VOV4.Bahnar - Giĕng âu ki, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r hop akŏm yao ƀan đơ̆ng Kơ dră chĕp kơ̆l Kuô̆k hô̆i hăm dôm anih jang kơ Kuô̆k hô̆i, Anih chĕp kơ̆l pơ gơ̆r Kuô̆k hô̆i, tơ lĕch tơ drong jang tơm 6 khei hơ tuch sơ năm. Tơ̆ hop akŏm, Kơ dră Kuô̆k hô̆i Vương Đình Huệ athei dôm anih jang pơm kiơ̆ mă ‘lơ̆ng nơ̆r hơ găt bơ̆ jang, hơ tŏk hlŏh dơ̆ng tơ drong đei yoa lơ̆m tơ drong jang, lăp hăm trong pơ gơ̆r bơ̆ jang, jang ‘lơ̆ng rim tơ drong, rơih đei tơ drong jang kăl vă akŏm jơ hngâm bơ̆ jang hai.

Nơ̆r tơ roi đơ̆ng Tổng thư ký Kuô̆k hô̆i, Kơ dră vei lăng anih jang kơ Kuô̆k hô̆i Bùi Văn Cường ăn tơ băt, 6 khei blŭng sơ năm, dôm anih jang hlôi roi tơ ƀôh, pơ vih pơ văn pơ gơ̆r đang ‘lơ̆ng 2 ‘măng hop akŏm Kuô̆k hô̆i, 6 ‘măng hop akŏm Anih chĕp kơ̆l pơ gơ̆r Kuô̆k hô̆i, 4 Khul dăr lăng kiơ̆ tơ drong jang đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i, 1 Hop akŏm bơ ngai tang măt jang kơ tă lơ̆m Kuô̆k hô̆i păng dôm ‘măng bơ̆ jang đơ̆ng Đảng khul Kuô̆k hô̆i, Anih chĕp kơ̆l pơ gơ̆r Kuô̆k hô̆i, Kơ dră chĕp kơ̆l Kuô̆k hô̆i hăm dôm anih jang, khul grŭp, tơ ring tơ rang. Roi tơ ƀôh, jang kĕh 50/137 tơ drong jang chih pơ jing luơ̆t găh trong jang chih pơ jing luơ̆t đơ̆ng Kuô̆k hô̆i jăl 15 kiơ̆ Tơ drong tơ chơ̆t kơ sô̆ 19 đơ̆ng Anih tơm Chinh trĭ. Roi tơ ƀôh jang kĕh 2 tơ drong găh tơ drong jang “Trong jang gĭt kăl pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam truh sơ năm 2030, trong jang truh sơ năm 2045”. Tơ drong jang roi tơ ƀôh, pơ vih pơ văn ăn jang tơ bôl đei bơ̆ jang tôch hơ bĕch păng gơ̆h hơ gei.

Jơ bơ̆ jang lơ̆m hop akŏm

Đơ̆ng rŏng mơ̆ng dôm nơ̆r tơ gop, Kơ dră Kuô̆k hô̆i Vương Đình Huệ pôk pơ ư, tơ chĕng ‘lơ̆ng lơ̆m 6 khei blŭng sơ năm, dôm anih jang găn Kuô̆k hô̆i adrin tôch pơ nĕh, ‘moi kiơ̆ dôm tơ drong jang đei đơ̆ng dôm jăl jang adrol ki, Kuô̆k hô̆i jăl XV hơ nơ̆ng tơ plih 'nao, adrin hơ tŏk tơ drong 'lơ̆ng mưh bơ̆ jang, đei ƀôh kiơ̆ đơ̆ng dôm 'măng hop akŏm Kuô̆k hô̆i, dôm 'măng hop akŏm Anih chĕp kơ̆l pơ gơ̆r Kuô̆k hô̆i, dôm 'măng hop akŏm Anih vei lăng hơ drĕch kon kông, dôm anih jang, khul tang măt Kuô̆k hô̆i, rim bơ ngai tang măt Kuô̆k hô̆i; tơ drong jang hơ doi đơ̆ng Kuô̆k hô̆i, Kơ dră tĕh đak, Khul kơ dră tĕh đak, Mặt trận Tổ quốc Việt Nam, Anih tơm sek tơ lang, Anih tơm dăr hơ len kon pơ lei, Anih jô̆ hơ len jên hu tĕh đak, dôm anih jang, khul jang kơ pal lơ̆m rim anih jang chinh trĭ.

