Ah mă 'năr tam mă 'ngah, lơ̆m hnam pai gŏ kơ Hnam trưng hŏk teh đak rong oei ah kơ-năr Jăl kơđeh Tu Mơ Rông hlôi khơ̆ng unh. Rim bơngai hăt hot pơvih pai xa ah pơgê ăn kơ hrĕng 'nu hŏk tro tơ̆ ou.

Minh năr kơ dôm bơngai pơtho tơ̆ ou pơtơm đơ̆ng hrôih hloh pơtêng hăm hơgơ̆r hnam trưng.

Duch pơtho Dương Thị Kiều, pơtho lăm 1A2, hnam oei hơtaih đơ̆ng hnam trưng pơhlom 5 km. Rim năr, đơ̆ng 4 jơ pơgê, duch hao gre honđa năm truh hnam trưng vă atŭm hăm khul jang hơmet pai xa ah pơgê ăn kơ đe hŏk tro. Tơdrong jang pơtơm đơ̆ng 'năr oei kơmăng, mă lei tơplih kơ noh, hŏk tro đei 'măng xa pơgê tơnŏ 'lơ̆ng hơdrol kơ mơ̆t tơ̆ lăm hŏk: “Mă gleh lăp dah mă 'meh tep, mă lei chơt hơ-iă lơ̆m đon kơlih đe hŏk tro đei 'măng xa ah pơgê vă đe oh năm hŏk gơh 'lơ̆ng hloh”.

Lơ̆m dang 6 jơ pơgê, hŏk tro pơtơm năm hŏk. Đe oh đei mĕ ƀă 'nhăk truh hnam trưng hăm gre honđa, đei oh năm jơ̆ng đơ̆ng hơnih oei hơtaih đơ̆ng hnam trưng minh ƀar kơsô̆. Dôm mơnhan phơ tŏ ƀou phu đei pơtruh ăn rim 'nu hŏk tro. Xa đang, đe oh vih tơ̆ lăm hŏk, pơtơm minh năr hŏk 'nao.

Hăm đe hŏk tro tơring groi kông Tu Mơ Rông, 'măng xa ah pơgê tơ̆ hnam trưng ưh kơsĭ jing tơdrong sŏng xa đĕch ôh. Noh oei jing jơhngơ̆m pran vă đe oh kĕ hŏk pơhrăm, mă kăl noh hăm đe hơ-ioh hơtaih đơ̆ng hnam oei, athei năm jơ̆ng lơ kơsô̆ vă truh tơ̆ hnam trưng. Lơ hŏk tro 'noh kon hơ-ioh kon kông. Tơdrong hơrih unh hnam oei ƀơm tơnap tap, tơdrong đei 'măng xa ah pơgê gơh 'lơ̆ng tôm hơdrol kơ năm hŏk ưh kơsĭ layơ adoi ƀônh hiôk ôh. Oh Y Kim Ngân, hŏk lăm 5A5 tơroi: “Tơmam sŏng xa tơ̆ ou 'lơ̆ng. 'Năr ou nhôn xa ƀung cha. Inh năm hŏk đơ̆ng hrôih, xa đang inh năm tơ̆ lăm hŏk ƀai”.

Gah rŏng kơ dôm 'măng xa ah pơgê noh jing tơdrong tơgop jơhngơ̆m đơ̆ng lơ bơngai pơtho lơ̆m hnam trưng. Thâi pơtho Lê Tấn Thức, 2 sơnăm kơ ou vang pai xa. Tơdrong jang ưh đei pơkăp lơ̆m pơtho pơhrăm, mă lei hăm dôm bơngai pơtho tơ̆ ou, noh jing minh pah sơnong jang hăm đe hŏk tro: “Inh kŭm oei ah hơnih oei tập thể tơ̆ ou, noh tơgŭm chă pai xa ăn kơ đe mon xa ah pơgê, vă đe oh gơh phĭ tơtŏ. Hŏk tro tơ̆ ou, ưh đei chă xa ah pơgê hrôih, noh hnam trưng pơtơm tơdrong mă ou vă đe mon chơt hơ-iă. Inh kŭm chơt hơ-iă mơ̆n”.

