VOV4.Bahnar - Giĕng âu ki, hlôi pơ gơ̆r hop akŏm găh luơ̆t khei 8 đơ̆ng Anih chĕp kơ̆l pơ gơ̆r Kuô̆k hô̆i. Tơ̆ hop akŏm âu, Anih chĕp kơ̆l pơ gơ̆r Kuô̆k hô̆i tơ gop nơ̆r ăn 5 kơ luơ̆t hlôi đei tơ roi ăn Kuô̆k hô̆i tơ̆ hop akŏm mă 3 păng 3 kơ luơ̆t tơ roi ăn Kuô̆k hô̆i tơ gop nơ̆r ‘măng mă blŭng lơ̆m Hop akŏm mă 4. Tơ gop nơ̆r găh tơ drong Tơ chơ̆t tơ lĕch hla ar Hơ găt ăn Hop akŏm Kuô̆k hô̆i (oei chih hơ met), Kơ dră Kuô̆k hô̆i Vương Đình Huệ athei pơm ‘lơ̆ng ăn tơ drong hơ tŏ hơ nơ̆ng, kon pơ lei pơm tơm; đon jang tơ năp đơ̆ng bơ ngai tang măt păng druh kiơ̆ tơ tom hăm rim tơ drong tơ̆ yăn âu.

Tơ drong tơ chơ̆t chih tơ lĕch tơ drong Hơ găt kơ Hop akŏm Kuô̆k hô̆i (oei chih hơ met) vă tơ gop pơm hơ tŏk tơ drong jang đơ̆ng Kuô̆k hô̆i roi đunh roi gơ̆h hơ gei, ‘lơ̆ng hơ iă, hơ tŏk hlŏh dơ̆ng tơ drong đei yoa đơ̆ng dôm hop akŏm Kuô̆k hô̆i. Tơ drong ‘nao lơ̆m tơ drong Hơ găt kơ Hop akŏm Kuô̆k hô̆i (oei chih hơ met) ‘nŏh jĭ chih hơ dăh ƀiơ̆ hơ năp jang đơ̆ng bơ ngai tang măt Kuô̆k hô̆i mưh vang truh hop akŏm păng mưh ưh đei truh hop akŏm. Hŭt lê̆ tơ drong Hơ găt athei gơih hla ar ăn bơ ngai tang măt Kuô̆k hô̆i mă tơ plih hăm chih gơih hăm điên tư; chih tơ mât dơ̆ng tơ drong roi tơ băt hơ năn dôm anih jang, rim bơ ngai ưh jăh gơih hla ar.

Jơ bơ̆ jang lơ̆m Hop akŏm kiơ̆ tơ drong jang găh chih pơ jing luơ̆t khei 8

Truh dang ei, tơ drong oei đei lơ nơ̆r pơma pha ra băl, ‘nŏh jĭ tơ drong hơ găt jơ pơ nĭt iung pơ ma đơ̆ng bơ ngai tang măt tơ̆ hop akŏm hơ dai. Lơ nơ̆r pơ ma athei vei kơ jăp tơ drong hơ găt iung pơ ma lơ̆m 07 pơ nĭt nhen tơ drong Hơ găt oei yoa hrei ‘nâu vă bơ ngai tang măt Kuô̆k hô̆i gơ̆h pơ ma tơ blang hơ dăh dôm tơ drong tơ chĕng đơ̆ng kơ dih. Găh hơ năp jang đơ̆ng bơ ngai pơ gơ̆r hop akŏm, dôm bơ ngai tang măt athei chih mă hơ dăh ƀiơ̆ dôm tơ drong kăl vă bơ ngai pơ gơ̆r hop akŏm tơ lĕch nơ̆r athei Kuô̆k hô̆i tơ chơ̆t pơ dui đunh dăh mă tơ jur pơ nĭt iung pơ ma, tơ blang.

Kơ dră Anih vei lăng mŭk drăm kơ Kuô̆k hô̆i Vũ Hồng Thanh đei nơ̆r athei: “Vă pơm ‘lơ̆ng ăn bơ ngai tang măt tơ ƀôh đon tơ chĕng đơ̆ng kơ dih, mă loi lơ̆m dôm ‘măng pơ ma nuh tơ̆ hnam hôp, bơ ngai tang măt ‘mĕh tơ ƀôh hơ dăh hơ năp jang đơ̆ng kơ dih hăm tơ ring kơ dih kâu lĕch pơ jei adrol ki. Kơ na kŭm kăl đei tôm jơ pơ ma tơ blang hai. Mă lei mưh iung pơ ma tơ pă ‘nŏh athei đei nơ̆r hơ găt ‘năi, bơ ngai pơ gơ̆r gơ̆h kăt tơ jur jơ iung pơ ma”.

