Sơnăm hŏk 2026-2027, Hnam trưng teh đak rong hŏk tro kon kông jăl ƀar păng jăl pêng Pi Năng Tắc, tơring Bác Ái Đông, dêh char Khánh Hòa đei man 'nao păng tơmơ̆t yua, tơplih ăn hnam hŏk so ưh đei 'lơ̆ng. Lơ̆m hơgăt teh să 3,8 ha, hnam trưng đei 18 lăm hŏk, 60 hơnih oei păng hnam thi tơplŏng kơdâu, pơm lăp hăm 'meh vă hŏk pơhrăm, oei sa ăn vă jê̆ 500 'nu hŏk tro kon kông tơring găh Pơmơ̆t Pơbăh kơ dêh char. Akŏm đĭ đăng jên man hloh 83,6 ti hlak. Oh Kiều Năng Bảo Trâm, hŏk tro hnam trưng, tơroi:

“Hnam trưng đei man đang, oh đei hŏk tơ̆ hnam trưng kơjăp ‘lơ̆ng, ‘you rơgoh păng đei tôm tơmam hŏk pơhrăm. Vă nhôn gơ̆h đei anih hŏk pơhrăm ‘lơ̆ng hlŏh”.

Ƀok Bùi Quang Quyền, Hiê̆u trơng Hnam trưng teh đak rong hŏk tro kon kông jăl ƀar păng jăl pêng Pi Năng Tắc, akhan tơdrong tơlĕch jên man, pơjing tơdrong ‘lơ̆ng vă hŏk tro bơngai kon kông đei sŏng sa, hŏk pơhrăm hơdai, oei sa kơtă tơ̆ hnam trưng, tơgop pơm tơjur ƀiơ̆ tơdrong ưh đei dang ăi băl găh pơtho pơhrăm đơ̆ng dôm tơring:

“'Nâu jĭ tơdrong bơ̆jang kiơ̆ trong jang tih đơ̆ng Đảng, Teh đak vă pơm 'lơ̆ng ăn tơdrong pơtho pơhrăm roi ‘lơ̆ng hơiă. Ưh kơ đei năng pha ra băl đơ̆ng tơring groi kông păng tơring tơmăn. Năm truh tơdrong pơm hơtŏ ‘lơ̆ng lơ̆m tơdrong pơtho pơhrăm păng jang tŏk roi pran ƀiơ̆".

Vă hơtŏk ‘lơ̆ng pơtho pơhrăm tơring groi kông, tơring hơtăih hơtŏ mơmat tat, kŭm hăm pơm hơtŏk anih jang tơmam drăm, Khánh Hòa oei tơplih ‘lơ̆ng tơdrong hŏk pơhrăm, oei sa đơ̆ng hŏk tro hăm tơdrong jang tơgŭm hŏk ƀŏng, đak toh tơ̆ hnam trưng hŏk, tơgŭm hla ar hŏk, hla ar chih păng tơmam yua lơ̆m hŏk pơhrăm. Tơdrong hŏk tro hŭt hŏk vă tơgŭm unh hnam, kŭm đei hơmet pơ ‘lơ̆ng đơ̆ng hrôih.

Khánh Hòa dang ei đei hloh 2,24 triệu ‘nu kon pơlei, lơ̆m noh kon pơlei kon kông hloh 266.000 ‘nu. Sơnăm hŏk 2026-2027, lơ̆m dêh char đei hloh 462.000 ‘nu hŏk tro tơ̆ 318 anih pơtho pơhrăm. Lơ̆m pơyan pơdơh he, dêh char tơmơ̆t jên jang hloh 1.143 ti hlak jên pơm hơmet ming hnam trưng lăm hŏk, tơmơ̆t dơ̆ng tơmam pơtho hŏk păng pơhrăm ming khŭl thây kô pơtho. Ƀok Vũ Ngọc Đương, Kơdră Anih vei lăng pơtho pơhrăm dêh char Khánh Hòa, tơbăt:

“Dôm anih jang, tơmam drăm tơ̆ dôm hnam trưng hŏk lơ̆m dêh char hlôi đei tơmơ̆t jên tôch kơ ‘lơ̆ng. Đơ̆ng hơnih lăm hŏk, tơmam kơmăy kơmŏk, hnam pơhrăm hơkâu jăn. Mĕ ƀă hŏk tro tôch kơ lăp đon, tơgŭm ƀơ̆t bơ̆n tơlĕch jang kiơ̆ Tơdrong tơchơ̆t 71, hơtŏk ‘lơ̆ng, ƀrư̆ ƀrư̆ pơm ‘lơ̆ng tơdrong pơtho pơhrăm tơ̆ dôm tơring tơrang, pơm tơdrong hơtŏ băl lơ̆m pơtho pơhrăm ‘lơ̆ng jơ̆p lơ̆m teh đak”.

Đơ̆ng krao hơvơn hŏk tro truh rim unh hnam, tơgŭm hŏk pơhrăm truh tơmơ̆t jên jang hnam trưng lăm hŏk, Khánh Hòa tŏk bŏk pơm dơ̆ng tơdrong hiôk hŏk pơhrăm ăn tơring groi kông, tơring kon pơlei kon kông.