VOV4.Bahnar - Găh tơ drong bơ ngai Việt Nam put kiơ̆ nơ̆r đe hơ lĕnh năm jang tơ̆ Campuchia, tơ̆ hop akŏm hăm khul chih hla ar tơ roi ‘nao âu, Bơ ngai chă pơ ma tơ lĕch nơ̆r ăn Anih tơm jang tơ bôl Lê Thị Thu Hằng ăn tơ băt, dôm anih jang tang măt ăn Việt Nam tơ̆ Campuchia hơ nơ̆ng jang hơ doi hăm dôm anih tơm, anih jang kơ pal păng dôm tơ ring lơ̆m tĕh đak, mă loi jĭ dôm tơ ring sơ lam tĕh đak păng dôm anih jang kơ pal păih Campuchia bơ̆ jang lơ trong vei lăng, tơ gŭm ăn kon pơ lei mơ mat tat vih dơ̆ng tơ̆ teh đak.

Anih tang măt ăn Việt Nam tơ̆ Campuchia hlôi chô̆ kơ măy điên thoăi kăl, vă răp mơ̆ng nơ̆r krao tơ gŭm đơ̆ng kon pơ lei rim năr, kŭm nhen điên thoăi kăl đơ̆ng anih tang măt vă chă sơng iŏk nơ̆r tơ roi đơ̆ng dôm bơ ngai răm, kŭm nhen dôm nơ̆r tơ roi kăl nai.

Hăm tơ drong vang jang hơ doi đơ̆ng dôm anih jang lơ̆m tĕh đak păng păih Campuchia, truh dang ei, dôm anih jang kơ pal 2 păh hlôi chông tơ brŏk dang 400 ‘nu bơ ngai, pơ tho trong pơm hla ar tơ gŭm luơ̆t ăn dang 1.500 ‘nu kon pơ lei tơ ƀâp mơ mat tat mưh năm tơ̆ tĕh đak đe, yak vih vât, oei xa dăh mă pơm glăi dôm tơ drong hơ găt tơ̆ tĕh đak ‘nŏh. Anih tơm jang tơ bôl păng dôm anih jang tang măt tơ̆ tĕh đak đe hơ nơ̆ng jang hơ doi hăm anih jang kơ pal lơ̆m tĕh đak păng Campuchia vă hơ tŏk tơ drong dăr hơ len, tơ tom sek tơ lang dôm tơ drong glăi vă jăh găn đĭ tơ drong hơ lĕnh pơ dăr ‘nâu.

Dơ̆ng: Tơ blơ̆