Dôm năr tŏk bŏk khei 9, tơ̆ Anih oei ‘nao kơ tơring pŭ răm đơ̆ng 'mi kial xăh Cát Tiến, dêh char Gia Lai, hloh 40 ŭnh hnam kon pơlei oei hăt hot man hnam 'nao. Anih oei xa ‘nao hơtăih kơ anih oei so dôm hrĕng met, đei teh tơhnă 'lơ̆ng, đei ŭnh điên, đak păng trong đei tơlĕch jên jang man hrơ̆ch ‘lơ̆ng.

Jĭ mĭnh lơ̆m dôm ŭnh hnam pơm đang hnam hrôih hlŏh, ƀok Bùi Thanh Vương hlôi tŏk oei tơ̆ anih oei xa ‘nao đei mĭnh khei bơih: "Teh đak pơngơ̆t truh vă kon pơlei lĕch tơ̆ anih oei xa ‘nao 'noh tôch kơ hơiă. Pơyan 'mi truh bơih kơna kon pơlei oei hơpơi đe thơ̆ bơ̆ jang mă hrĕnh, jăh man đang hnam vă veh ver kơ teh hơlih, tơ̆ âu 'mi jur ‘nŏh hơmơt dêh. Dang ei tơ̆ âu bơngai jang ŭnh điên, bơngai jang găh đak truh ngăl bơih, đe sư oei adrin bơ̆ jang. Hơdrô̆ ĭnh đei 2 hlak hla ar teh, iŏk đei 2 lô teh 'nao"

Kŭm hăm unh hnam ƀok Vương, lơ unh hnam kon pơlei nai tơ̆ plei Trung Lương, xăh Cát Tiến dai kơchăng man hnam hloi mưh đei pơjao teh, hăm tơdrong hơpơi meh jăh lĕch đơ̆ng tơring krê hơmơt teh hơlih. Ƀok Mai Trần Hải, oei tơ̆ plei Trung Lương, ăn tơbăt adrol ki rim ‘măng ‘mi kial hơbŭt, unh hnam ƀok athei tŏk oei tơ̆ anih nai, sơđơ̆ng ƀiơ̆. Dang ei, đei teh oei ‘nao păng jên tơgŭm, unh hnam thuê bơngai jang man hnam ‘nao: “Tơmo tih hơlih jur đĭ tơ̆ hnam kon pơlei, jơ̆p ƀôt ‘noh athei pôk rĭ đĭ kon pơlei, ưh ăn bu oei dơ̆ng tơ̆ noh”.

Tơdrong pơngơ̆t 'noh pơtơm đei đơ̆ng 'măng teh hơlih tôch dêh tơ̆ kông Cấm lơ̆m khei 11/2021, klơ̆p kơtĭt hloh 40 tŏ hnam lơ̆m plei Trung Lương. Dêh char Bình Định so dŏh sơ̆ hlôi tơlĕch nơ̆r tơbăt tơdrong krê hơmơt đơ̆ng 'mi kial, teh hơlih tơ̆ tơring âu. Tơring pơjing trong jang pôk rĭ hnam tŏk oei tơ̆ plei hle ăn 64 ŭnh hnam kon pơlei lơ̆m tơring krê hơmơt.

Ƀok Lại Minh Đức, Ƀok pơgơ̆r plei Trung Lương, ăn tơbăt, truh dang ei, 44 ŭnh hnam hlôi păng tŏk bŏk oei man hnam 'nao: “Tơ̆ Anih oei xa ‘nao dang ei kon pơlei hlôi tŏk oei, đei dang 80% iŏk đei jên tơgŭm vă tŏk oei tơ̆ plei hle păng man hơmet hnam. Oei pă 20 unh hnam oei gô đe pơlung tŏk oei tơ̆ plei hle dơ̆ng”.

Ƀok Nguyễn Ngọc Thạch, Phŏ kơdră Anih vei lăng mŭk drăm xăh Cát Tiến, ăn tơbăt tơring oei hơnơ̆ng hơtŏk hrĕnh tơdrong hrŭ 'mong jên teh, pôk rĭ kon pơlei; atŭm hăm 'nŏh pơjing trong jang vei sơđơ̆ng ăn dôm unh hnam tam mă tŏk oei tơ̆ anih oei xa 'nao:

"Tơ̆ hơnăp kơnh, adrin hơtŏk hrĕnh tơdrong jang ming man, vă kon pơlei gơ̆h đei tơdrong arih xa sơđơ̆ng lơ̆m khei ‘năr tŏk oei, Anih vei lăng kon pơlei xăh kŭm pơjing trong pôk rĭ kon pơlei, hơdai hăm ‘nŏh pơjing trong jang tang găn sar bar, tŏ 'mi kial kơnê̆ lơ̆m sơnăm 2026 hai. Ưh lăp hơdrô̆ kông Cấm đĕch, mă xăh dai tơlĕch trong jang tôch hơdăh, tơdăh đei tơdrong sar bar, tơring vă adrin chông kon pơlei tŏk oei tơ̆ anih sơđơ̆ng ‘lơ̆ng, nhen dôm hnam trưng, anih kơjung, hrĕng ‘lơ̆ng vă tơgŭm ăn kon pơlei".

Đơ̆ng tơring hơnơ̆ng tơjră hăm tơdrong krê hơmơt teh hơlih, kon pơlei tơ̆ hơla jơ̆ng kông Cấm oei dar deh pôk rĭ hnam tŏk oei tơ̆ anih oei xa sơđơ̆ng 'lơ̆ng ƀiơ̆. Dôm tŏ hnam 'nao ưh lăp tơgŭm ăn kon pơlei pơm sơđơ̆ng tơdrong arih xa đĕch, mă oei jing tơdrong jơnei đơ̆ng đon kơchăng chông tơlĕch kon pơlei lĕch đơ̆ng tơring krê hơmơt kơ teh hơlih. Mă lei, ƀât mă pơyan 'mi kial truh bơih, tơdrong pôk rĭ đĭ đăng unh hnam oei đei dơ̆ng jing tơdrong jang tôch gĭt kăl, vă găn ƀiơ̆ tơdrong hiong răm yoa đơ̆ng teh hơlih, vei lăng 'lơ̆ng tơdrong arih păng tơmam drăm ăn kon pơlei./.