Sơnăm hŏk ou, Hnam trưng hŏk teh đak rong oei ah kơ-'năr Jăl kơđeh Tu Mơ Rông đei 902 hŏk tro, lơ̆m noh 665 oh đei xa tơchơ̆t tơgŭm oei ah kơ-năr. Tơchơ̆t tơgŭm mă lơ noh ăn 'măng sŏng 'năr dơ̆ng. Lơ̆m kơplah noh, ưh kơsĭ hŏk tro mă yơ adoi gơh đei jên xa ah pơgê tôm tong hơdrol kơ năm hŏk tơ̆ lăm. Đei oh hnam oei hơtaih đơ̆ng hnam trưng lơ km hloi, đei oh athei năm jơ̆ng. Hăm đe hŏk tro ou, tơdrong năm hŏk tơ̆ hnam trưng trŏ jơ phơ phŏ pơtơm đơ̆ng minh tơdrong ƀônh đĕch noh đei xa ah pơgê.

Đơ̆ng tơdrong đei ƀôh noh, hnam trưng pơgơ̆r pai xa ah pơgê ăn hŏk tro. Tơdrong jang ou đei pơtoi đơ̆ng sơnăm hŏk hơdrol păng pơtoi lơ̆m sơnăm hŏk ou. Vă tơdrong sŏng xa ah pơgê đei pơtoi sơđơ̆ng, ưh hơdrô̆ bơngai pơtho tơgŭm mă mĕ ƀă hŏk tro vang tơgŭm mơ̆n. Rim pơgê 'nhăk kon năm hŏk tơ̆ hnam trưng, minh ƀar mĕ ƀă hŏk tro chơ ba hloi hơchô̆ 'long unh tơgop ăn hnam trưng. Dôm hơchô̆ 'long unh đei hơmet ah hơnih pai gŏ, jing tơmam drăm ăn bơngai pơtho pơgiơ̆ng unh, pai dôm tơmam xa ah pơgê 'lơ̆ng tơnŏ ăn kơ đe hŏk tro.

Duch pơtho Hồ Thị Thuỳ Vân, Kơdră Hnam trưng hŏk teh đak rong oei ah kơ-'năr Jăl kơđeh Tu Mơ Rông tơroi, tơdrong pai xa ah pơgê pơm ăn bơngai pơtho hrat hloh, mă lei tơplih kơ noh đe hŏk tro grăng pran, pơ-'nam păng hŏk pơhrăm gơh 'lơ̆ng hloh: “Ah pơtơm tơdrong jang ou 'noh đe thâi kô kŭm hrat mơ̆n, mă lei đe hŏk tro gơh grăng 'lơ̆ng, lăp năm hŏk tơ̆ trưng păng hŏk pơhrăm kŭm gơh hloh. 'Noh jing tơdrong hơ-iă tih tên hloh kơ bơngai pơtho, pơm jang tơ̆ tơring hơtaih yaih ou”.

Mă lei vă gơh đei 'măng xa ah pơgê gơh sơđơ̆ng 'lơ̆ng, rim bơngai pơtho athei tơplih hăm jơ pơdơh kơdih po. 4 jơ pơgê iung pơgiơ̆ng unh. Pơhlom 6 jơ sơng đe hŏk tro. Truh 7 jơ, ah hŏk tro xa đang ah pơgê, rim bơngai pơtho hơmet hnam sŏng xa păng chôt vih hăm tơdrong jang pơtho pơhrăm: năm tơ̆ lăm, chih akŏm ƀai pơtho, vei lăng hŏk tro. Minh năr tơdrong jang kơ bơngai pơtho jing đunh hloh.  

Tơ̆ hnam trưng hŏk tơring groi kông Tu Mơ Rông, pla unh khơ̆ng đei tơ̆k ang ah rim pơgê hrôih, kơlih tơ̆ hơnăp noh đe hŏk tro kăl đei sŏng xa phĭ vă hŏk chư. Dôm tơdrong pơm ƀônh ƀŏ noh adoi jing trong tơmơ̆t Tơchơ̆t 71-NQ/TW đơ̆ng Hơnih tơm Chĭnh trĭ gah hơtŏk pơtho pơhrăm truh hăm tơdrong hơrih.