tơdrong vă jang 1: Xek tơlang tơdrong ưh kơ măh teh oei, hnam oei, teh jang sa, đak sŏ nhăn păng Tơdrong vă jang 2: Pơprŏ ming, hơmet ming, pơm sơđơ̆ng ăn kon pơlei oei tơ̆ dôm pơlei pơla ... đei trong jang, tơdrong vă jang păng tơdrong au to vă lei lăi dih băl. Lơ tơring hlôi chă hơpĭnh athei Khul kơdră chĕp pơgơ̆r Teh đak hơmet ming pơ ‘lơ̆ng rim tơdrong vă jang mă trong jang vă lei lăi dih băl, vă akŏm kon jên tơmơ̆t jang. ‘Ngoăih kơ ‘noh, đei tơdrong vă jang lơ hơnih jang vang iung jang kiơ̆, lơ trong jang hơgrop dih băl ƀar păh tơdrong jang lơ̆m dêh char, apŭng păng tơring. Mă hơdăh nhen Tơdrong vă jang 8: Jang kiơ̆ hơtŏ hơnơ̆ng drŏ nglo drŏ kăn păng xek tơlang dôm tơdrong kăl hăm drŏ kăn păng hơ ioh, đei 3 hơnih bơ̆ jang vang tơlĕch jang kiơ̆ ‘noh Khul drŏ kăn, Đoàn Hơdruh tơdăm păng hơnih bơ̆ jang vei lăng Kon kông. Kon pơlei mĭnh ‘măng iung jang hloi hăm lơ hơnih bơ̆ jang, mĭnh păh pơm tơhiong jơ ‘năr, mĭnh păh măh pơm ăn truh ưh kơ iŏk đei jơnei. Kiơ̆ kơ ƀok Trần Duy Dũng, Kơdră chĕp pơgơ̆r Hơnih vei lăng kon pơlei apŭng Nam Trà My, dêh char Quảng Nam, hla bơar bơ̆ jang tôch kơ lơ, rim tơdrong hơgrop dih băl pơm ăn kang ƀô̆ tơring tơnap mă kĕ jang kiơ̆, pơm ăn truh jơhngơ̆m đon tăr văr mưh tơlĕch jang kiơ̆ rim tơdrong vă jang: “Mĭnh ƀar ‘nu kang ƀô̆ tơring đei ‘măng chă lăng hơlen hla bơar tim mă brĕ, đơ̆ng noh lơ trong jang chih lơ̆m hla bơar tim mă trŏ lăp hăm yan au, tơnap mă tơlĕch jang kiơ̆. Apŭng hlôi athei rim kang ƀô̆ hơtŏk jơhngơ̆m đon hơdrin chă hơlen mă hơdăh, nơ̆r pơma tơ-‘ngla iung jang hloi. Mă lei, jơhngơ̆m đon nơ̆r pơma tơ-‘ngla iung jang hloi ‘nŏh jei kăl kiơ̆ tơdrong tơchơ̆t ưh khan mơ̆ng kơ dih  tơchĕng lơ liơ iung jang lơ loh hloi ôh. Hơtuch sơnăm nhôn hơlen kiơ̆ pơtôch tơlĕch kon jên jang vă lăng hơlen kang ƀô̆, hơnih jang Đảng păng đảng viên bơ̆ jang ‘lơ̆ng kơnê̆ dang yơ.”

Sơnăm 2023, dêh char Quảng Nam đei klăh asong vă jê̆ 1.227 ti hlak jên iung jang Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông. Truh đĭ khei 10/2023, dêh char Quảng Nam hlôi tơlĕch jang vă jê̆ 310 ti hlak jên, jơnei vă jê̆ 50% trong tơlĕch jang lơ̆m sơnăm; kon jên bơ̆ jang tơlĕch ăn vă jê̆ 5 ti hlak jên, jơnei dang 10% trong tơlĕch jang. Khul kơdră chĕp pơgơ̆r Đảng dêh char Quảng Nam pơjao ăn kang ƀô̆, kơdră chĕp pơgơ̆r jur năm tơ̆ tơring, dăr lăng hơlen lơ̆m khei ‘năr tơlĕch jang kiơ̆ rim tơdrong vă jang, iung jang hơmet pơ ‘lơ̆ng hloi dôm tơdrong tơhlăk tơhlĭn, pơtrŭt kơtang iung jang tơlĕch kon jên jang. Ƀok Trần Anh Tuấn, Kơ iĕng Kơdră chĕp pơgơ̆r Hơnih vei lăng kon pơlei dêh char Quảng Nam, Kơdră Hơnih chĕp pơgơ̆r rim Tơdrong jang tơm teh đak dêh char Quảng Nam tơbăt, dêh char au akŏm dăr lăng hơlen rim hla bơar tơchơ̆t oei hơgrop dih băl, tơhlăk tơhlĭn vă chă hơpĭnh, hơthei Trung ương hơmet pơ ‘lơ̆ng; adoi tơlĕch hloi trong jang tơgŭm ăn kang ƀô̆ gơ̆h jang kiơ̆ rim hla bơar tơchơ̆t.“Dêh char Quảng Nam đei mĭnh trong jang hlôi đei akŏm hơdăh hăm rim tơdrong jang tơm teh đak. Gô pơjing trong jang pơtho tơbăt dôm trong jang tih. Găh hăm rim trong jang hơdăh lơ̆m tơlĕch jang kiơ̆ dôm tơdrong đei ƀơm truh rim hơnih tơm, hơnih jang gô đei hla bơar akŏm pơ ‘lơ̆ng. Hơnih chĕp pơgơ̆r rim tơdrong jang teh đak gô hop akŏm vă lăng hơlen dơ̆ng rim tơdrong hơdăh mă sơkơ̆t hơdăh trong jang ayơ oei tơhlăk tơhlĭn, tơhlăk tơhlĭn ƀơ̆t yơ, tơdrong yă kiơ kơna gô hơmet pơ ‘lơ̆ng păng chih akŏm pơ ‘lơ̆ng.”

Hơtŏk kơtang tơlĕch jên jang Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông , dêh char Quảng Nam pơrô̆ rim hơnih bơ̆ jang, tơring đei pơjao kon jên jang tơlĕch jang hloi kơtang hloh. Tơdrong vă jang ayơ hlôi đei hla bơar pơtho tơbăt iung jang, jang ƀônh ‘nŏh tơring akŏm tơlĕch jang đơ̆ng hrôih hloi, sơđơ̆ng keh đang ƀlep tơdrong pơkăp. Hăm dôm tơdrong tơhlăk tơhlĭn tơ̆ lơ tơdrong vă jang tim mă hơmet pơ ‘lơ̆ng, rim tơ-‘ngla tơmơ̆t jên jang ‘nĕ chă pơ-‘nhang lơ̆m trong tơlĕch jang, ‘nĕ gô chang gơnang đơ̆ng Trung ương pơtho ăn mă lei kăl tơchă trong hơmet pơ ‘lơ̆ng, tơlĕch jang kiơ̆ mă ‘lơ̆ng rim tơdrong vă jang ‘noh hloi.