Kăl kơ tơ rĕk ‘nŏh, ‘ngoăih kơ jang kĕh rim tơ drong jang kiơ̆ trong tơ lĕch, Kuô̆k hô̆i oei pơm lăp păng jang ‘lơ̆ng dôm tơ drong jang 'nao đei 'măn đei lơ tơ drong 'lơ̆ng hơ iă, hăm lơ tơ drong jang 'lơ̆ng, rơ gei, đei yoa, jô̆ hloi găh tơ drong chih pơ jing luơ̆t, dăr lăng, tơ chơ̆t dôm tơ drong tih kơ tĕh đak, tơ drong jang tơ bôl, chĕp kơ̆l pơ gơ̆r tơ̆ lăm păng tơ 'ngoăih hai. Tơ drong chĕp kơ̆l pơ gơ̆r kiơ̆ nơ̆r pơ tho đơ̆ng Jơ nŭm pơ gơ̆r kon pơ lei iŏk đei lơ tơ drong 'lơ̆ng. Tơ drong jang chih akŏm nơ̆r hơ pơi 'mĕh đơ̆ng kon pơ lei đei tơ plih 'nao, jang roi tơ năp đơ̆ng dôm anih jang đei ƀơm truh.

“Đảng khul Kuô̆k hô̆i, Anih chĕp kơ̆l pơ gơ̆r Kuô̆k hô̆i, dôm anih jang hlôi jang kiơ̆ 'lơ̆ng nơ̆r pơ tho đơ̆ng Anih tơm Chinh trĭ, Ban Bí thư, tơ tom chih tơ lĕch tôch rơ đăh dôm tơ drong tơ chơ̆t đơ̆ng Trung ương, dôm hla ar chih nơ̆r pơ tho đơ̆ng dôm anih jang kơ Trung ương, pơm lăp hăm tơ drong pơ jing păng atŏk tơ iung tĕh đak, lơ̆m tơ drong jang mŭk drăm, tơ pôl, vei sơ đơ̆ng tĕh đak, jang tơ bôl, mă loi jĭ tơ drong jang hơ doi bơ̆n hơ nơ̆ng tơ lĕch nơ̆r pơ ma khŏm tang găn 'lơ̆ng tơ drong jĭ Covid- 19 păng jang tơ iung ming hrĕnh mŭk drăm, tơ pôl. Tơ drong 'nâu đei tơ drong tơ gop tôch tơ năp đơ̆ng Kuô̆k hô̆i bơ̆n”. 

Kơ dră Kuô̆k hô̆i ăn tơ băt, tơ drong tơ lĕch jang kiơ̆ dôm tơ drong tơ chơ̆t đơ̆ng Trung ương, Anih tơm Chinh trĭ, Ban Bí thư păng hơ met, chih pơ jing lơ hla ar tơ roi đơ̆ng Đảng khul Kuô̆k hô̆i hăm lơ hla ar chih kăl, Tơ drong jang đơ̆ng Trung ương đei Trung ương, Anih tơm Chinh trĭ, Ban Bí thư tơ chĕng 'lơ̆ng, chih tơ blang roi gei tôch đei yoa.

Găh tơ drong vă jang tơ̆ hơ năp kơnh, Kơ dră Kuô̆k hô̆i Vương Đình Huệ athei dôm anih jang, khul grŭp pơm kiơ̆ ‘lơ̆ng trong jang, tư tơ iung hlŏh dơ̆ng tơ drong đei yoa mưh bơ̆ jang, jang trŏ tơ drong hơ găt, jang tôm rim tơ drong, chă rơih đei tơ drong kăl vă jang hai, ưh gơ̆h lê̆ 1,2 tơ drong jang pơ dui đunh.

Mă loi, athei hơ tŏk tơ drong jang hơ doi tơ̆ lăm, dôm tơ drong jang athei đei trong jang rơ gei ‘lơ̆ng, đei yoa; jang ‘lơ̆ng kiơ̆ rim tơ drong ‘moi kiơ̆ tơ drong jang đơ̆ng Đảng khul Kuô̆k hô̆i, đơ̆ng Anih chĕp kơ̆l pơ gơ̆r Kuô̆k hô̆i.

Tơ ƀôh đon lăp hăm trong jăh pơ gơ̆r hrôih hop akŏm hơ len năng rim tơ drong dôm khei blŭng sơ năm, Kơ dră Kuô̆k hô̆i athei dôm anih jang jăh jang kiơ̆ Tơ drong jang chih pơ jing luơ̆t, tơ drong tơ chơ̆t lơ̆m sơ năm 2022, 'moi kiơ̆ trong đei tơ lĕch lơ̆m jăl jang lơ̆m Nơ̆r tơ chơ̆t kơ sô̆ 19-KL/TW đơ̆ng Anih tơm Chinh trĭ; tơ lĕch dôm tơ drong jang dăr lăng đơ̆ng Kuô̆k hô̆i păng Anih chĕp kơ̆l pơ gơ̆r Kuô̆k hô̆i sơ năm 2022 păng hơ yak blŭng a ăn sơ năm 2023; hơ len, dăr lăng tơ drong jang kiơ̆ dôm tơ drong tơ chơ̆t đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i…

Găh noh dơ̆ng, pơ gơ̆r ‘lơ̆ng dôm tơ drong apinh jet, tơl nơ̆r apinh jet ƀât blŭng khei 8; pơ gơ̆r hop akŏm hăm khul juăt jang vă hơ len năng trong pơ gơ̆r Hop akŏm mŭk drăm sơ năm 2022.

Dơ̆ng: Tơ blơ̆