VOV4.Bahnar - Giĕng âu ki, Kơ dră Kuôk hô̆i Vương Đình Huệ hlôi pơ gơ̆r jơ bơ̆ jang hăm Anih tơm vei lăng găh tơ mam drăm păng cham char găh tơ drong hơ met ming, tơ mơ̆t dơ̆ng Luơ̆t teh. Kơ dră Kuôk hô̆i pơ jao kơ Anih vei lăng Mŭk drăm Kơ Kuôk hô̆i jang tơ gŭm bơ̆ jang kiơ̆ dôm hơ năp jang hăm pơ jing Luơ̆t teh hơ met ming, lơ̆m noh đei tơ drong iŏk nơ̆r tơ gop đơ̆ng Kon pơ lei kiơ̆ tơ drong hơ găt đơ̆ng khôi luơ̆t.

Tơ roi tơ băt tơ̆ jơ bơ̆ jang, Kơ dră Anih tơm vei lăng găh tơ mam drăm păng cham char Trần Hồng Hà tơ băt, hla ar chih ming tŏk bŏk iŏk nơ̆r tơ gop hăm dôm bơ ngai pŭ ƀơm ưh kơ ‘lơ̆ng đei pơ jing kiơ̆ lơ̆m tơ drong Tơ chơ̆t 18, dôm tơ drong Tơ chơ̆t, pơ tôch nai vă pơm tôm, tơ tom dôm tơ drong jang đơ̆ng Đảng găh vei lăng păng iŏk yua teh; vei sơ đơ̆ng iŏk jang, tơ drong sơ đơ̆ng đơ̆ng tơ drong jang khôi luơ̆t; hơ met ming, tơ mơ̆t dơ̆ng dôm tơ drong hơ găt vă hơ tŏk tơ mam teh păng hơ met pơ ‘lơ̆ng dôm tơ drong oei đei, ưh kơ ‘lơ̆ng lơ̆m trong jang tơ gŭm, khôi luơ̆t hlôi đei tơ ƀôh ăn lơ̆m kơ plăh pơ tôch tơ drong Tơ chơ̆t kơ sô̆ 19-NQ/TW păng pơm kiơ̆ Luơ̆t teh.

Lơ̆m kơ plăh pơ jing Luơ̆t, Anih tơm kŭm hlôi kơ chăng dăr hơ len hloh 100 luơ̆t đei ƀơm truh tơ drong jang teh vă tơ lĕch hơ met ming hloi lơ̆m Luơ̆t âu dăh mă athei hơ met ming dôm Luơ̆t đei ƀơm truh vă vei sơ đơ̆ng tơ drong drơ̆ng nơ̆r, hrơ̆p 1 ‘măng đơ̆ng tơ drong jang khôi luơ̆t kiơ̆ ƀlep đơ̆ng tơ drong Tơ chơ̆t kơ sô̆ 18-NQ/TW.

Jơ bơ̆ jang

Hơ drol kơ iŏk nơ̆r tơ gop đơ̆ng dôm bơ ngai pŭ ƀơm ưh kơ ‘lơ̆ng ‘nao âu, Anih tơm vei lăng găh tơ mam drăm păng cham char hlôi chih iŏk nơ̆r tơ gop đơ̆ng 63 dêh char, pơ lei tơm, dôm anih tơm, anih jang, bơ̆ jang hăm dôm Anih tơm vei lăng jên hu, ming man, choh jang sa păng hơ tŏk tơ iung tơ ring tơ rang, trong nơ năm gre kơ dâu, Nội vụ.

Đơ̆ng rŏng mơ̆r dôm nơ̆r tơ gop pơ ma dơ nuh, Kơ dră Kuôk hô̆i hội Vương Đình Huệ tơ roi rơ đăh, Luơ̆t teh (hơ met ming) ‘noh jĭ luơ̆t tôch kơ tih, gĭt kăl, ƀơm truh lơ tơ ‘ngla, bơ ngai, anih jang, khŭl jang. Hăm anih dơ̆ng, hơ năp jang ‘noh, khei ‘năr âu ki, tơ drong jang hơ met ăn tơ drong set hơ len ăn tơ gop nơ̆r hăm Luơ̆t âu hlôi đei pơ gơ̆r tơ tĕnh, tơ năp.

Kơ dră Kuôk hô̆i Vương Đình Huệ athei, Luơ̆t teh tôch kơ gĭt kăl kơ na athei pơ jing ƀlep ‘meh vă đơ̆ng luơ̆t, pơm kiơ̆ tơ drong hơ met ming luơ̆t, Khŭl kơ dră teh đak pơ truh hô sơ Luơ̆t truh rim anih jang kơ Kuôk hô̆i hơ drol kơ ‘năr 1/9 vă tơ chĕng hơ len, ăn tơ gop nơ̆r tơ̆ ‘măng hop akŏm Anih chĕp kơ̆l pơ gơ̆r Kuôk hô̆i.