Hla ar chih tơ drong tơ chơ̆t hơ met ming tơ drong hơ găt găh tơ drong pơ jăh băl tơ̆ Hnam hôp vă pơih xă tơ drong pơm tơm, hơ tŏ băl lơ̆m tơ drong jang kơ Kuô̆k hô̆i, pơ jing tơ drong ‘lơ̆ng vă bơ ngai tang măt Kuô̆k hô̆i pơm hơ dăh dôm tơ drong đei tơ rĕk truh. Hăm tơ drong pơ ma pơ jăh, apinh jet dơ̆ng, Anih chĕp kơ̆l pơ gơ̆r Kuô̆k hô̆i athei pơm hơ dăh tơ drong tơ chơ̆t, rim bơ ngai tang măt dăh mă lăp hơ drô̆ bơ ngai tơ lĕch nơ̆r apinh ‘nŏh đĕch gơ̆h iung pơ jăh hăm bơ ngai tơl.

Phŏ Kơ dră Kuô̆k hô̆i Trần Quang Phương pơ ma hơ dăh: “Mưh apinh jet mă kơ dih kâu ‘măn vă iung pơ jăh, tơ drong pơ jăh păng apinh jet dơ̆ng ưh đei rơ đăh. Iung pơ ma jăh jĭ dôm tơ drong tam mă rơ đăh, kơ na athei pơ jăh. Apinh jet dơ̆ng kŭm tam mă rơ đăh. Thoi nŏh tơ drong hơ găt jơ năr dang ei đei 2 kơ sô̆ hơ găt pha ra băl. Oei lơ̆m tơ drong pơ ma nuh ‘nŏh pơ jăh băl 3 pơ nit, mă lei mưh apinh jet ‘nŏh lăp pơ ma pơ jăh 2 pơ nĭt đĕch. Kiơ̆ inh athei hŭt lê̆ pơ jăh băl lơ̆m tơ drong apinh jet, mă krao ‘nŏh apinh jet dơ̆ng, apinh jet păng apinh jet dơ̆ng âu kŭm lăp đei 1 pơ nĭt đĕch”.

Tơ̆ hop akŏm, Kơ dră Kuô̆k hô̆i Vương Đình Huệ pơ ma hơ dăh: Kuô̆k hô̆i jĭ anih jang yoa kon pơ lei pôk rơih, yoa thoi nŏh tơ drong tơ chơ̆t tơ lĕch tơ drong Hơ găt ăn hop akŏm Kuô̆k hô̆i (oei chih hơ met) athei pơm trŏ hăm tơ drong pơm tơm đơ̆ng kon pơ lei; hơ tŏk tơ drong sĭt kơ tang đơ̆ng luơ̆t; gơ̆h hơ gei, rơ đăh rơ đong; khoa hŏk păng đei yoa; lăp hăm rim tơ drong tơ̆ yăn âu: “’Moi kiơ̆ trong tơ plih ‘nao tơ drong pơ gơ̆r păng bơ̆ jang đơ̆ng Kuô̆k hô̆i, mă loi jĭ pơm ‘lơ̆ng tơ drong gơ̆h jang păng hơ tŏk hơ năp jang đơ̆ng bơ ngai tang măt Kuô̆k hô̆i. Dôm tơ drong gơh jang đơ̆ng bơ ngai tang măt ‘nŏh ưh gơ̆h tang găn. Athei pơm ‘lơ̆ng ăn hop akŏm, pơm thoi yơ gơ̆h chih hơ găt mă hơ dăh vă bơ ngai tang măt, đe gơ̆h pơm kiơ̆ tơ drong gơ̆h jang âu. Ưh lăp tang găn đĕch mă athei pơm ‘lơ̆ng vă gơ̆h hơ tŏk tơ drong gơ̆h jang păng hơ tŏk đon tơ năp đơ̆ng bơ ngai tang măt Kuô̆k hô̆i. Hơ nơ̆ng hơ met pơ ‘lơ̆ng ming tơ drong pơ gơ̆r, tơ plih đơ̆ng Kuô̆k hô̆i vang tơ blang jing pơ ma nuh păng iung pơ ma pơ jăh”.

Dôm nơ̆r pơ ma oei athei chih hơ dăh tơ drong hơ găt pơ drơ̆ng nơ̆r, yơ̆r ti mă lăp ƀiơ̆ lơ̆m dôm tơ drong gĭt kăl, nhen mưh đei jĭ hơ buh tơ pŏh krê hơ mơt. Mă lei, Kơ dră Kuô̆k hô̆i akhan, ưh kăl chih hơ dăh 2 trong pơ gơ̆r pơ drơ̆ng nơ̆r, yơ̆r ti. Yoa tơ dăh pơ drơ̆ng nơ̆r hăm kơ măy điên tư chô̆ lơ̆m hnam hôp bơih ‘nŏh ưh kăl pơ drơ̆ng nơ̆r hăm điên tư kiơ̆ kơ măy chĕp ti dơ̆ng.

Dơ̆ng: Tơ blơ̆