Găh hô sơ luơ̆t, Kơ dră Kuôk hô̆i athei, Anih tơm vei lăng găh tơ mam drăm păng cham char kăl kơ akŏm hloh dơ̆ng lơ̆m pơ jing hla ar tơ roi tơ băt hơ len lăng đei ƀơm truh găh mŭk drăm, tơ pôl, cham char, tơ drong sơ đơ̆ng teh đak, hơ nih tĕch mơ dro, dăr hơ len tơ drong jang khôi luơ̆t ƀơm truh păng hla ar chih ming dôm tơ drong Tơ chơ̆t pơ tho Luơ̆t teh. Dôm hla ar tơ roi tơ băt âu đei tơ drong tôch kơ gĭt kăl, jĭ tơ drong tơ băt hơ dăh ăn tơ drong jang pơ jing khôi luơ̆t. Yua thoi noh, hăm jơ hngơ̆m đon ‘meh vă, ‘lơ̆ng, vei sơ đơ̆ng hơ met ăn hơ drin, hơ len dôm tơ drong ‘nâu athei đei tơ drong jang hơ dai kơ jăp, mă loi ‘noh jĭ đơ̆ng dôm anih jang kơ Kuôk hô̆i hăm Khŭl kơ dră teh đak păng đơ̆ng Trung ương hăm tơ ring. Hơ dai hăm ‘noh, Kơ dră Kuôk hô̆i tơ tă kiơ̆ kơ tơ drong Tơ chơ̆t 18 đơ̆ng Trung ương, sơ năm 2023 ưh khan lăp jang pơ keh luơ̆t teh hơ met ming mă oei jang đang hơ met ming khôi luơ̆t ƀơm truh.

Kơ dră Kuôk hô̆i iung pơ ma tơ̆ jơ bơ̆ jang

Găh pơ gơ̆r pơ ma đam, hop akŏm, iŏk nơ̆r tơ gop găh Luơ̆t teh hơ met ming, Kơ dră Kuôk hô̆i tơ tă, lơ̆m khei ‘năr ưh kơ đei lơ, athei đei trong jang mă lăp, tơ gĕch iŏk yua jơ năr mưh pơ ma dơ nuh ăn tơ gop nơ̆r găh dôm tơ drong đơ̆ng luơ̆t. Hơ dai hăm Anih jang Mŭk drăm ‘noh jĭ anih jang pơ gơ̆r dăr hơ len, ‘noh Jơ nŭm vei lăng hơ drĕch hơ drŭng păng dôm Anih jang nai kơ Kuôk hô̆i dăh mă Anih jô̆ hơ len jên teh đak, Jơ nŭm pơ gơ̆r kon pơ lei rim tơ ring, rim khŭl bơ ngai tang măt Kuôk hô̆i kŭm athei hơ tŏk ‘lơ̆ng hơ năp jang vang jang pơ jing Luơ̆t. Yua thoi noh, Kơ dră Kuôk hô̆i akhan, oei tôch kơ lơ mơ mat tat, long nol lơ̆m chih pơ keh Luơ̆t, kơ na rim anih jang ưh kơ gơh pơm pơ hơi, athei hơ nơ̆ng hơ tŏk ‘lơ̆ng hơ năp jang tơ̆ hơ năp Đảng păng kon pơ lei lơ̆m chih pơ keh Luơ̆t.

Kơ dră Kuôk hô̆i pơ jao kơ Anih jang mŭk drăm kơ Kuôk hô̆i jang tơ gŭm ăn Trong tơ lĕch jang đơ̆ng Kuôk hô̆i jang kiơ̆ dôm hơ năp jang hăm pơ jing Luơ̆t teh hơ met ming, lơ̆m noh đei tơ drong iŏk nơ̆r tơ gop đơ̆ng Kon pơ lei kiơ̆ tơ drong hơ găt đơ̆ng khôi luơ̆t; klăih song hơ năp jang ăn Anih chĕp kơ̆l pơ gơ̆r Kuôk hô̆i, Jơ nŭm pơ gơ̆r kon pơ lei rim dêh char, pơ lei tơm, rim khŭl bơ ngai tang măt Kuôk hô̆i păng đei trong tơ lĕch jang pơ ma dơ nuh tơ roi hrôih găh: Hla ar hô sơ Luơ̆t, dôm tơ drong pơ tôch tơ chĕng hơ len, roi tơ băt pơ tôch tơ drong jang kiơ̆ Luơ̆t tơ lĕch ăn, roi tơ băt hơ len lăng dôm khôi luơ̆t ƀơm truh tơ̆ teh. Hăm tơ drong iŏk nơ̆r tơ gop đơ̆ng Kon pơ lei, Kơ dră Kuôk hô̆i athei tơ lĕch ăn dôm tơ drong mă hơ dăh, đei tơ roi rơ đăh, tơ klep hăm hơ năp jang đơ̆ng rim anih jang chih iŏk nơ̆r tơ gop đơ̆ng kon pơ lei.

Thuem: Tơ blơ̆